Fetela boitsebisong

Fetela lethathamong la tse ka hare

 THUTO EA 25

Tabernakele ea Borapeli

Tabernakele ea Borapeli

Ha Moshe a ntse a le Thabeng ea Sinai, Jehova o ile a mo bolella hore a etse tente e ikhethang e bitsoang tabernakele e le hore Baiseraele ba rapele ho eona. Ba ne ba ka khona ho e jara le ho tsamaea ka eona.

Jehova o ile a re: ‘Bolella sechaba hore se fane ka ntho leha e le efe e ka thusang hore ho hahoe tabernakele.’ Baiseraele ba ile ba fana ka khauta, silevera, koporo, majoe a bohlokoa le mahakoe. Ba boela ba fana ka boea, masela, matlalo a liphoofolo le lintho tse ling tse ngata. Ba fana ka seatla se bulehileng hoo Moshe a ileng a re ho bona: ‘Ho lekane. Le se hlole le tlisa tse ling.’

Banna le basali ba bangata ba nang le tsebo ba ile ba thusa ho haha tabernakele. Jehova o ile a ba fa bohlale e le hore ba etse mosebetsi oo. Ba bang ba ile ba ohla khoele, ba etsa masela, esita le ho a khabisa. Ba bang ba hloma majoe, ba etsa lihlahisoa tsa khauta le tsa lehong.

Baiseraele ba ile ba etsa tabernakele feela joalokaha Jehova a ba laetse. Ba kenya kharetene e ntle ho arola Sehalalelo le Sehalalelisiso ka tabernakeleng. Ka Sehalalelisisong ho ne ho behiloe areka ea selekane, e neng e entsoe ka lehong la leoka le ka khauta. Ka Sehalalelong e le seluloana sa lebone sa khauta, tafole le aletare ea ho chesa libano. Lebaleng ho e-na le beisine ea koporo le aletare e kholo. Areka ea selekane e ne e hopotsa Baiseraele hore ba tšepisitse Jehova ho mo mamela. Na oa tseba hore  na selekane ke eng? Ke tšepiso ea mofuta o ikhethang.

Jehova o ile a khetha Arone le bara ba hae hore ba sebeletse tabernakeleng e le baprista. Ba ne ba lokela ho e hlokomela le ho etsetsa Jehova mahlabelo ho eona. Ke Arone feela, moprista ea phahameng ea neng a lumeletsoe ho kena ka Sehalalelisisong. O ne a kena hang ka selemo ha a etsa sehlabelo se koahelang libe tsa hae le tsa ba lelapa la hae, esita le tsa sechaba sohle sa Iseraele.

Baiseraele ba ile ba qeta ho etsa tabernakele selemo ka mor’a hore ba tlohe Egepeta. Joale ba ne ba se ba e-na le sebaka seo ba ka rapelang Jehova ho sona.

Jehova o ile a tlatsa tabernakele ka khanya ea hae ’me a etsa hore e apareloe ke leru. Baiseraele ba ne ba sa tlohe hafeela e ntse e koahetsoe ke leru. Empa ha leru le tloha, ba ne ba tseba hore joale ke nako ea hore ba tsamaee. Ba ne ba qhaqholla tabernakele ’me ba sala leru morao.

“Eaba ke utloa lentsoe le phahameng le tsoang teroneng le re: ‘Bonang! Tente ea Molimo e ho moloko oa batho, o tla lula le bona, ’me e tla ba batho ba hae. Molimo o tla ba le bona.’”—Tšenolo 21:3