Fetela boitsebisong

Fetela lethathamong la tse ka hare

 THUTO EA 19

Likotlo Tse Tharo Tse Qalang

Likotlo Tse Tharo Tse Qalang

Baiseraele ba ile ba qobelloa hore ba sebetse ka thata e le makhoba. Jehova o ile a roma Moshe le Arone ho Faro, a re ba re ho eena: ‘Tlohela sechaba sa ka hore se tsamaee se il’o ntšebeletsa lefeelleng.’ Faro a araba ka boikhohomoso a re: ‘Ha ke na taba hore na Jehova o re’ng. Nke ke ka lokolla Baiseraele.’ Eaba Faro o ba sebelisa ka thata le ho feta. Jehova o ne a sa rate seo a se etsang. Na oa tseba hore na o ile a etsa’ng? O ile a tlisetsa Baegepeta Likotlo Tse Leshome. Eaba Jehova o re ho Moshe: ‘Faro ha aa ’mamele. Hoseng o tl’o ea Nokeng ea Nile. E-ea u mo bolelle hore kaha ha a batle ho lokolla batho ba ka, metsi a Noka ea Nile a tla fetoha mali.’ Eaba Moshe le Arone ba ea ho Faro. Arone a otla metsi a Noka ea Nile ka molamu, eaba a fetoha mali Faro a ntse a shebile. Metsi a Noka ea Nile a qala ho nkha ’me litlhapi tsa shoa le batho ba hloka metsi ao ba a noang. Empa Faro a ’na a hana ho lokolla Baiseraele.

 Ka mor’a matsatsi a supileng, Jehova a re Moshe a khutlele ho Faro, a re ho eena: ‘Haeba u sa tlohelle batho ba ka hore ba tsamaee, naha eohle ea Egepeta e tla tlala linqanqane.’ Eaba Arone o phahamisa molamu oa hae ’me linqanqana tsa tlala hohle. Tsa kena ka matlung, libetheng le ka lijaneng. E le tsona feela hohle mona! Faro a re Moshe a kope Jehova hore a tlose linqanqana tseo. A tšepisa hore o tla lokolla Baiseraele. Kahoo, Jehova a felisa kotlo eo ’me Baegepeta ba bokella linqanqane tse shoeleng, ba li etsa liqubu tse ngata. Naha ea qala ho nkha. Empa Faro a boela a hana ho lokolla Baiseraele.

Jehova a re ho Moshe: ‘E-re Arone a otle fatše ka molamu oa hae ’me mobu o tla fetoha menoang e lomang habohloko.’ Hang-hang menoang ea tlala hohle. Eaba Baegepeta ba bang ba re ho Faro: ‘Kotlo ena e tsoa ho Molimo.’ Empa Faro ha aa ka a lumella Baiseraele hore ba tsamaee.

“Ke tla etsa hore ba tsebe letsoho la ka le matla a ka, ’me ba tla lokela ho tseba hore lebitso la ka ke Jehova.”—Jeremia 16:21