Fetela boitsebisong

Fetela lethathamong la tse ka hare

 THUTO EA 102

Lintho Tseo Johanne a li Boneng

Lintho Tseo Johanne a li Boneng

Ha moapostola Johanne a le teronkong e Patmose, Jesu o ile a mo bontša lintho tse 16 tseo e leng hona li tl’o etsahala. Lintho tsena li ne li bontša kamoo lebitso la Jehova le tla halaletsoa kateng, hore ’Muso oa hae o tla tla le hore thato ea hae e tla etsahala lefatšeng joalokaha e etsahala leholimong.

Johanne a bona Jehova a lutse teroneng ea hae leholimong a e-na le baholo ba 24 ba apere liphahlo tse tšoeu, ba roetse likorone tse ’mala oa khauta. Eaba ho tsoa mahalima le lialuma teroneng. Baholo ba 24 ba khumamela Jehova ’me ba mo rapela. Hape Johanne a bona batho ba bangata ba tsoang linaheng tse fapaneng ba rapela Jehova. Konyana e leng Jesu, e ne e ba tataisa ’me e ba isa metsing a bophelo. Johanne o ile a boela a bona Jesu a qala ho busa ’moho le baholo ba 24 e le Morena leholimong. Hape Johanne a boela a bona Jesu a loantša Satane le bademona ba hae, a ba ntša leholimong ’me a ba lahlela lefatšeng.

 Eaba Johanne o bona Konyana le ba 144 000 ba eme Thabeng ea Sione. A bona lengeloi le fofa sebakeng le joetsa batho hore ba tšabe Molimo ’me ba mo rapele.

A boela a bona ntoa ea Armagedone. Ntoeng eo, Jesu le lebotho la hae ba ne ba felisa puso ea Satane hobane e le khopo. Qetellong Johanne a bona khotso leholimong le lefatšeng ka mor’a hore Jehova a felise Satane le bademona ba hae. Bohle leholimong le lefatšeng ba ne ba rapela Jehova feela ’me ba halaletsa lebitso la hae.

“Ke tla beha bora pakeng tsa hao le mosali le pakeng tsa peō ea hao le peō ea hae. E tla u khoba hlooho ’me uena u tla e loma serethe.”—Genese 3:15