Fetela boitsebisong

Fetela lethathamong la tse ka hare

 THUTO EA 85

Jesu o Folisa Motho ka Sabatha

Jesu o Folisa Motho ka Sabatha

Bafarisi ba ne ba hloile Jesu ’me ba batla ho mo tšoara. Ba ne ba re a se ke a folisa batho ka Sabatha. Ka Sabatha e ’ngoe, Jesu o ile a fumana monna oa mokopa-kopa ea sa boneng a ntse a kopa lithuso ho batho seterateng. A re ho baapostola ba hae: ‘Moea oa Molimo o halalelang o tla folisa monna enoa.’ Jesu a etsa seretse ka mathe a hae eaba o tlotsa monna eo ka sona holim’a mahlo. Jesu a re ho eena: ‘Tsamaea u hlatsoe mahlo a hao ka letamong la Siloame.’ Monna eo a etsa joalo, eaba ka lekhetlo la pele bophelong ba hae o qala ho bona.

Batho ba ne ba maketse. Ba ile ba re: ‘Na eo ke eena monna eloa ea neng a tloaetse ho kopa batho lithuso kapa o mpa a tšoana le eena?’ Monna eo a re: ‘Ke ’na.’ Batho ba re ho eena: ‘Ho tlile joang hore ebe u se u bona?’ Ka mor’a hore a ba bolelle hore na ho tlile joang, ba mo isa ho Bafarisi.

Monna eo a re ho Bafarisi: ‘Jesu o ile a ntlotsa ka seretse mahlong, eaba o re ke il’o itlhatsoa. Ke ile ka etsa joalo, eaba ke qala ho bona.’ Bafarisi ba re: ‘Haeba Jesu o folisa batho ka Sabatha, matla a hae ha a tsoe ho Molimo.’ Ba bang bona ba re: ‘Haeba matla a hae a ne a sa tsoe ho Molimo, o ne a ke ke a khona ho folisa batho.’

Bafarisi ba bitsa batsoali ba monna eo eaba ba re ho bona: ‘Ho tlile joang hore ebe mora oa lona o se a bona?’ Batsoali ba hae ba ne ba tšaba ho bua hobane  Bafarisi ba ne ba re mang kapa mang ea lumelang ho Jesu o lokela ho ntšoa ka synagogeng. Kahoo ba re: ‘Ha re tsebe. Mo botseng.’ Bafarisi ba botsa monna eo lipotso tse ling eaba o re: ‘Ke le boleletse lintho tsohle. Ke hobane’ng ha le nkemeletse ka lipotso?’ Bafarisi ba halefa eaba ba mo ntšetsa ka ntle.

Jesu a ea ho eena eaba o re: ‘Na u lumela ho Mesia?’ Monna eo a re: ‘Ke ne ke tla lumela ho eena haeba ke tseba hore na ke mang.’ Jesu a re: ‘Ke ’na Mesia.’ Jesu o bile mosa ho monna eo. Ha aa ka mo folisa feela, empa o ile a mo thusa hore a be le tumelo.

“Le fositse, hobane ha le tsebe Mangolo kapa matla a Molimo.”—Matheu 22:29