Fetela boitsebisong

Fetela lethathamong la tse ka hare

 THUTO EA 80

Jesu o Khetha Baapostola ba 12

Jesu o Khetha Baapostola ba 12

Ka mor’a hore Jesu a qete hoo e ka bang selemo le likhoeli tse tšeletseng a ntse a bolella batho ka ’Muso oa Molimo, o ile a lokela ho etsa qeto ea bohlokoa. O ne a tla khetha bo-mang hore ba sebetse le eena? O ne a tla koetlisa bo-mang hore ba etelle pele phutheho ea Bokreste? Jesu o ne a hloka hore Jehova a mo thuse e le hore a etse qeto. Kahoo, a ea thabeng ho ea rapela a le mong bosiu bohle. Eaba hoseng o bitsa barutuoa ba hae ’me o khetha ba 12 hore e be baapostola. Na u tseba mabitso a bona? Ke Petrose, Andrease, Jakobo, Johanne, Filipi, Bartholome, Thomase, Matheu, Jakobo mora Alfiase, Thadiase, Simone le Judase Iskariota.

Andrease, Petrose, Filipi, Jakobo

Baapostola bana ba 12 ba ne ba tla ea le Jesu hohle moo a eang teng. O ile a ba koetlisa ’me ka mor’a moo a ba roma hore ba e’o ruta ba le bang. Jehova o ile a ba fa matla a ho leleka bademona le a ho folisa batho ba kulang.

Johanne, Matheu, Bartholome, Thomase

 Jesu o ile a re baapostola ba hae ba 12 ke metsoalle ea hae ’me o ne a ba tšepa. Bafarisi ba ne ba re baapostola ha baa ruteha. Empa Jesu o ne a ba rutile ho etsa mosebetsi. Ba ne ba tla ba le Jesu pele a shoa le ka mor’a hore a tsosoe. Ba bangata ba baapostola bana ba 12 ba ne ba tsoa Galilea, e leng moo Jesu a neng a tsoa teng. Ba bang ba ne ba nyetse.

Jakobo mora Alfiase, Judase Iskariota, Thadiase, Simone

Baapostola ba ne ba sa phethahala ’me ba etsa liphoso. Ka linako tse ling, ba ne ba bua ba sa nahana ebile ba etsa liqeto tse fosahetseng. Ka linako tse ling, ba se na mamello. Ba ile ba pheha khang ka hore na ke mang ea moholo ho e mong. Empa ba ne ba rata ho thusa batho ba bile ba rata Jehova. E ne e tla ba bona ba qalang phutheho ea Bokreste ka mor’a hore Jesu a nyolohele leholimong.

“Ke le bitsitse metsoalle, hobane lintho tsohle tseo ke li utloileng ho Ntate ke le tsebisitse tsona.”—Johanne 15:15