Fetela boitsebisong

Fetela lethathamong la tse ka hare

 THUTO EA 60

’Muso o Tla Lula o le Teng

’Muso o Tla Lula o le Teng

Ka bosiu bo bong, Morena Nebukadnezare o ile a lora toro e makatsang. Toro eo e ile ea mo tšoenya hoo a ileng a felloa ke boroko. Eaba o bitsa maselamose ’me o re ho ’ona: ‘Ntlhalosetseng toro eo ke e lorileng.’ A re: ‘Re bolelle hore na u lorile’ng, Morena.’ Empa Nebukadnezare a re: ‘Che, nka se le bolelle eona. Lona mpolelleng hore na ke lorile eng, ho seng joalo ke tla le bolaea.’ Maselamose ao a re ho eena hape: ‘Re bolelle hore na u lorile eng, re tla u hlalosetsa toro ea hao.’ A re ho ’ona: ‘Le batla ho nqhekella. Mpolelleng hore na ke lorile eng.’ A re ho morena: ‘Ha ho na motho ea ka u bolellang eona. U re kopa ntho e thata.’

Eaba Nebukadnezare o halefela maselamose ao haholo ’me a laela hore banna bohle ba bohlale naheng eo ba bolaoe. Ba ne ba akarelletsa Daniele, Shadrake, Meshake le Abednego. Daniele o ile a kopa morena hore a mo fe nako e itseng. Kahoo, Daniele le metsoalle ea hae ba rapela Jehova ba mo kopa hore a ba thuse. Jehova o ile a etsa’ng?

Jehova o ile a bontša Daniele ka pono toro ea Nebukadnezare le tlhaloso ea eona. Ka le hlahlamang, Daniele a ea ho mohlanka oa morena ’me a re: ‘U se ke oa bolaea banna ba bohlale. Nka hlalosetsa morena toro ea hae.’ Eaba mohlanka eo o isa Daniele ho Nebukadnezare. Daniele a re ho morena: ‘Molimo o u bolella lintho tse tl’o etsahala. Toro ea hao ke ena: U bone setšoantšo se seholo se nang le hlooho ea khauta, sefuba le matsoho a silevera, mpa le lirope tsa koporo, meomo ea tšepe le maoto a kopantseng tšepe le letsopa. Eaba lejoe le khephoha thabeng ’me le otla setšoantšo seo maotong. Kahoo, la silakanya setšoantšo seo la se etsa phofo ’me sa fefoloa ke moea. Lejoe leo la fetoha thaba e kholo ’me la tlala lefatše lohle.’

 Ka mor’a moo, Daniele a re: ‘Tlhaloso ea toro ea hao ke ena: ’Muso oa hao ke hlooho ea khauta. ’Muso o tl’o latela oa hao ke oa silevera. Ka mor’a oona ho tla tla o kang oa koporo, o tla busa lefatše lohle. Ebe ho latela o matla joaloka tšepe. Qetellong, ho tla ba le ’muso o arohaneng, oo likarolo tse ling li tla ba matla joaloka tšepe ’me tse ling e be tse fokolang joaloka letsopa. Lejoe le fetohang thaba e kholo ke ’Muso oa Molimo. O tla silakanya mebuso ena kaofela ’me ona o be teng ka ho sa feleng.’

Eaba Nebukadnezare o khumama fatše ka pel’a Daniele. A re: ‘Molimo oa hao o u boleletse toro ena. Ha ho na Molimo ea tšoanang le eena.’ Ho e-na le hore Nebukadnezare a bolaee Daniele, o ile a mo etsa moeta-pele oa banna bohle ba bohlale le ’musi oa profinse ea Babylona. Na oa bona hore na Jehova o ile a araba thapelo ea Daniele joang?

“Tsa a bokellela sebakeng seo ka Seheberu se bitsoang Har–Magedone.”—Tšenolo 16:16