Fetela boitsebisong

Fetela lethathamong la tse ka hare

 THUTO EA 67

Marako a Jerusalema

Marako a Jerusalema

A re nahaneng ka boemo bo neng bo le Jerusalema lilemo tse seng kae pejana ho moo. Nehemia ea neng a sebeletsa Morena Artaxerxese, e ne e le Moiseraele ea lulang motseng oa Persia o bitsoang Shushane. Ngoan’abo Nehemia ea tsoang Juda o ile a mo tlisetsa litaba tse bohloko, a re: ‘Baiseraele ba Jerusalema ha baa sireletseha. Liheke le marako a motse ao Bababylona ba a sentseng a ntse a e-s’o tsosolosoe.’ Taba ena e ile ea utloisa Nehemia bohloko. Kahoo, a rera ho khutlela Jerusalema ho ea thusa. Kahoo, a kopa Jehova hore a mo thuse morena a mo lokolle.

Ka mor’a matsatsi a seng makae, morena o ile a hlokomela hore Nehemia ha aa thaba. Eaba o re: ‘Ke qala ho u bona u le tjena. Bothata ke’ng?’ Nehemia a re: ‘Nka tlohela ho utloa bohloko joang empa marako a motse oa heso oa Jerusalema a oele?’ Kahoo, morena a re: ‘U batla ke u thuse ka eng?’ Hang-hang, Nehemia a rapella ka pelong. Eaba o re ho morena: ‘Ke kopa u ntumelle hore ke khutlele Jerusalema ho ea tsosolosa marako.’ Morena Artaxerxese a re Nehemia a tsamaee ’me a etsa bonnete ba hore o tla sireletseha ha a le tseleng. A boela a beha Nehemia e le ’musisi oa Juda ’me a mo fa lehong la ho etsa liheke.

Ha Nehemia a fihla Jerusalema, o ile a hlahloba marako a motse. Ka mor’a moo, a bokella baprista le baeta-pele ’me a re ho bona: ‘Taba ena ha e hantle. Re lokela ho tsosolosa marako.’ Ba lumellana le eena, ’me ba qala ho a tsosolosa.

Empa lira tsa Baiseraele tsa qala ho soma, tsa re: ‘Le phokojoe e ka liha lerako lena leo le le hahang.’ Baiseraele ba iphapanyetsa lira tsa bona ha li ntse li ba soma ’me ba tsoela pele ba haha. Lerako la ’na la nyoloha.

Eaba lira tsa Baiseraele li rera ho hlasela Jerusalema ka tšohanyetso. Ha Bajuda ba utloa seo, ba tšoha. Empa Nehemia a re: ‘Le se ke la tšoha. Jehova o na le rona.’  Kahoo, a beha balebeli ho kata basebetsi ’me lira tsa sitoa ho ba hlasela.

Ba ile ba nka matsatsi a 52 feela hore ba qete marako le liheke tsa motse. Ka mor’a moo, Nehemia a bitsa Balevi bohle hore ba tle Jerusalema moketeng oa nehelo. A ba hlophisa hore e be lihlopha tse peli tsa libini. Ba hloella lerakong ka litepisi tse Keiting ea Seliba, eaba ba pota motse ba o hlaha ka mahlakoreng a sa tšoaneng. Ba binela Jehova ’me ba letsa literompeta, licymbala le liharepa. Esdrase a tsamaea le sehlopha se seng ’me Nehemia a tsamaea le se seng, ho fihlela ba kopana tempeleng. Batho bohle—banna, basali le bana—ba etsetsa Jehova mahlabelo ’me ba keteka. Motho o ne a utloa a le hole hore ba thabile.

“Sebetsa leha e le sefe se tla etsoa khahlanong le uena se ke ke sa atleha.”—Esaia 54:17