Fetela boitsebisong

Fetela lethathamong la tse ka hare

 KHAOLO EA 3

Ke Hobane’ng ha Molimo a Bopile Batho?

Ke Hobane’ng ha Molimo a Bopile Batho?

1. Morero oa Molimo ke ofe ka batho?

MOLIMO o na le lebaka la hore ebe o re bopile. O ile a beha Adama le Eva serapeng se setle ka mor’a ho ba bopa. Morero oa hae e ne e le hore ba be le bana, ba etse lefatše lohle paradeise ba be ba hlokomele liphoofolo.—Genese 1:28; 2:8, 9, 15; sheba tlhaloso ea botšelela lethathamong la Litlhaloso qetellong ea buka.

2. (a) Bibele e paka joang hore Molimo o tla phethahatsa merero ea hae? (b) Bibele e re ke batho ba joang ba tla phela ka ho sa feleng?

2 Na u nahana hore re tla ke re phele Paradeiseng? Jehova o re: “Ke o entse, ke tla boela ke o phethe.” (Esaia 46:9-11; 55:11) Ha e le hantle, o tla phethahatsa merero ea hae ’me ha ho letho le tla mo thiba. Jehova o bopile lefatše hobane a e-na le morero. Ha aa ka “a le bōpela lefeela.” (Esaia 45:18) O batla hore batho ba phele ho lona. Molimo o batla hore ho phele batho ba joang lefatšeng, hona ba tla phela nako e kae? Bibele e re: “Ba lokileng [kapa ba mamelang] ba tla rua lefatše, ba tla lula ho lona ka ho sa feleng.”Pesaleme ea 37:29; Tšenolo 21:3, 4.

3. Kaha batho baa kula ebile baa shoa, u ka ’na oa ipotsa potso efe?

3 Leha ho le joalo, mehleng ena batho baa kula ebile baa shoa. Libakeng tse ngata, baa loantšana le ho bolaeana. Lintho li ile tsa senyeha hokae empa Molimo a ne a sa rera hore ho be tjee? Ke Bibele feela e ka hlalosang.

 SERA SA MOLIMO

4, 5. (a) Ke mang ea ileng a bua le Eva a sebelisa noha serapeng sa Edene? (b) Ke joang motho ea tšepahalang a ka fetohang lesholu?

4 Bibele e re bolella hore Molimo o na le sera se “bitsoang Diabolose le Satane.” Satane o ile a bua le Eva a sebelisa noha serapeng sa Edene. (Tšenolo 12:9; Genese 3:1) O ile a etsa hore ho bonahale eka ke noha e buang.—Sheba tlhaloso ea bosupa lethathamong la Litlhaloso qetellong ea buka.

5 Molimo ha se eena ea bopileng Satane Diabolose. Lengeloi le neng le le teng ha Molimo a bopa lefatše, le ile la iphetola Diabolose. (Jobo 38:4, 7) Ho utloisisa taba ena, a re ke re etse mohlala. Motho ea tšepahalang a ka fetoha lesholu, eseng hobane a tsoetsoe e le lona, empa hobane a lakatsa ntho eo e seng ea hae. A ka lula a nahana ka eona le hore na o tla e fumana joang. Ebe ha monyetla o hlaha, oa e utsoa. Kahoo, e ba lesholu.—Bala Jakobo 1:13-15; sheba tlhaloso ea borobeli lethathamong la Litlhaloso qetellong ea buka.

6. Ho tlile joang hore lengeloi lee e be sera sa Molimo?

6 Lengeloi lena le iphetotseng Diabolose le batla le tšoana le motho eo ea iphetotseng lesholu. Ka mor’a hore Jehova a bope Adama le Eva, o ile a re ba be le bana e le hore ba ‘tlatse lefatše.’ (Genese 1:27, 28) Mohlomong lengeloi leo le ile la lakatsa eka batho bohle ba ka le rapela ho e-na le hore ba rapele Jehova. Eaba le tsoela pele ho lula le nahana ka takatso eo le hore na le ka etsa’ng hore batho ba le rapele. Kahoo, la thetsa Eva ’me la mo khelosa. (Bala Genese 3:1-5.) Ka ho etsa joalo, le ile la fetoha Satane Diabolose, e leng sera sa Molimo.

7. (a) Ke hobane’ng ha Adama le Eva ba ile ba shoa? (b) Ke hobane’ng ha re tsofala re bile re shoa?

7 Adama le Eva ha baa ka ba mamela Jehova, eaba ba  ja tholoana. (Genese 2:17; 3:6) Kaha ha baa ka ba mamela, ba ile ba shoa feela joalokaha Jehova a ne a ba boleletse. (Genese 3:17-19) Bana ba Adama le Eva e ile ea e-ba baetsalibe, kahoo le bona ba shoa. (Bala Baroma 5:12.) Ho u thusa ho utloisisa hore na ke hobane’ng ha bana ba Adama le Eva e ile ea e-ba baetsalibe, nahana ka mohlala o latelang. Nka hore u baka bohobe ka pane e nang le sebothe. Bohobe bo tla tsoa bo e-na le sebothe seo. Ha Adama a tlola molao oa Molimo, o ile a fetoha moetsalibe. Kaha kaofela ha rona re bana ba Adama, re futsitse sebe ho eena. Ke ka lebaka leo re leng baetsalibe ’me re tsofalang ebile re shoa.—Baroma 3:23; sheba tlhaloso ea borobong lethathamong la Litlhaloso qetellong ea buka.

8, 9. (a) Satane o ne a batla hore Adama le Eva ba lumele eng? (b) Ke eng e ileng ea hlaka hobane Jehova a sa bolaea Satane, Adama le Eva?

8 Satane o ile a etsa hore Adama le Eva ba se ke ba mamela Jehova eaba kaofela e ba marabele. O ne a batla hore Adama le Eva ba lumele hore Jehova o leshano ebile ke ’musi ea khopo, ea sa ba lakaletseng katleho. Satane o ne a re batho ha ba hloke hore Molimo a ba bolelle hore na ba lokela ho etsa’ng, le hore Adama le Eva ba lokela ho ikhethela hore na ba batla ho etsa’ng. Joale, Jehova o ne a tla etsa’ng? A ka be a ile a bolaea marabele ao. Empa ho etsa joalo ho ne ho sa tl’o paka hore Satane ke eena ea leshano.

9 Ka hona, Jehova ha aa ka a bolaea marabele ao hang-hang. Ho e-na le hoo, o ile a lumella batho hore ba ipuse. Kahoo, ho ile hoa hlaka hore Satane o leshano le hore Jehova oa tseba hore na ke eng e ka tsoelang batho molemo. Re tla ithuta ka taba ena Khaolong ea 11. Empa  u nahana’ng ka qeto eo Adama le Eva ba e entseng? Na ho ne ho nepahetse hore ba kholoe Satane ’me ba tlole molao oa Molimo? Jehova ke eena ea neng a file Adama le Eva lintho tsohle tseo ba neng ba na le tsona. O ne a ba file bophelo bo phethahetseng, sebaka se setle seo ba phelang ho sona le mosebetsi oo ba o thabelang.  Empa Satane o ne a sa ba etsetsa letho le molemo. Ha e ne e le uena, u ka be u ile oa etsa’ng?

10. E mong le e mong oa rona o lokela ho khetha eng?

10 E mong le e mong oa rona o lokela ho khetha hore na o batla ho phela joang. Re ka khetha ho mamela Jehova e le ’Musi oa rona ’me ra paka hore Satane o leshano. Kapa re ka khetha Satane e le ’musi oa rona. (Pesaleme ea 73:28; bala Liproverbia 27:11.) Ke batho ba seng bakae feela lefatšeng ba mamelang Molimo. Ha e le hantle, ha se eena ea busang lefatše. Empa haeba ha se Molimo ea busang lefatše, le busoa ke mang?

KE MANG EA BUSANG LEFATŠE?

Haeba mebuso eohle ea lefatše e ne e se ea Satane, na a ka be a ile a re o tla e fa Jesu?

11, 12. (a) Taba ea hore Satane o ile a tšepisa Jesu lintho tse lefatšeng e re ruta’ng? (b) Ke mangolo afe a bontšang hore Satane ke eena ea busang lefatše?

11 Jesu o ne a tseba hore na ke mang ea busang lefatše. Ka nako e ’ngoe, Satane o ile “a mo bontša mebuso eohle ea lefatše le khanya ea eona.” Eaba o re ho Jesu: “Lintho tsena tsohle ke tla u fa tsona haeba u ka itihela fatše [kapa oa khumama] ’me ua nketsetsa ketso ea borapeli.” (Matheu 4:8, 9; Luka 4:5, 6) Na haeba lintho tse lefatšeng e ne e se ea Satane, na a ka be a ile a re o tla e fa Jesu? Che. Mebuso eohle ke ea Satane.

12 Mohlomong u ka ’na oa ipotsa hore na Satane o busa lefatše joang empa e le Jehova ea le bopileng. (Tšenolo 4:11) Ke ’nete hore lefatše le bopiloe ke Jehova, empa Jesu o ile a re Satane ke “’musi oa lefatše lena.” (Johanne 12:31; 14:30; 16:11) Moapostola Pauluse o ile a bitsa Satane Diabolose “molimo oa tsamaiso ena ea lintho.” (2 Bakorinthe 4:3, 4) Moapostola Johanne le eena o ile a re “lefatše lohle le rapaletse matleng a ea khopo.”—1 Johanne 5:19.

 LEFATŠE LA SATANE LE TLA FELISOA JOANG?

13. Ke hobane’ng ha lefatše lee le lokeloa ho felisoa?

13 Lefatše le ntse le e-ba kotsi le ho feta. Le tletse lintoa, bobolu, boikaketsi esita le liketso tse sehloho. Batho ba ke ke ba khona ho felisa mathata ana ’ohle, ho sa tsotellehe boiteko bo matla boo ba bo etsang. Empa haufinyane Molimo o tla felisa lefatše lena le khopo ka ntoa ea hae ea Armagedone, ’me le nkeloe sebaka ke lefatše le lecha la ho loka.—Tšenolo 16:14-16; sheba tlhaloso ea leshome lethathamong la Litlhaloso qetellong ea buka.

14. Jehova o khethile mang hore e be Morena oa ’Muso oa Hae? Bibele e ile ea bolela eng esale pele ka Jesu?

14 Jehova o khethile Jesu Kreste hore e be Morena oa ’Muso oa Hae oa leholimo. Lilemong tse likete tse fetileng, Bibele e ile ea bolela esale pele hore Jesu o tla busa e le “Khosana ea Khotso” le hore puso ea hae e ke ke ea fela. (Esaia 9:6, 7) Jesu o ile a ruta balateli ba hae hore ba rapelle ’Muso ona, a re ba re: “’Muso oa hao o ke o tle. Thato ea hao e ke e etsahale lefatšeng, joalokaha e etsahala leholimong.” (Matheu 6:10) Khaolong ea 8, re tla ithuta hore na ’Muso oa Molimo o tla nkela mebuso ea lefatše sebaka joang. (Bala Daniele 2:44.) Ka nako eo, ’Muso oa Molimo o tla etsa hore lefatše e be paradeise.—Sheba tlhaloso ea 11 lethathamong la Litlhaloso qetellong ea buka.

LEFATŠE LE LECHA LE ATAMETSE

15. “Lefatše le lecha” ke eng?

15 Bibele e tšepisa hore “ho na le maholimo a macha le lefatše le lecha tseo re li letetseng” ’me “ho loka ho tla aha ho tsona.” (2 Petrose 3:13; Esaia 65:17) Ka linako tse ling, ha Bibele e bua ka batho e re ke “lefatše.” (Genese 11:1) Kahoo, “lefatše le lecha” ke batho ba mamelang Molimo le bao a ba hlohonolofatsang.

16. Ke mpho efe eo Molimo a e tšepisang ba tla phela lefatšeng la hae le lecha, hona re lokela ho etsa’ng hore re e fumane?

 16 Jesu o ile a tšepisa hore ba tla phela lefatšeng le lecha la Molimo ba tla fumana mpho ea “bophelo bo sa feleng.” (Mareka 10:30) Re lokela ho etsa’ng e le hore re fumane mpho ee? Ka kopo, bala Johanne 3:16 le 17:3 hore u fumane karabo. Joale a re ke re bone hore na Bibele e re bophelo bo tla ba joang Paradeiseng.

17, 18. Ho tla ba joang ha lefatšeng ha batho ba sa mameleng Molimo ba se ba le sieo?

17 Bokhopo, lintoa le tlolo ea molao li tla fela. Lefatšeng ho ke ke ha hlola ho e-ba le batho ba sa mameleng Molimo. (Pesaleme ea 37:10, 11) Molimo o tla “felisa lintoa ho isa pheletsong ea lefatše.” (Pesaleme ea 46:9; Esaia 2:4) Lefatše le tla tlala batho ba ratang Molimo le ba mo mamelang. Khotso e tla ba teng ka ho sa feleng.—Pesaleme ea 72:7.

18 Batho ba Jehova ba tla lula ba sireletsehile. Mehleng ea ha ho ne ho ngoloa Bibele, Baiseraele ba ne ba lula ba sireletsehile ha ba mamela Molimo. (Levitike 25:18, 19) Re ke ke ra tšoha ntho leha e le efe kapa motho leha e le ofe Paradeiseng. Re tla lula re sireletsehile ka linako tsohle.—Bala Esaia 32:18; Mikea 4:4.

19. Ke hobane’ng ha re ka kholiseha hore lijo li tla ba ngata lefatšeng le lecha la Molimo?

19 Lijo li tla ba ngata. “Ho tla ba le lijo-thollo tse ngata lefatšeng; ho tla ba le nala holim’a litlhōrō tsa lithaba.” (Pesaleme ea 72:16) Jehova “Molimo oa rona, o tla re hlohonolofatsa,” ’me “lefatše le tla fana ka lihlahisoa tsa lona.”—Pesaleme ea 67:6.

20. Ke bopaki bofe ba hore lefatše e tla ba paradeise?

20 Lefatše lohle e tla ba paradeise. Batho ba tla ba le matlo a matle le lirapa tse ntle. (Bala Esaia 65:21-24;  Tšenolo 11:18.) Lefatše lohle le tla ba letle joaloka serapa sa Edene. Kamehla Jehova o tla re fa lintho tseo re li hlokang. Bibele e re ka eena: “U fuparolla seatla sa hao u khotsofatsa takatso ea ntho e ’ngoe le e ’ngoe e phelang.”—Pesaleme ea 145:16.

21. Re tseba joang hore ho tla ba le khotso pakeng tsa batho le liphoofolo?

21 Ho tla ba le khotso pakeng tsa batho le liphoofolo. Liphoofolo li ke ke tsa hlola li ntša batho kotsi. Bana ba tla ikutloa ba sireletsehile leha ba le har’a liphoofolo tseo hona joale li leng kotsi.—Bala Esaia 11:6-9; 65:25.

22. Jesu o tla etsetsa batho ba kulang eng?

22 Ha ho sa tla ba le motho ea kulang. Jesu o ile a folisa batho ba bangata ha a le lefatšeng. (Matheu 9:35; Mareka 1:40-42; Johanne 5:5-9) Empa ha e se e le Morena ’Musong oa Molimo, o tla folisa batho bohle. Ha ho motho ea tla re: “Kea kula.”—Esaia 33:24; 35:5, 6.

23. Molimo o tšepisa hore o tla etsa’ng?

23 Bafu ba tla tsosoa. Molimo o tšepisa hore o tla tsosa batho ba limilione ba shoeleng. “Ho tla ba le tsoho ea ba lokileng le ba sa lokang.”—Bala Johanne 5:28, 29; Liketso 24:15.

24. U ikutloa joang ka ho phela Paradeiseng?

24 Kaofela ha rona re lokolohile ho khetha. Re ka khetha ho ithuta ka Jehova le ho mo sebeletsa, kapa ra khetha ho etsa seo re se batlang. Haeba re khetha ho sebeletsa Jehova, re tla ba le bokamoso. Ha monna e mong ea neng a le makhatheng a lefu a kopa Jesu hore a mo hopole, Jesu o ile a mo tšepisa a re: “U tla ba le ’na Paradeiseng.” (Luka 23:43) A re ke re ithute ho eketsehileng ka Jesu Kreste le kamoo a tla phethahatsa litšepiso tsa Molimo kateng.