Fetela boitsebisong

Fetela lethathamong la tse ka hare

Lengolo le Tsoang ho Sehlopha se Busang

Lengolo le Tsoang ho Sehlopha se Busang

Bara le Barali Babo Rōna ba Ratehang:

“Kamehla re leboha Molimo ha re bua ka lōna bohle lithapelong tsa rōna, etsoe re hopola re sa phetse mosebetsi oa lōna o tšepahalang le mosebetsi oa lōna o lerato le mamello ea lōna ka lebaka la tšepo ea lōna ho Morena oa rōna Jesu Kreste ka pel’a Molimo le Ntate oa rōna.” (1 Bathes. 1:2, 3) Mantsoe ana a hlalosa ka bokhabane tsela eo re ikutloang ka eona ka lōna! Re leboha Jehova ka hore ebe le basebetsi-’moho le rōna le ka mosebetsi o motle oo le o etsang. Ka lebaka lefe?

Selemong se fetileng, ka botšepehi le ’nile la ithukhubetsa ka ho rata mosebetsing o amanang le ’Muso. Boholo ba lōna le atolositse tšebeletso ea lōna. Ba bang ba falleletse libakeng le linaheng tseo ho hlokahalang bahoeletsi ba eketsehileng ba ’Muso. Ba bang ba atolositse tšebeletso ea bona ka ho paka phatlalatsa. Ba bangata ba ile ba susumelletseha hore e be bo-pula-maliboho ba thusang likhoeling tsa Sehopotso, tsa ketelo ea molebeli oa potoloho le nakong ea letšolo le khethehileng ka August 2014. Le hoja maemo a lōna a bophelo a sa tšoane, rea bona hore lea ikitlaetsa mosebetsing oa Jehova, kahoo rea le babatsa. (Bakol. 3:23, 24) Ka sebele boikitlaetso ba lōna bo re susumelletsa ho leboha Jehova!

Re boetse re ananela e le ruri hore ebe le ile la ithaopela ho tšehetsa mosebetsi oa ho haha litsi tsa borapeli lefatšeng ka bophara. Re hloka libaka tse ling tsa borapeli  kaha batho ba Jehova ba ntse ba eketseha. (Esa. 60:22) Selemong se fetileng palo ea bahoeletsi e ne e le 8 201 545, ’me ea lithuto tsa Bibele e ka ba 9 499 933 khoeli le khoeli. Ka lebaka la khōlo ena, liofisi tse ngata tsa makala li lokela ho atolosoa kapa ho nchafatsoa. Ntle ho tika-tiko re boetse re hloka Liholo Tsa ’Muso tse eketsehileng! Ho boetse ho hlokahala hore ho hahoe Liofisi Tsa Phetolelo e le hore bafetoleli ba ka phela le ho sebeletsa moo lipuo tsa bona le buuang teng.

Ka hona, e mong le e mong oa rōna a ka ipotsa, ‘Nka etsa’ng ho tšehetsa mosebetsi oa kaho?’ Ba bang ba ka khona ho ithaopela ho etsa mosebetsi oa kaho. Ebang re tseba mesebetsi e amanang le kaho kapa che, kaofela re na le tlotla ea ho nehelana ka lintho tsa rōna tsa bohlokoa ho tšehetsa mosebetsi ona oa bohlokoa. (Liprov. 3:9, 10) Ha ho ne ho hahoa tabernakele Iseraeleng ea boholo-holo, Baiseraele ba ile ba bula liatla tsa bona hoo ho ileng ha etsoa tsebiso ea hore ba emise ho fana ka menehelo. (Ex. 36:5-7) Ntle ho pelaelo, mehlala e joalo e hlahang ka Mangolong ea re susumetsa. Hore ebe le ithaopela ho tšehetsa mesebetsi ena e halalelang ke lebaka le leng la ho leboha Jehova!

Lebaka le leng le ikhethang le re thabisang ke ha re bona barab’abo rōna ba eme ba sa sisinyehe. Ka mohlala, nahana ka barab’abo rōna ba Korea Boroa. Ho tloha ka 1950, barab’abo rōna ba bacha ba ’nile ba koalloa lichankaneng ka lebaka la ho hana ho kenella litabeng tsa lipolotiki kapa tsa sesole. Haesale ho tloha ka nako eo ho tla fihlela kajeno, barab’abo rōna ba ’nile ba ema ba tiile. Mohlala oa bona oa ho mamella o matlafatsa tumelo ea rōna!

 Eritrea, barab’abo rōna ba bararo ba koalletsoe ka lilemo tse fetang 20. Ba bang, ho akarelletsa baralib’abo rōna le bana ba bona ba ’nile ba koalloa ka nakoana. Ho ’nile ha etsoa maoala a ho ba lokolla, empa ho fihlela joale, ha ho nko ho tsoa lemina. Leha ho le joalo, barab’abo rōna ha ba sekisetse. Ba lula ba tšepahala ho sa tsotellehe maemo ana a bohloko. E se eka le ka mohla re ke ke ra ba lebala lithapelong tsa rōna.—Bar. 1:8, 9.

Ke ’nete hore boholo ba lōna ha le lichankaneng. Leha ho le joalo, ba bang ba lōna le ntse le tsofala, lea kula, le hlorisoa ke balekane kapa litho tsa lelapa tseo e seng Lipaki ebile le na le mathata a mang a tsejoang ke lōna feela. Leha ho le joalo, le ntse le sebeletsa Jehova ka botšepehi! (Jak. 1:12) Re re tšoarang joalo! Ho mamella ha lōna ka botšepehi ke lebaka le leng la hore re lebohe Jehova.

Ruri ho sebetsa ha lōna ka boitelo, ho ithaopa hammoho le ho mamella ha lōna ho re fa mabaka a ho ‘leboha Jehova, kaha o molemo.’ (Pes. 106:1) Rea le rata ebile re rapela Jehova hore a le matlafatse, a le tiise a be a le hlohonolofatse e le hore le ka mo sebeletsa ho-ea-ho-ile.

Barab’abo lōna,

Sehlopha se Busang sa Lipaki Tsa Jehova