Fetela boitsebisong

Fetela lethathamong la tse ka hare

 HO BOLELA LE HO RUTA LEFATŠENG LOHLE

Europe

Europe
  • PALO EA LINAHA 47

  • PALO EA BAAHI 741 311 996

  • PALO EA BAHOELETSI 1 611 036

  • PALO EA LITHUTO TSA BIBELE 847 343

Baithuti ba ea Holong ea ’Muso

Finland: Bana ba sehlopha sa bone ka Holong ea ’Muso

Ha Ines, e leng morutoana oa sehlopha sa bone naheng ea Finland, a utloa hore ho tla buuoa ka Lipaki Tsa Jehova tlelaseng ea thuto ea bolumeli, o ile a mema baithuti-’moho le eena ho ea Holong ea ’Muso. Baithuti hammoho le tichere ba ile ba bona ho le molemo ho etsa joalo.

Bekeng e latelang, baithuti ba 38 ba ile ba nka leeto la lik’hilomithara tse hlano ka libaesekele  ho ea Holong ea ’Muso. Matichere a mabeli hammoho le mosuoe-hlooho ba ile ba tla. Ha ba fihla Holong ba ile ba amoheloa ke barab’abo rōna ba babeli le baralib’abo rōna ba bararo. Ha ba ntse ba ja lijo tse bobebe baithuti ba ile ba botsa lipotso tse mabapi le Holo ea ’Muso le Lipaki Tsa Jehova ba re: “Ho etsoa’ng libokeng?” “Phaposi ela ke ea eng?” Phaposi eo ba neng ba bua ka eona ke laebrari. “Ke hobane’ng ha leboteng mane ho ngotsoe lipalo, moo 6 e arotsoeng ka 10?” E ne e le temana ea selemo e nkiloeng ho Matheu 6:10.

Kaha sekolo seo se ne se e-na le letšolo la ho loantša bompoli likolong, barab’abo rōna ba ile ba ba bontša video ea U ka Hlōla Mpoli U sa Loane, ho jw.org. Ba ile ba boela ba ba bontša likarolo tse ling tsa Websaete ea rōna ’me ba ba letsetsa pina ea ’Muso. Ba ile ba nka hoo e ka bang hora.

Mosuoe-hlooho, matichere hammoho le baithuti ba ne ba thabile. Mosuoe-hlooho o ne a khahluoe ke boitsebiso bo Websaeteng kaha o ne a nahana hore bo ka sebelisoa thutong ea bolumeli. O ile a thaba haholo ha a bolelloa hore litlelase tse ling le tsona li ka ea Holong ea ’Muso. Kahoo, letsatsing le hlahlamang tichere ea tlelase e ’ngoe e ile ea kōpa ho tlisa tlelase ea eona Holong ea ’Muso.

O Fumana Letlotlo Thotobolong

Cristina oa Romania, ha aa kena sekolo, ka hona o ne a sa tsebe ho bala le ho ngola. O ne a futsanehile hoo a neng a iphelisa ka ho fata thotobolong a batla makotikoti le libotlolo tsa polasetiki. Ka le leng ha a ntse a fata, o ile a khahloa ke lingoliloeng tse thehiloeng Bibeleng tse nang le litšoantšo tse ntle tsa batho ba thabileng. O ile a re ka pelong, ‘Kea kholoa ho na le batho ba tjena linaheng tse ling.’ Cristina o ile a khalla ho utloa molaetsa oa lingoliloeng tseo, ka hona a kōpa motho e mong ho mo balla  tsona. Ha a utloa hore lingoliloeng tseo li bua ka litaba tsa bolumeli, o ile a utloa bohloko hore ebe batho ba lahletse lingoliloeng tse buang ka Lentsoe la Molimo thotobolong. O ile a tsoela pele ho ea thotobolong e le hore a thonake libukana, lipampitšana hammoho le limakasine. Tse ling li ne li ntse li felletse, ha tse ling li tabohile. O ile a ithuta ho bala e le hore a tsebe haholoanyane ka lingoliloeng tseo.

 Hamorao Cristina o ile a kopana le Lipaki ’me a qala ho ithuta Bibele le tsona. O ile a thaba haholo ha a hlokomela hore Jehova o mo huletse ho eena ka lingoliloeng tseo ba bang ba neng ba se na taba le tsona. O ea libokeng tsa phutheho ’me kamehla o hlolloa ke seo a ithutang sona. E ’ngoe ea lintho tse mo thabisang le ho feta ke hore hona joale o na le limakasine, libuka le libukana tse ncha. Ha a sa lokela ho ea li batla thotobolong. Ruri Cristina o fumane letlotlo thotobolong!

Thuto ea Bibele e Khanneloa ka Morung

Jeremane: Margret o khanna thuto ea Bibele ka morung

Hoseng ho hong le ho hong Margret o tsamaea le ntja ea hae ha a otlolla maoto morung o mong Jeremane. O re, “Ke leka ho buisana le batho bao ke kopanang le bona tseleng. Haeba ba sa tata, ke bua le bona ka Bibele.”

Ka letsatsi le leng o ile a kopana le nkhono e mong ea lilemo li fetang mashome a supileng ea neng a tsamaea le ntja ea hae. Margret o ile a qalisa moqoqo le nkhono eo. O ile a thabela moqoqo ’me a bolella Margret hore o rapela Molimo ebile o bala Bibele letsatsi le leng le le leng. Ho tloha letsatsing leo, ba ile ba qoqa ka Bibele kamehla. Ka letsatsi le leng nkhono eo o ile a botsa Margret a re: “Ho tla joang hore u tsebe Bibele hakaale?” Margret o ile a mo bolella hore ke Paki ea Jehova.

Ka makhetlo Margret o ile a kōpa nkhono eo hore a ithute Bibele le eena, empa o ne a hana. Leha ho le joalo, ha baa ka ba khaotsa ho qoqa. Ka mor’a likhoeli tse ’maloa, Margret o ile a boela a kōpa ho ithuta Bibele le eena. Lekhetlong lena nkhono eo o ile a bolella Margret hore o tšaba ho ithuta hobane monna eo a lulang le eena o hloile Lipaki Tsa Jehova.

 Lekhetlong le latelang ha Margret a otlolla maoto o ile a nka Bibele le buka ea Seo Bibele e se Rutang. Ha Margret a bona nkhono eo o ile a re: “Letsatsing lena ha ke batle re ithutele lapeng, empa ke batla re ithutele hona mona morung.” O ile a sekisa meokho ’me a lumela ho khanneloa thuto. Nkhono eo o tla ka morung matsatsi a tšeletseng hore ba tl’o bala. Ha pula e na, Margret o khanna thuto ea Bibele a tšoere sekhele a khantšitse toche.

Ba Ile ba Ferekanngoa ke ha a Sisinya Hlooho

Morali’abo rōna ea bitsoang Delphine o ile a ithuta Bibele le Irina oa Bulgaria. Kaha Irina o ne a rata seo a ithutang sona, o ne a ea libokeng kamehla. Leha ho le joalo, monna oa Irina o ne a sa batle ha a buisana le Lipaki. Kahoo, o ile a re ba fallele motsaneng o mong Sweden, eaba Irina ha a sa khona ho buisana le Delphine. Leha ho le joalo, bo-pula-maliboho ba babeli e leng Alexandra le Rebecca, ba ile ba kopana le Irina eo ka nako eo a neng a sa tsebe Seswedishe. Barali bao babo rōna ba ile ba sebelisa bukana ea Good News for People of All Nations ’me ba re Irina a ipalle molaetsa ka Sebulgaria. Ka mor’a moo, ba ile ba mo supisa potso e reng na a ka thabela ho fumana lingoliloeng ka puo ea hae. Irina o ile a sisinya hlooho ka matla. Baralib’abo rōna ba ile ba tsamaea ba nka hore ha a thahaselle.

Ha ba se ba tsamaile Alexandra o ile a hopola hore Linda, e leng morali’abo rōna oa Moswedishe ea sebeletsang Bulgaria, o tl’o ba etela ka mor’a libeke tse ’maloa. O ne a nahana hore Irina a ka ’na a fetola maikutlo ha a utloa ’nete ka Sebulgaria. Ha Linda a fihla, ba ile ba etela Irina. Irina o ile a bolella Linda hore o ne a rapela Jehova bosiu bo bong le bo bong a mo kōpa hore a mo thuse ho fumana motho ea ka mo khannelang thuto ea Bibele. O ne a  atisa ho tsamaea a nkile buka ea hae ea Seo Bibele e se Rutang ea Sebulgaria. O ne a batla ho e bontša Lipaki haeba a ka kopana le tsona seterateng, empa ha ho mohla a ileng a kopana le tsona. Ruri Irina o ile a thaba ha a fumana lingoliloeng tse ling ka Sebulgaria!

Linda o ile a botsa Alexandra hore na ke hobane’ng ha a ile a etsa qeto ea hore Irina ha a thahaselle ha a ne a qala ho kopana le eena. A re Irina o ile a sisinya hlooho ho bontša hore ha a thahaselle. Linda o ile a bososela ’me a hlalosetsa Alexandra hore batho ba Bulgaria ba oma hlooho ha ba hana ntho e itseng ’me ba sisinya hlooho ha ba lumellana le eona. Kaha Irina ha a e-s’o tsebe Seswedishe, o ntse a balloa ka Sebulgaria. Joang? O ile a boela a hokahanngoa le Delphine ’me ba ithuta ba shebane Inthaneteng.

Ntate o Beha Mohlala o Motle

Jemima, ea lulang Spain, o rutiloe ’nete a sa le monyenyane. Leha ho le joalo, ha a le lilemo li supileng bophelo ba hae bo ile ba fetoha. ’Mè oa hae o ile a re ha a sa batla ho ba Paki ea Jehova ’me a hlala ntate oa hae. Ha Jemima a le lilemo li 13 o ile a khaotsa ho kopanela le Lipaki Tsa Jehova ’me a hana ha ntate oa hae a mo thusa moeeng.

Ha Jemima a ntse a hōla e ile ea e-ba setho sa mekhatlo e loanelang litokelo tsa botho. Ka mor’a nako ha a se a sa sebetse, ntate oa hae e leng Domingo o ile a mo fa mosebetsi oa ho penta.

Ka le leng ha ba ntse ba sebetsa, Domingo o ile a ithaopela ho khannela Jemima thuto ea Bibele. O ile a hana, empa a mo tšepisa hore o tla mo tsebisa ha a se a batla ho bala. Domingo o ne a mamela khatiso ea Bibele le limakasine ha a ntse a sebetsa, empa morali oa hae o ne a imamella ’mino oa pop a kentse li-earphone.

 Ka November 2012, Domingo, ea neng a se a nyetse mosali e mong, o ile a mengoa Sekolong sa Bibele sa Banyalani ba Bakreste. Jemima o ile a hlolloa ha a utloa hore ntate oa hae o nyahlatsa ntho e ’ngoe le e ’ngoe ’me o ea sekolong sa Bibele ka likhoeli tse peli ebile ka mor’a moo o ikemiselitse ho ea hohle moo mokhatlo o tla mo romela teng. Jemima o ile a qala ho bona hore ruri ntate oa hae o rata ’nete, ’me a batla ho tseba hore na ho tlile joang.

Jemima o ile a khaotsa ho mamela ’mino oa pop ’me a qala ho mamela likhatiso tseo ntate oa hae a neng a li mamela. O ile a qala ho botsa ntate oa hae lipotso. Ka letsatsi le leng ha Domingo a ntse penta, Jemima o ile a re: “U sa hopola hore ke ne ke re ke tla u joetsa ha ke batla ho ithuta Bibele? Ekare nako eo e fihlile.”

Domingo o ile a thabela ho utloa seo. Ka January 2013, ba ile ba qala ho ithuta habeli ka beke. Le hoja Domingo a ile a ea sekolong ka April, ba ile ba tsoela pele ka thuto ba buisana ba shebane ka Inthanete. Jemima o ile a ea moketeng oa kabo ea mangolo, ’me a khahloa ke lipuo tse ileng tsa fanoa. O ile a kolobetsoa ka la 14 December, 2013.

Jemima o re, “Jehova o ’nile a ’mamella ka nako e telele, ’me kea tseba hore o ntse a nthata. O mphile metsoalle ea sebele e leng seo ke sa kang ka se fumana ka ntle ho phutheho. Setsoalle sa barab’abo rōna lefatšeng ka bophara, se etsa hore ke rate Jehova le ho feta.”

Tlhompho e mo Tsoela Molemo

Ka la 30 March, 2014, Vasilii eo e leng khale a sebeletsa ofising ea lekala e Russia, o ne a ntse a paka ka toroli ea lingoliloeng haufi le ofisi ea lekala ha koloi ea mapolesa e ema pel’a hae. Lepolesa le ile la theoha ka koloing ’me la mo kōpa hore a khaotse mosebetsi oa hae kaha ho na le baahisani ba tletlebang. Lepolesa le leng le ile la hatisa  puisano eo ka video. Vasilii o ile a bona hore ho molemo ho ikokobelletsa mapolesa ao ho e-na le ho tsitlellela litokelong tsa hae. Ha ba ntse ba buisana, batho ba fetang ka tsela ba ile ba ema e le hore ba utloe hore na ho etsahala’ng. Vasilii o ile a tsamaea, empa ka mor’a matsatsi a mabeli a kōpa ho bona mookameli oa sepolesa. O ile a lumelloa ho kopana le eena. A mo leboha ka mosebetsi o tsoileng matsoho oo mapolesa a o etsetsang sechaba, a boela a leboha le ka tsela e mosa eo mapolesa a ileng a buisana le eena ka eona. Mookameli o ile a sheba mothusi oa hae ’me a re, “Lilemong tsena tse 32 tseo ke li qetileng ke le lepolesa ke qala ho utloa motho ea re lebohang ka mosebetsi oo re o etsang!” Ha ba ntse ba buisana Vasilli o ile a hlalosetsa mookameli hore mosebetsi oa rōna oa ho bolela litaba tse molemo hase tlōlo ea molao. Mookameli o ile a botsa Vasilii hore na ke hobane’ng ha a sa ka a hana ha mapolesa a re a khaotse ho etsa mosebetsi oa hae empa a tseba hore hase tlōlo ea molao. Vasilii o ile a re: “Ke hlompha mapolesa. Ke nahana hore e ne e tla ba ntho e mpe haeba ke ne nka qosa mapolesa ka pel’a batho ka hore ha a tsebe molao.” Taba ena e ile ea khahla mookameli oa mapolesa le mothusi oa hae hoo ba ileng ba tiisetsa Vasilii hore ha ho sa tla ba le lepolesa le tla mo tšoenya ha a paka ka toroli ea hae ea lingoliloeng.