Fetela boitsebisong

Fetela lethathamong la tse ka hare

 DOMINICAN REPUBLIC

Tšisinyeho ea Lefatše Haiti

Tšisinyeho ea Lefatše Haiti

Tšimo ea Sechaena ea Hōla

Ka 2005, ofisi ea lekala e ile ea khetha mor’abo rōna Tin Wa Ng ea buang Sechaena eo e neng e le setho sa lelapa la Bethele hore e be pula-maliboho ea khethehileng e le hore a bolelle Machaena a Dominican Republic litaba tse molemo. O hlahetse Dominican Republic ’me a hōlela teng. Batsoali ba hae ba ile ba fallela Santo Domingo ba tsoa China.

Ka la 1 January, 2008, ho ile ha thehoa phutheho ea Sechaena Santo Domingo, ’me ka 2011 ha thehoa sehlopha Santiago. Bahoeletsi ba 70 ho akarelletsa bo-pula-maliboho ba kamehla ba 36 hammoho le bo-pula-maliboho ba  thusang ba ’maloa, ba ile ba khanna lithuto tse ka bang 76 khoeli le khoeli.

Ho Batla Batho ba Buang Senyesemane

Ka 2007, ho ne ho e-na le bahoeletsi ba 27 466 ba kopanelang boboleling liphuthehong tse 376, ’me ba khanna lithuto tsa Bibele tse 49 795. Leha ho le joalo, ho ne ho se na phutheho eo batho ba buang Senyesemane ba ka kopanelang ho eona. Ka hona, ka April 2008, ofisi ea lekala e ile ea romela banyalani ba baromuoa e leng Donald le Jayne Elwell, Santo Domingo e le hore ba thehe sehlopha sa Senyesemane. Bahoeletsi ba ile ba etsa phuputso ea hore na boholo ba batho ba buang Senyesemane ba lula hokae. Ba ile ba hlophisa tšimo eo hantle e le hore ba e akaretse.

Ka lebaka la boikitlaetso boo, sehlopha sa Senyesemane se ile sa hōla Santo Domingo, ’me ka July 2009 ha thehoa phutheho ea bahoeletsi ba 39. Ho ile ha batloa batho ba buang Senyesemane le libakeng tse ling ho pholletsa le naha eohle. Ka November 2011, ho ne ho e-na le liphutheho tsa Senyesemane tse supileng le sehlopha se le seng Dominican Republic.

’Mè ea Nang le Bokooa ba Pono le ba Kutlo o Emela ’Nete

Pula-maliboho ea khethehileng o buisana le Lorys ka puo ea matsoho

Lorys, ea neng a e-na le boloetse bo etsang hore a se ke a utloa le ho bona o hōtse e le khutsana. O hlahile a sa utloe ’me a ba le bokooa ba pono ha a le lilemo li 16. O bona hanyenyane motšehare, empa bosiu ha a bone ho hang. Oa phopholetsa e le hore a buisane le batho ba bang ha ho le lefifi.

Banyalani ba bo-pula-maliboho ba khethehileng ba kōpane le Lorys ha a le lilemo li 23. Ka nako eo, o ne a lula le monna ea nang le bokooa ba kutlo hammoho le morali  oa bona ea nang le selemo empa a se na bokooa. Lorys o ile a lumela ha a memeloa ho ea libokeng ’me a hlolloa ke seo a ileng a ithuta sona.

O ile a etsa liphetoho hang-hang. Ka mohlala, ha a ithuta hore ho fosahetse ho lula le monna ba sa nyalana ka molao, o ile a mo hlalosetsa hore ba lokela ho ngolisa lenyalo la bona le hore a ke ke a iphapanyetsa melao ea Bibele tabeng eo. Monna oa hae o ile a makatsoa ke kamoo  Lorys a itlhalosang ka ho hlaka kateng, ’me a lumela hore ba ngolise lenyalo ka molao.

Ka mor’a hore ba ngolise lenyalo, Lorys e ile ea e-ba mohoeletsi, ’me ho e-s’o ee kae a kolobetsoa. Ha Lipaki li ntse li mo khannela thuto ea Bibele, o ile a ithuta Puo ea Matsoho ea America (ASL). O ’nile a thusa morali oa hae ho ithuta puo ea matsoho, hape o mo ruta Bibele.

Tšisinyeho e Mpe ea Lefatše Haiti

Baahi ba Dominican Republic le ba Haiti ba ke ke ba lebala Labobeli la la 12 January , 2010. Leo ke letsatsi leo ka lona ho ileng ha e-ba le tšisinyeho e mpe ea lefatše Haiti. Hang-hang Sehlopha se Busang se ile sa kōpa lekala la Dominican Republic hore le fe lekala la Haiti chelete ea liphallelo. Kaha chelete e neng e lokela ho romeloa e ne e le ngata, ho ile ha kōptjoa mor’abo rōna Evan Batista oa seqhenqhahali eo e neng e le ngaka Bethele hore a e ise.

 E ne e le qeto e ntle ho roma Mor’abo rōna Batista, kaha ha a fihla lelibohong o ile a bolelloa hore ho na le tlhokahalo e khōlō ea lingaka Haiti. Mahlatsipa a tsoileng likotsi tse mpe a ne a tlisoa Holong ea Kopano e haufi le ofisi ea lekala ea Haiti hore ba fuoe thuso ea bongaka. Ha barab’abo rōna ba Haiti ba utloa hore Mor’abo rōna Batista ke ngaka, ba ile ba letsetsa ofisi ea lekala ea Dominican Republic ba kōpa hore a lule Haiti. Ntle ho pelaelo o ile a lumelloa, ’me hang-hang a kena khabong ho thusa barab’abo rōna.

Barab’abo rōna ba ile ba phalla ka mor’a tšisinyeho ea lefatše ea Haiti ka 2010

Lefapha la ho Reka la Bethele ea Dominican Republic le ile la letsetsa bo-rakhoebo ba eeng ba le rekisetse lijo. Kahoo, ba ile ba atleha ho reka lijo tsa boima ba lik’hilograma tse ka holimo ho 6 800, tse akarelletsang raese, linaoa le lijo tse ling tse tloaelehileng ’me tsa fihla Haiti ka 2:30 hoseng ka Labone la la 14 January, ’me ho bonahala hore ke tsona liphallelo tsa pele tse ileng tsa fihla lelibohong. Hamorao letsatsing leo, lingaka tse ling tse tharo tse tsoang Dominican Republic li ile tsa nka leeto la lihora tse supileng ho ea fihla ofising ea lekala ea Haiti. Letsatsi le ne le se le sekame ha ba fihla lekaleng, empa ho e-na le hore ba e’o phomola, ba ile ba kena khabong ho thusa batho ba lemetseng ho fihlela ka khitla. Letsatsing le latelang, ho ile ha fihla lingaka tse ling tse ’nè le baoki ba bane ba tsoang Dominican Republic. Batho ba ne ba buuoa tlas’a maemo a sa jeseng litheohelang kaha ho ne ho sebelisoa phaposi ea hloma-o-hlomole e neng e entsoe Holong ea Kopano. Baithaopi bana ba 12 ba ile ba thusa mahlatsipa a 300 bekeng eo feela.

Batho ba lemetseng hampe ba ne ba romeloa Dominican Republic. Ka linako tse ling, likoloi tse tlisitseng liphallelo li ne li lokela ho potlakisetsa bakuli litsing tsa bophelo tse Dominican Republic. Ofisi ea lekala e ile ea  hlophisa hore ho be le Lihlopha Tse Etelang Bakuli e le hore li ba khothatse le hore li netefatse hore ba fumana meriana le lintho tse ling tseo ba li hlokang. Liphutheho tse haufi li ile tsa fa batho ba neng ba felehelitse mahlatsipa bolulo le lijo.

Lipaki Tsa Jehova li ile tsa aba thepa e ka holimo ho lik’hilograma tse 450 000 ho akarelletsa le lijo tse ngata

Boitelo le boikitlaetso bo ileng ba bontšoa ke bahlanka ba Jehova ka mor’a tlokotsi ena, bo ile ba tiisa mantsoe a khothatsang a lengolong la Liproverbia 17:17, a reng: “Motsoalle oa ’nete o lerato ka linako tsohle, ’me ke mor’abo motho ea tsoaletsoeng ha ho e-na le mahlomola.” Ho na le liphihlelo tse ngata tse bontšang kamoo Jehova a ’nileng a sebelisa moea oa hae kapa barab’abo rōna ho tšehetsa bahlanka ba hae ba tšepahalang esita le ha ba tobane le lefu. Letšolo le matla la ho thusa mahlatsipa le ile la tsoela pele ka likhoeli tse ’maloa. Lipaki Tsa Jehova li ile tsa aba thepa e ka holimo ho lik’hilograma tse 450 000 ho akarelletsa le lijo tse ngata. Bara le barali babo rōna ba ka bang 78 bao e leng litsebi litabeng tsa bophelo hammoho le baithaopi ba bang ba ile ba ithaopela ho thusa. *

^ ser. 1 E le hore o fumane tlaleho e feletseng ea kamoo Lipaki li ileng tsa ithaopela ho thusa koluoeng ea Haiti, sheba Tsoha! ea December 2010 leqhepheng la 14-19