Fetela boitsebisong

Fetela lethathamong la tse ka hare

 DOMINICAN REPUBLIC

Re Ile ra Fumana Tokoloho, Eaba re Thibeloa Hape

Re Ile ra Fumana Tokoloho, Eaba re Thibeloa Hape

Re Fumana Tokoloho re sa Lebella

Manuel Hierrezuelo o ile a bolaoa nakong ea ha ba boholong ba ntse ba mo hloma lipotso

Lennart le Virginia Johnson hammoho le Roy le Juanita Brandt ba ile ba tsoela pele ka kabelo ea boromuoa nakong eo e boima ea ha mosebetsi o thibetsoe. Lennart o re: “’Na le Roy Brandt re ile ra bitsoa ke ba boholong ’musong oa Trujillo hore re e’o hlongoa lipotso. Ba ne ba ile ba bitsa Mor’abo rōna Manuel Hierrezuelo pejana.” Ka masoabi o ile a bolaoa nakong ea ha a hlongoa lipotso, ’me seo se bontša hore o ile a tšepahala ho fihlela qetellong. Ho ile ha etsahala’ng ka Lennart le Roy? Lennart o tsoela pele o re: “E mong le e mong o ile a hlongoa lipotso moo a leng mong, ’me mohlomong likarabo tsa rōna li ne li hatisoa. Ha ho letho le ileng la etsahala hang ka mor’a moo, empa likhoeli tse peli hamorao likoranta li ile tsa phatlalatsa hore ’muso o lokolla Lipaki Tsa Jehova hore li tsoele pele ka mosebetsi oa tsona.”

Pele re thibeloa ka 1950, ho ne ho e-na le bahoeletsi ba 261 ba neng ba kopanela mosebetsing oa boboleli Dominican Republic. Ha re fumana tokoloho ka August 1956, ho ne ho se ho e-na le bahoeletsi ba 522. Ka mor’a lilemo tse tšeletseng ba koaletsoe, ba thibetsoe le ho behoa leihlo, barab’abo rōna ba ile ba thaba kaha joale ba ne ba tla etsa mosebetsi oa bona ka bolokolohi.

Barab’abo rōna ba ile ba etsa’ng ha ba lokolloa ka tsela ee ea mohlolo? Ba ile ba qala ho hlophisa mosebetsi ka ho panya ha leihlo! Ba ile ba batla libaka tseo liphutheho li ka kopanelang ho tsona ba ba etsa limmapa tsa tšimo le lifaele tse ncha tsa phutheho. Barab’abo rōna ba ile ba thaba ha ba fumana lingoliloeng. Ba ile ba bontša hore  ba thabetse bolokolohi ka hore ba ithukhubetse mosebetsing oa boboleli. Ka hona, ka November 1956 e leng likhoeli tse tharo feela hamorao, ho ne ho se ho e-na le bahoeletsi ba 612 ba kopanelang mosebetsing oa boboleli.

Baruti ba Etsa ’Momori Khahlanong le Rōna

Lengolo la Toledano le khothalletsang ’muso hore o se ke oa lumella lingoliloeng tsa rōna ho kena ka har’a naha

Baruti ba K’hatholike ba ile ba qala ho etsa ’momori oa ho senya Lipaki lebitso. Ba ile ba sebelisa selekane seo Mopapa a se saenneng le Trujillo ho susumetsa ’muso ho leka ho felisa Lipaki. Moruti oa K’hatholike e leng Oscar Robles Toledano o ile a ngolla Mongoli oa Tsa Lehae, Virgilio Álvarez Pina, a kōpa hore ’muso o mo tšehetse boitekong ba hae ba “ho hlokomelisa baahi ba Dominican Republic hore Lipaki Tsa Jehova ke lequloana le kotsi.”

Toledano o ile a re o ikemiselitse kahohle “ho felisa letšolo la Lipaki Tsa Jehova la ho sokolla batho.” Lengolo la Toledano le ile la boela la khothalletsa ’muso hore o se ke  oa lumella lingoliloeng tsa rōna ho kena ka har’a naha, “haholo-holo buka ea ‘’Nete E Tla Le Lokolla’ le makasine ea Molula-Qhooa.”

Re Thibeloa Hape

Ba bang ba bahlanka ba ’muso oa Trujillo ba ile ba thusa baeta-pele ba bolumeli ho loha leano la ho hlasela Lipaki. Mopresidente oa mokha oa lipolotiki o bitsoang Dominican Party e leng Francisco Prats-Ramírez, o ile a ngolla Trujillo ka June 1957, a re: “Ke rera ho tšoara matšolo a ’maloa a hore Lipaki Tsa Jehova li thibeloe kaha li kotsi ebile ha li rate naha.”

Letšolo lena la ho senya Lipaki lebitso le ile la atleha hang-hang, ’me ha buka e bitsoang Trujillo—Little Caesar of the Caribbean e bua ka lona e re: “Hlabula ka 1957 likoranta tsa Dominican Republic li ile tsa phatlalatsa letoto la lihlooho tse ngotsoeng ke liofisiri tse phahameng ’musong li qosa Lipaki Tsa Jehova ka liketso tse ‘kotsi le tse hlohlelletsang bofetoheli.’ Ho ile ha senyeha le ho feta mohla moruti oa Mojesuite e leng Mariano Vásquez Sanz a ne a bua ka Lipaki seea-le-moeeng sa Trujillo se bitsoang La Voz Dominicana, a re li sebeletsa Makomonisi ’me ke ‘mahlaba-phio, lira tse lonya, linonnori ebile ke litlokotsebe.’ Kapele ka mor’a moo, Moarekabishopo Ricardo Pittini le Moarekabishopo Octavio Antonio Beras ba ile ba ngolla baruti ba likereke hore ba sireletse phutheho khahlanong le ‘bakhelohi bana ba khopo.’”

’Momori oo oa baruti le bahlanka ba ’muso o ile oa atleha. Ka July, lekhotla le etsang molao la Dominican Republic le ile la fetisa molao oa ho thibela Lipaki Tsa Jehova. Nakoana ka mor’a moo, barab’abo rōna ba ile ba otloa le ho hlokofatsoa ka sehlōhō ke mapolesa. Barab’abo rōna ba ka bang 150 ba ile ba tšoaroa.