Fetela boitsebisong

Fetela lethathamong la tse ka hare

 DOMINICAN REPUBLIC

Motho oa Pele ea Nang le Bokooa ba Kutlo ea Ileng a Amohela ’Nete

José Pérez

Motho oa Pele ea Nang le Bokooa ba Kutlo ea Ileng a Amohela ’Nete
  • O HLAHILE KA 1960

  • O KOLOBELITSOE KA 1982

  • PALE EA BOPHELO BA HAE José o ile a khahloa ke ’nete ka lebaka la lerato la barab’abo rōna, le hoja ba ne ba sa tsebe puo ea matsoho.

HA KE sa le moshanyana ke ile ka ba le bokooa ba kutlo ’me ka ithuta puo ea matsoho sekolong. Ke qalile ho utloa ’nete ha ke le lilemo li 11, ha lelapa le leng la Lipaki le ’memela libokeng. Le hoja ke sa ka ka utloa letho, ke ile ka amoheloa ka mofuthu ’me ka etsa qeto ea hore ke tla tsoela pele ho ea libokeng. Lipaki tse ngata li ne li ’memela lijong le liketsahalong tse ling.

Ke ile ka ba mohoeletsi ka 1982, ’me ka kolobetsoa hona selemong seo. Ka 1984 ka nyala Eva, eo le eena a nang le bokooa ba kutlo. Le hoja re ne re sa utloisise linnete tse itseng tsa Bibele hantle, re ile ra bona hore ona ke mokhatlo oa Jehova ka lebaka la lerato e leng letšoao le o khethollang ’me ra thabela ho ba ka phuthehong.—Johanne 13:35.

Ka 1992 ho ile ha lokisetsoa hore bara le barali babo rōna ba itseng ba rutoe Puo ea Matsoho ea Amerika. Ho e-s’o ee  kae, bahoeletsi bana ba ne ba se ba fumane batho ba nang le bokooa ba kutlo ’me ba ba bolella litaba tse molemo. Eaba ka 1994, mosebetsi oa boboleli o tsoela pele ka sekhahla tšimong ea puo ea matsoho ha banyalani ba tsoang Puerto Rico ba isoa lekaleng ho ea ruta bara le barali babo rōna ba 25 puo ea matsoho.

Ho ella qetellong ea selemo seo, ’na le Eva re ile ra qala ho ea libokeng tsa sehlopha sa puo ea matsoho se neng se sa tsoa thehoa. E bile ka mor’a ho ea libokeng tsena tsa puo ea matsoho moo re ileng ra qala ho utloisisa ka ho feletseng lithuto tsa Bibele tse kang, kamoo Satane a phephetsang bobusi ba Jehova kateng le hore na ’Muso oa Bomesia o phetha karolo efe morerong oa Molimo.

Ka la 1 December, 1995, ho ile ha thehoa liphutheho tsa Puo ea Matsoho ea Amerika motseng oa Santo Domingo le oa Santiago. Ka August 2014, ho ne ho se ho e-na le liphutheho tsa puo ea matsoho tse 26 le lihlopha tse 18.

’Na le Eva re ile ra ruta bana ba rōna ba bararo puo ea matsoho. Éber, e leng mora oa rōna oa letsibolo, o sebetsa lefapheng la phetolelo ea puo ea matsoho lekaleng la United States. Ke mohlanka ea sebeletsang, Eva eena ke pula-maliboho oa kamehla.