Fetela boitsebisong

Fetela lethathamong la tse ka hare

Pale ea 65: ’Muso oa Aroloa

Pale ea 65: ’Muso oa Aroloa

NA U tseba lebaka leo monna eo a tabolang seaparo sa hae ka lona? Jehova o mo laetse ho etsa joalo. Monna enoa ke moprofeta oa Molimo Akija. Na ua tseba hore moprofeta ke’ng? Ke motho eo Molimo a mo bolellang se tla etsahala pele ho nako.

Akija le Jeroboame

Mona Akija o bua le Jeroboame. Jeroboame ke monna eo Solomone a neng a mo behile hore a hlokomele mosebetsi o mong oa kaho. Ha Akija a kopana le Jeroboame tseleng mona, Akija o etsa ntho e makatsang. O hlobola seaparo se secha seo a se apereng ’me o se tabola likotoana tse 12. O re ho Jeroboame: ‘Inkele likotoana tse 10.’ Na u tseba lebaka la hore Akija a fe Jeroboame likotoana tse 10?

Akija o hlalosa hore Jehova o tlil’o amoha Solomone ’muso. O re Jehova o tlil’o fa Jeroboame meloko e 10. Hona ho bolela hore Roboame mor’a Solomone o tla salloa ke ho busa meloko e ’meli feela.

Ha Solomone a utloa seo Akija a se boleletseng Jeroboame, o halefa haholo. O leka ho bolaea Jeroboame. Empa Jeroboame o balehela Egepeta. Ka mor’a nakoana, Solomone oa shoa. E bile morena ka lilemo tse 40, empa joale ho behoa Roboame mor’a hae hore e be morena. Jeroboame o utloela a le Egepeta hore Solomone o shoele, kahoo o khutlela Iseraele.

Roboame hase morena ea molemo. O tšoara batho ka sehlōhō le ho feta ntat’ae Solomone. Jeroboame le banna ba bang ba bohlokoa ba ea ho Morena Roboame ’me ba re a buse batho hantle. Empa Roboame ha a mamele. Ha e le hantle, o ba tšoara ka sehlōhō le ho feta pele. Kahoo batho ba etsa Jeroboame morena oa meloko e 10, empa Roboame o tsoela pele a busa meloko e ’meli e leng oa Benjamine le oa Juda.

Jeroboame ha a batle ha batho ba hae ba ea Jerusalema ho ea rapela tempeleng ea Jehova. Kahoo o etsa manamane a mabeli a khauta ’me o re batho ba ’muso oa meloko e 10 ba a rapele. Kapele naha e tlala bokebekoa le pefo.

Ho boetse ho na le khathatso ’musong oa meloko e ’meli. Le pele ho feta lilemo tse hlano Roboame e le morena, morena oa Egepeta oa tla ’me o loantša Jerusalema. O nka matlotlo a mangata tempeleng ea Jehova. Kahoo tempele e qeta nako e khutšoanyane feela e le boemong ba eona ba pele.

1 Marena 11:26-43; 12:1-33; 14:21-31.



Lipotso

  • Banna ba babeli ba setšoantšong moo ke bo-mang, hona u ka ba hlalosa joang?
  • Akija o etsa’ng ka seaparo seo a se apereng, hona seo se bolela’ng?
  • Solomone o leka ho etsa’ng ka Jeroboame?
  • Ke hobane’ng ha batho ba etsa Jeroboame morena oa meloko e leshome?
  • Ke hobane’ng ha Jeroboame a etsa manamane a mabeli a khauta, hona ho etsahala’ng naheng nakoana ka mor’a moo?
  • Ho etsahala’ng ka ’muso oa meloko e ’meli le tempele ea Jehova e Jerusalema?

Lipotso tse ling