Fetela boitsebisong

Fetela lethathamong la tse ka hare

Pale ea 49: Letsatsi le Ema Tsi!

Pale ea 49: Letsatsi le Ema Tsi!

AK’U shebe Joshua. O re: ‘Letsatsi, ema!’ ’Me letsatsi le hlile le ema tsi! Le ema hona moo har’a sepakapaka motšehare oohle. Ke Jehova ea etsang hore le eme! Empa a re bone hore na ke hobane’ng ha Joshua a batla hore letsatsi le ’ne le chabe.

Letsatsi

Ha marena a mahlano a mabe a naha ea Kanana a qala ho loantša Bagibeone, Bagibeone ba romela motho ho ea kōpa thuso ho Joshua. O re: ‘Tloo ho rōna kapele! Re pholose! Marena ’ohle a sebaka se ka thōko se maralla a tlile ho tla loantša bahlanka ba hao.’

Hang-hang Joshua le banna bohle ba hae ba ntoa baa tsamaea. Ba tsamaea bosiu kaofela. Ha ba fihla Gibeone, masole a marena a mahlano aa tšoha ’me a qala ho baleha. Joale Jehova o nesa sefako se seholo, ’me se bolaea masole a mangata ho feta a bolailoeng ke banna ba ntoa ba Joshua.

Joshua

Joshua oa bona hore letsatsi le tla tloha le likela. Ho tla ba lefifi, ’me masole a mangata a marena a mahlano a mabe a tla baleha. Ke ka lebaka leo Joshua a rapelang Jehova a reng: ‘Letsatsi, ema!’ ’Me ha letsatsi le ntse le khanya, Baiseraele ba khona ho phetha tlhōlo ea bona ntoeng.

Ho na le marena a mang a mangata a mabe Kanana a hloileng batho ba Molimo. Joshua le banna ba lebothong la hae ba nka lilemo tse ka bang tšelela hore ba hlōle marena a 31 a naha eo. Ha ba se ba a hlōtse, Joshua o etsa bonnete ba hore naha ea Kanana e aroleloa meloko e sa ntseng e hloka naha.

Ho feta lilemo tse ngata, ’me qetellong Joshua o shoa a le lilemo li 110. Ha Joshua le metsoalle ea hae ba ntse ba phela, batho ba mamela Jehova. Empa ha banna bana ba molemo ba e-shoa, batho ba qala ho etsa lintho tse mpe ’me ba kena khathatsong. Ruri ba hloka thuso ea Molimo nakong ena.

Joshua 10:6-15; 12:7-24; 14:1-5; Baahloli 2:8-13.



Lipotso

  • Moo setšoantšong, Joshua o re’ng, hona hobane’ng?
  • Jehova o thusa Joshua le banna ba hae ba loanang joang?
  • Joshua o hlōla marena a makae a lireng, hona o nka nako e kae ho a hlōla?
  • Ke hobane’ng ha Joshua a arola naha ea Kanana?
  • Joshua o ne a le lilemo li kae ha a shoa, hona ho etsahala’ng ka sechaba ka mor’a moo?

Lipotso tse ling