Fetela boitsebisong

Fetela lethathamong la tse ka hare

Pale ea 36: Namane ea Khauta

Pale ea 36: Namane ea Khauta

JO, JO! Batho ba etsa’ng joale? Ba rapela namane! Ke hobane’ng ha ba etsa joalo?

Ha Moshe a lula nako e telele thabeng, batho ba re: ‘Ha re tsebe se etsahetseng ka Moshe. A re iketsetseng molimo ea tla re ntša naheng ena.’

Moshe o lahlela majoe a mabeli fatše

Moholoane oa Moshe, Arone, o re: ‘Ho lokile. Rōlang masale a lōna a khauta le a tlise ho ’na.’ Ha batho ba etsa joalo, Arone oa a qhibilisa ’me o a etsa namane ea khauta. Batho ba re: ‘Enoa ke Molimo oa rōna, ea re ntšitseng Egepeta!’ Joale Baiseraele ba etsa mokete o moholo, ba rapela namane ea khauta.

Ha Jehova a bona sena, o halefa haholo. Joale o re ho Moshe: ‘Theoha ka potlako. Batho ba etsa ntho e mpe haholo. Ba lebetse melao ea ka ’me ba khumamela namane ea khauta.’

Batho ba rapela namane ea khauta

Moshe o theoha ka potlako thabeng. Ha a atamela, ke sona seo a se bonang sena. Batho baa bina le ho hobela ba pota-potile namane ea khauta! Moshe o halefile hoo a lahlelang fatše majoe a mabeli a nang le melao, ’me a pshatleha likotoana tse ngata. O nka namane ea khauta oa e qhibilisa. Joale o e sila hore e be phofo.

Batho ba entse ntho e mpe haholo. Joale Moshe o bolella banna ba bang hore ba nke lisabole tsa bona. Moshe o re: ‘Batho bohle ba babe ba rapetseng namane ea khauta ba tlameha ho shoa.’ Joale banna bao ba bolaea batho ba 3 000! Na see ha se bontše hore re lokela ho ba hlokolosi hore re rapele Jehova feela, eseng melimo leha e le efe ea bohata?

Exoda 32:1-35.



Lipotso

  • Moo setšoantšong, batho ba etsa’ng, hona hobane’ng?
  • Ke hobane’ng ha Jehova a halefile, hona Moshe o etsa’ng ha a bona seo batho ba se etsang?
  • Moshe o bolella banna ba bang hore ba etse’ng?
  • Pale ee e lokela ho re ruta eng?

Lipotso tse ling