Fetela boitsebisong

Fetela lethathamong la tse ka hare

Pale ea 27: Ho Busa Morena e Mobe Egepeta

Pale ea 27: Ho Busa Morena e Mobe Egepeta

BANNA bana ba qobella batho ho sebetsa. Bona monna ea shapang e mong oa basebetsi ka sephali! Basebetsi ke ba lelapa la Jakobo, ’me ba bitsoa Baiseraele. ’Me banna ba ba qobellang ho sebetsa ke Baegepeta. Baiseraele e se e le makhoba a Baegepeta. Ho tlile joang hore e be makhoba?

Baegepeta ba sotla Baiseraele

E se e le lilemo tse ngata joale lelapa le leholo la Jakobo le lutse Egepeta ka khotso. Le ne le hlokometsoe ke Josefa, eo e neng e le motho oa bohlokoa ka ho fetisisa Egepeta a hlahlama morena Faro ka boholo. Empa joale Josefa o se a shoele. ’Me morena oa Egepeta e ba Faro e mocha, ea sa rateng Baiseraele.

Joale Faro enoa e mobe a etsa Baiseraele makhoba. ’Me o re batho ba khopo le ba sehlōhō ba ba fe mosebetsi. Batho bao ba qobella Baiseraele ho sebetsa ka thata ba hahela Faro metse. Empa Baiseraele ba ’na ba ngatafala. Ha nako e ntse e feta, Baegepeta ba tšoha hore Baiseraele ba tla ba bangata haholo, ba be matla ho ba feta.

Baegepeta ba sotla Baiseraele

Na ua tseba hore na joale Faro o etsa’ng? O re ho basali ba neng ba thusa basali ba Baiseraele ha ba ba le bana: ‘Le bolaee bana bohle ba bashemane ba tsoaloang.’ Empa basali bao ba molemo, ’me ha ba bolaee bana bao.

Joale Faro o laela batho bohle ba hae o re: ‘Nkang masea a bashemane a Baiseraele le a bolaee. A banana ’ona le se ke la a bolaea.’ Na hase taelo e tšabehang ee eo a fanang ka eona? A re bone kamoo lesea le leng la moshemane le ileng la bolokoa kateng.

Exoda 1:6-22.



Lipotso

  • Moo setšoantšong, monna eo ea nkileng sephali ke mang, hona o shapa mang?
  • Ho ile ha etsahala’ng ka Baiseraele ka mor’a lefu la Josefa?
  • Ke hobane’ng ha Baegepeta ba ile ba tšosoa ke Baiseraele?
  • Faro o ile a laela basali ba neng ba thusa basali ba Baiseraele ha ba ba le bana hore ba etse eng?

Lipotso tse ling