Fetela boitsebisong

Fetela lethathamong la tse ka hare

Pale ea 1: Molimo o Qala ho Etsa Lintho

Pale ea 1: Molimo o Qala ho Etsa Lintho

LINTHO tsohle tse ntle tseo re nang le tsona li tsoa ho Molimo. O re file letsatsi hore le re bonesetse motšehare ’me bosiu re bona ka khoeli le linaleli. Molimo o re etselitse lefatše e le hore re phele ho lona.

Empa Molimo ha aa qala ka ho etsa letsatsi, khoeli le linaleli. Na ua tseba hore na o qalile ka eng? Molimo o qalile ka ho etsa batho ba tšoanang le eena. Batho bana ha re khone ho ba bona, feela joalokaha re ke ke ra bona Molimo. Batho bana ba bitsoa mangeloi ka Bibeleng. Molimo o etselitse mangeloi hore a phele le eena leholimong.

Lengeloi la pele leo Molimo a le entseng e bile le ikhethang haholo. Ke Mora oa Molimo oa letsibolo, ’me o ne a sebetsa le Ntate oa hae. O ile a thusa Molimo ho etsa lintho tse ling tsohle. O thusitse Molimo ho etsa letsatsi, khoeli, linaleli le lefatše la rōna.

Lefatše le ne le le joang ka nako eo? Qalong ho ne ho se na motho ea ka phelang lefatšeng. Le ne le koahetsoe ke metsi hohle. Empa Molimo o ne a batla hore batho ba phele lefatšeng. Eaba o qala ho re lokisetsa lona. O ile a etsa’ng?

Pele ho tsohle ho ne ho hlokahala leseli lefatšeng. Eaba Molimo o etsa hore khanya ea letsatsi e bonese lefatšeng. A etsa hore ho be teng bosiu le motšehare. Ka mor’a moo Molimo a nyolla lefatše metsing a leoatle.

Qalong ho ne ho se na mobu. Ho ne ho tšoana le moo setšoantšong. Ho ne ho se na lipalesa kapa lifate kapa liphoofolo. Ho se na le litlhapi leoatleng. Molimo o ile a lokela ho etsa mosebetsi o mongata e le hore a ntlafatse lefatše e le hore batho le liphoofolo ba phele ho lona.

Jeremia 10:12; Bakolose 1:15-17; Genese 1:1-10.

Naha e se nang limela


Lipotso

  • Lintho tsohle tse ntle li tsoa hokae, hona na u ka etsa mohlala?
  • Ntho ea pele eo Molimo a e bōpileng ke eng?
  • Ke hobane’ng ha lengeloi la pele e bile le ikhethang haholo?
  • Hlalosa hore na lefatše le ne le le joang tšimolohong. (Bona setšoantšo.)
  • Molimo o ile a etsa’ng ha a qala ho lokisetsa batho le liphoofolo lefatše?

Lipotso tse ling