Fetela boitsebisong

Fetela lethathamong la tse ka hare

 KHAOLO EA 16

“U Sebelise Toka” ha U Tsamaea le Molimo

“U Sebelise Toka” ha U Tsamaea le Molimo

1-3. (a) Ke hobane’ng ha re kolota Jehova? (b) Ke’ng seo Mopholosi oa rōna ea lerato a se batlang ho rōna?

AK’U nahane u qabeletsoe ka sekepeng se tebang. Hang ha u qala ho felloa ke tšepo, ho fihla mosebeletsi oa pholoso ’me o u isa moo ho sireletsehileng. U utloa ho bile hore kokololo! ha mosebeletsi eo oa pholoso a u tlosa kotsing ’me a re: “U sireletsehile joale”! Na u ne u ke ke ua ikutloa u kolota motho eo ho hong? Ha e le hantle, u ne u tla be u mo kolota bophelo ba hao.

2 Ka tsela e itseng, sena se bontša seo Jehova a re etselitseng sona. Ha e le hantle rea mo kolota. Etsoe o fane ka thekollo, a re nolofalletsa ho pholosoa litleneng tsa sebe le lefu. Re ikutloa re sireletsehile ha re tseba hore hafeela re bontša tumelo sehlabelong seo sa bohlokoa, libe tsa rōna lia tšoareloa, ’me bokamoso ba rōna ba ka ho sa feleng bo sireletsehile. (1 Johanne 1:7; 4:9) Joalokaha re bone Khaolong ea 14, thekollo ke ponahatso e phahameng ka ho fetisisa ea lerato la Jehova le toka ea hae. Re lokela ho arabela joang?

3 Ke ho loketseng hore re hlahlobe seo Mopholosi oa rōna ea lerato a se batlang ho rōna. Jehova o re ka moprofeta Mikea: “Uena motho oa lefatše, o u boleletse se molemo. Jehova o batla eng ho uena haese hore u sebelise toka u rate mosa ’me u inyenyefatse ha u tsamaea le Molimo oa hao?” (Mikea 6:8) Hlokomela hore e ’ngoe ea lintho tseo Jehova a li batlang ho rōna ke hore re “sebelise toka.” Re ka e sebelisa joang?

Ho Phehella ‘ho Loka ha ’Nete’

4. Re tseba joang hore Jehova o lebeletse hore re phele ka tsela e lumellanang le litekanyetso tsa hae tse lokileng?

4 Jehova o lebeletse hore re phele ka litekanyetso tsa hae tsa se nepahetseng le se fosahetseng. Kaha litekanyetso tsa hae ha  li na leeme ebile li lokile, re phehella toka le ho loka ha re ipapisa le tsona. Esaia 1:17 e re: “Ithuteng ho etsa se molemo; batlang toka.” Lentsoe la Molimo le re phehella hore re ‘batle ho loka.’ (Sofonia 2:3) Le boetse le re khothalletsa hore re “apare botho bo bocha bo ileng ba bōptjoa ho ea ka thato ea Molimo ho lokeng ha ’nete.” (Baefese 4:24) Ho loka ha ’nete, e leng toka ea ’nete—ho sesefa pefo, ho se hloeke le boitšoaro bo hlephileng, kaha lintho tsena li silafatsa se halalelang.—Pesaleme ea 11:5; Baefese 5:3-5.

5, 6. (a) Ke hobane’ng ha ho phela ka litekanyetso tsa Jehova e se moroalo ho rōna? (b) Bibele e bontša joang hore ho phehella ho loka ke khato e tsoelang pele?

5 Na ho phela ka litekanyetso tsa Jehova tse lokileng ke moroalo ho rōna? Che. Motho eo pelo ea hae e leng haufi le Jehova ha a fumane seo a se hlokang se le boima. Kaha re rata Molimo oa rōna le sohle seo a se emelang, re batla ho phela ka tsela e mo thabisang. (1 Johanne 5:3) Hopola hore Jehova “o rata liketso tse lokileng.” (Pesaleme ea 11:7) Haeba re tla fela re etsise toka ea Molimo, kapa ho loka ha hae, re tlameha ho hlaolela ho rata seo Jehova a se ratang le ho hloea seo a se hloileng.—Pesaleme ea 97:10.

6 Ha ho bonolo hore batho ba sa phethahalang ba phehelle ho loka. Re lokela ho hlobola botho ba khale le litloaelo tsa bona tsa boetsalibe ’me re apare bo bocha. Bibele e re botho bo bocha ‘bo ntse bo nchafatsoa’ ka tsebo e nepahetseng. (Bakolose 3:9, 10) Poleloana “bo ntseng bo nchafatsoa” e bontša hore ho apara botho bo bocha ke khato e tsoelang pele, e hlokang boikitlaetso. Ho sa tsotellehe hore na re leka ka matla hakae ho etsa se nepahetseng, ka linako tse ling botho ba rōna ba boetsalibe bo etsa hore re khoptjoe monahanong, puong kapa ketsong.—Baroma 7:14-20; Jakobo 3:2.

7. Re lokela ho talima litšitiso boitekong ba rōna ba ho phehella ho loka joang?

7 Re lokela ho talima litšitiso boitekong ba rōna ba ho phehella ho loka joang? Ke ’nete hore ha re batle ho nyenyefatsa  ho teba ha sebe. Ka nako e tšoanang, ha rea lokela ho tela, re nke hore mefokolo ea rōna e re etsa ba sa tšoaneleheng ho sebeletsa Jehova. Molimo oa rōna ea mohau o entse tokisetso ea ho boela a amohela ba bontšang pako ka tieo. Nahana ka mantsoe ana a khothatsang a moapostola Johanne: “Ke le ngolla lintho tsena hore le se ke la etsa sebe.” A ntan’o phaella ka mantsoe ana a utloahalang: “Leha ho le joalo, haeba mang kapa mang a etsa sebe [ka lebaka la ho se phethahale ho futsitsoeng], re na le mothusi ho Ntate, e leng Jesu Kreste.” (1 Johanne 2:1) E, Jehova o fane ka sehlabelo sa Jesu sa thekollo e le hore re ka Mo sebeletsa ka tsela e amohelehang ho sa tsotellehe boetsalibe ba rōna. Na seo ha se re susumelletse ho batla ho etsa sohle se matleng a rōna ho khahlisa Jehova?

Litaba Tse Molemo le Toka ea Molimo

8, 9. Ho phatlalatsoa ha litaba tse molemo ho bonahatsa toka ea Jehova joang?

8 Re ka sebelisa toka—ha e le hantle, ra etsisa toka ea Molimo—ka ho kopanela ka botlalo ho bolelleng ba bang litaba tse molemo tsa ’Muso oa Molimo. Toka ea Jehova e amana joang le litaba tse molemo?

9 Jehova ha a na ho felisa tsamaiso ena e khopo a sa fana ka temoso pele. Boprofeteng ba hae bo mabapi le se neng se tla etsahala nakong ea bofelo, Jesu o ile a re: “Litaba tse molemo li lokela ho boleloa lichabeng tsohle pele.” (Mareka 13:10; Matheu 24:3) Ho sebelisoa ha lentsoe “pele” ho bontša hore liketsahalo tse ling li ne li tla latela mosebetsi oa boboleli o etsoang lefatšeng ka bophara. Liketsahalo tseo li akarelletsa matšoenyeho a maholo a boletsoeng esale pele, a tlang ho timetsa ba khopo le ho hlekela lefatše le lecha la ho loka tsela. (Matheu 24:14, 21, 22) Ka sebele, ha ho le ea mong eo ka nepo a ka qosang Jehova ka hore o hlokela ba khopo toka. Ka ho laela hore ho fanoe ka temoso, o ba fa monyetla o lekaneng oa hore ba fetole litsela tsa bona ’me ka tsela eo ba pheme timetso.—Jonase 3:1-10.

Re bonahatsa toka ea Molimo ha re abela ba bang litaba tse molemo ka ho hloka leeme

10, 11. Ho kopanela ha rōna boboleling ba litaba tse molemo ho bonahatsa toka ea Molimo joang?

 10 Ho bolela ha rōna litaba tse molemo ho bonahatsa toka ea Molimo joang? Ntlha ea pele, ho loketse hore re etse sohle seo re ka se khonang ho thusa ba bang ho fumana poloko. Ak’u boele u nahane ka papiso ela ea ho pholosoa sekepeng se tebang. Ntle ho pelaelo, ha u se u sireletsehile u le ka seketsoaneng sa pholoho, u ne u tla batla ho thusa ba bang ba ntseng ba le ka metsing. Ka ho tšoanang, re tlameha ho thusa ba ntseng ba qaputsa ka “metsing” a lefatše lena le khopo. Ke ’nete hore ba bangata ba hana molaetsa oa rōna. Empa hafeela Jehova a sa mameletse, re na le boikarabelo ba ho ba fa monyetla oa hore “ba fihle pakong,” kahoo ba be mocheng oa ho pholoha.—2 Petrose 3:9.

11 Ka ho bolella bohle bao re kopanang le bona litaba tse molemo, re bontša toka ka tsela e ’ngoe ea bohlokoa: Re bontša ho se ee ka tšobotsi. Hopola hore “Molimo ha a leeme, empa sechabeng se seng le se seng motho ea mo tšabang le ea sebetsang ho loka oa amoheleha ho eena.” (Liketso 10:34, 35) Haeba re batla ho etsisa toka ea Hae, ha rea lokela ho ahlola batho ka leeme. Ho e-na le hoo, re lokela ho abela ba bang litaba tse molemo ho sa tsotellehe morabe, maemo a bona a bophelo kapa a lichelete. Ka tsela eo re fa bohle ba tlang ho mamela monyetla oa ho utloa le ho amohela litaba tse molemo.—Baroma 10:11-13.

Kamoo re Tšoarang ba Bang Kateng

12, 13. (a) Ke hobane’ng ha re sa lokela ho potlakela ho ahlola ba bang? (b) Temoso ea Jesu e reng “khaotsang ho ahlola” le e reng “khaotsang ho nyatsa” e bolela’ng? (Bona le mongolo o botlaaseng ba leqephe.)

12 Re ka boela ra sebelisa toka ka ho tšoara ba bang ka tsela eo Jehova a re tšoarang ka eona. Ho bonolo ho ahlola ba bang, ho ba tšoaea-tšoaea liphoso le ho phenya-phenya mabaka ao ba etsang lintho ka ’ona. Empa ke mang ho rōna ea ka ratang ha Jehova a ka phenya-phenya mabaka ao re etsang lintho ka ’ona le mefokolo ea rōna ka tsela e hlokang mohau?  Hase kamoo Jehova a sebetsanang le rōna kateng. Mopesaleme o ile a re: “Haeba u ne u talima liphoso, Jah, Jehova, ke mang ea neng a ka ema?” (Pesaleme ea 130:3) Na ha re lebohe hore ebe Molimo oa rōna ea nang le toka le ea mohau ha a khethe ho lula a nahana ka liphoso tsa rōna? (Pesaleme ea 103:8-10) Joale, re lokela ho tšoara ba bang joang?

13 Haeba re ananela toka ea Molimo e mohau, ha re na ho potlakela ho ahlola ba bang litabeng tse sa re ameng kapa tse sa reng letho. Thutong ea hae ea Thabeng, Jesu o ile a lemosa: “Khaotsang ho ahlola e le hore le se ke la ahloloa.” (Matheu 7:1) Ho ea ka tlaleho ea Luka, Jesu o ile a phaella: “Khaotsang ho nyatsa, ’me ho hang le ke ke la nyatsuoa.” * (Luka 6:37) Jesu o ile a bontša hore oa elelloa hore batho ba sa phethahalang ba na le tšekamelo ea ho ahlola ba bang. Leha e le mang ho ba neng ba mo mametse ea neng a tloaetse ho ahlola ba bang ka tsela e sehlōhō o ne a lokela ho khaotsa seo.

14. Ke hobane’ng ha re lokela ho ‘khaotsa ho ahlola’ ba bang?

14 Ke hobane’ng ha re lokela ho ‘khaotsa ho ahlola’ ba bang? Lebaka le leng ke hore bolaoli ba rōna bo lekanyelitsoe. Morutuoa Jakobo oa re hopotsa: “O Mong eo e leng mofani oa molao le moahloli,” e leng Jehova. Kahoo Jakobo o botsa a sa hlathe koana le koana: “U mang hore u ahlole moahelani oa hao?” (Jakobo 4:12; Baroma 14:1-4) Ho feta moo, boetsalibe ba rōna bo ka etsa hore ho be bonolo feela ho ahlola ka leeme. Maikutlo le litšusumetso tse ngata—tse akarelletsang leeme, ho theoloa seriti, mohono le ho itokafatsa—li ka sotha tsela eo re talimang batho ba bang ka eona. Re boetse re na le mefokolo e meng, ’me ho nahana ka eona ho lokela ho re thibela ho potlakela ho tšoaea-tšoaea ba bang liphoso. Re ke  ke ra bona se ka pelong; hape re ke ke ra tseba maemo ’ohle a batho ba bang. Joale, re bo-mang hore re ka re balumeli-’moho le rōna ba na le sepheo se fosahetseng kapa hore re nyatsa-nyatse boiteko ba bona ba ho sebeletsa Molimo? E ka ba hantle hakaakang ha re ka etsisa Jehova ka hore re shebe se molemo ho bara le barali babo rōna ho e-na le ho tsepamisa kelello mefokolong ea bona!

15. Barapeli ba Molimo ha baa lumelloa ho sebelisa mantsoe a mofuta ofe le tšoaro ea mofuta ofe, hona hobane’ng?

15 Ho thoe’ng ka ho ahlola litho tsa malapa a rōna? Ka masoabi, likahlolo tse ling tse sehlōhō ka ho fetisisa lefatšeng kajeno li fanoa sebakeng seo e lokelang ho ba sona se renang khotso le tšireletseho, e leng lelapeng. Ke ho tloaelehileng ho utloa ka banna, basali, kapa batsoali ba hlekefetsang ba “ahlolelang” litho tsa malapa a bona bophelo ba ho lula ba tjolietsoa ka mantsoe kapa ba hlekefetsoa ’meleng. Empa barapeli  ba Molimo ha baa lumelloa ho sebelisa mantsoe a hlabang, ho soma le ho hlekefetsa. (Baefese 4:29, 31; 5:33; 6:4) Keletso ea Jesu ea hore re ‘khaotse ho ahlola’ le hore re ‘khaotse ho nyatsa’ ha e khaotse ho sebetsa ha re le lapeng. Hopola hore ho sebelisa toka ho akarelletsa ho tšoara ba bang ka tsela eo Jehova a re tšoarang ka eona. ’Me ha ho mohla Molimo oa rōna a re tšoarang ka tsela e khahlapetsang kapa e sehlōhō. Ho e-na le hoo, “o na le lerato le mofuthu haholo” ho ba mo ratang. (Jakobo 5:11) Ke mohlala o motle hakaakang oo re ka o etsisang!

Baholo ba Sebeletsa “Toka”

16, 17. (a) Jehova o lebeletse eng ho baholo? (b) Ho lokela ho etsoa’ng ha mofosi a sa bontše pako ea sebele, hona hobane’ng?

16 Kaofela ha rōna re na le boikarabelo ba ho sebelisa toka, empa ke baholo ka ho khetheha ba jereng boikarabelo bona ka phuthehong ea Bokreste. Hlokomela kamoo boprofeta bo tlalehiloeng ke Esaia bo hlalosang “likhosana,” kapa baholo kateng: “Bonang! Morena o tla busa ka ho loka; ha e le likhosana, li tla busa e le likhosana ka toka.” (Esaia 32:1) E, Jehova o lebeletse hore baholo ba sebeletse toka. Ba ka etsa see joang?

17 Banna bana ba tšoanelehang moeeng baa hlokomela hore toka, kapa ho loka, e hloka hore phutheho e bolokoe e hloekile. Ka linako tse ling, baholo ba tlameha ho ahlola linyeoe tsa phoso e tebileng. Ha ba etsa sena, baa hopola hore toka ea Molimo e batla ho bontša mohau ha ho khoneha. Kahoo ba leka ho tataisetsa mofosi pakong. Empa ho thoe’ng haeba mofosi a hlōleha ho bontša pako ea sebele ho sa tsotellehe boiteko bo joalo ba ho mo thusa? Ka toka e feletseng, Lentsoe la Jehova le laela hore ho nkoe khato e tiileng: “Tlosang motho eo ea khopo har’a lōna.” Seo se bolela ho mo leleka ka phuthehong. (1 Bakorinthe 5:11-13; 2 Johanne 9-11) Baholo ba utloa bohloko ha ba tlameha ho nka khato ena, empa baa hlokomela hore ea hlokahala e le hore ho sireletsoe bohloeki ba phutheho boitšoarong le moeeng. Leha ho le joalo, ba tšepa  hore ka letsatsi le leng mofosi o tla hlaphoheloa ’me a khutlele ka phuthehong.—Luka 15:17, 18.

18. Baholo ba hopola eng ha ba fa ba bang keletso e thehiloeng Bibeleng?

18 Ho sebeletsa toka ho boetse ho akarelletsa ho fana ka keletso e thehiloeng Bibeleng ha ho hlokahala. Ke ’nete hore baholo ha ba khoase liphoso tsa ba bang. Kapa hona hore ba nke monyetla o mong le o mong hore ba fane ka khalemelo. Empa molumeli-’moho a ka ’na a nka “mohato o fosahetseng pele a o hlokomela.” Ho hopola hore toka ea Molimo ha e sehlōhō le hore e na le kutloelo-bohloko ho tla susumelletsa baholo ho ‘leka ho khutlisetsa motho ea joalo tseleng ka moea o bonolo.’ (Bagalata 6:1) Kahoo, baholo ha ba na ho omanya mofosi leha e le ho sebelisa mantsoe a hlabang. Ho e-na le hoo, keletso e fanoang ka lerato e khothatsa ea e amohelang. Esita le ha ba fana ka khalemelo e tobileng—ba bontša ka ho hlaka liphello tsa tsela e booatla—baholo ba ntse ba hopola hore molumeli-’moho le bona ea fositseng ke nku ea mohlape oa Jehova. * (Luka 15:7) Ha ho hlakile hore keletso kapa khalemelo e susumetsoa ke lerato ’me e fanoa ka lerato, ho batla ho le bonolo hore e khutlisetse mofosi tseleng.

19. Baholo ba lokela ho etsa liqeto life, hona ba tlameha ho theha liqeto tseo hokae?

19 Hangata baholo ba lokela ho etsa liqeto tse amang balumeli-’moho le bona. Ka mohlala, nako le nako baholo baa kopana ho buisana ka hore na barab’abo rōna ba itseng ka phuthehong baa tšoaneleha bakeng sa ho buelloa e le baholo kapa bahlanka ba sebeletsang kapa che. Baholo ba tseba bohlokoa ba ho se ee ka tšobotsi. Ba lumella hore seo Molimo a se hlokang ho ba khethoang ka tsela eo e be sona se ba  tataisang liqetong tseo ba li etsang, ha ba itšetlehe feela ka maikutlo a bona a botho. Kahoo, ha ba ‘ahlole esale pele, ha ba etse letho ho ea ka tšekamelo e leeme.’—1 Timothea 5:21.

20, 21. (a) Ke eng seo baholo ba ikitlaelletsang ho ba sona, hona hobane’ng? (b) Baholo ba ka etsa eng ho thusa “meea e tepeletseng”?

20 Baholo ba sebelisa toka ea Molimo ka litsela tse ling hape. Ka mor’a ho bolela esale pele hore baholo ba ne ba tla sebeletsa “toka,” Esaia o ile a tsoela pele: “E [mong le e mong] e tla ba sebaka sa ho ipatela moea le sebaka sa ho ipatela pula e nang ka sefefo, joaloka melapo ea metsi naheng e se nang metsi, joaloka moriti oa lefika le leholo naheng e phophothehileng.” (Esaia 32:2) Kahoo, baholo ba ikitlaelletsa ho ba mohloli oa matšeliso le khatholoho ho barapeli-’moho le bona.

21 Kajeno ba bangata ba hloka khothatso ka lebaka la mathata a mangata a nyahamisang. Baholo, le ka etsa’ng ho thusa “meea e tepeletseng”? (1 Bathesalonika 5:14) Ba mameleng  ka kutloelo-bohloko. (Jakobo 1:19) Mohlomong ba hloka ho buisana le motho e mong eo ba mo tšepang ka ‘ho tšoenngoa ke lipelaelo’ tse ka lipelong tsa bona. (Liproverbia 12:25) Ba tiisetseng hore Jehova le bara le barali babo bona baa ba hloka, baa ba ananela le hore baa ba rata. (1 Petrose 1:22; 5:6, 7) Ho feta moo, le ka rapela le bona le ho ba rapella. Ho utloa moholo a ba etsetsa thapelo e tsoang pelong e ka ba ho tšelisang haholo. (Jakobo 5:14, 15) Molimo oa toka o tla hlokomela boiteko ba lōna bo lerato ba ho thusa ba tepeletseng.

Baholo ba bonahatsa toka ea Jehova ha ba khothatsa ba nyahameng

22. Re ka etsisa toka ea Jehova ka litsela life, hona ka phello efe?

22 Ka sebele, re atamela haholoanyane ho Jehova ha re etsisa toka ea hae! Ha re phela ka litekanyetso tsa hae tse lokileng, ha re abela ba bang litaba tse molemo tse pholosang bophelo le ha re khetha ho tsepamisa kelello ho se molemo seo ba bang ba se etsang ho e-na le ho khoasa liphoso tsa bona, re bonahatsa toka ea Molimo. Baholo, le bonahatsa toka ea Molimo ha le sireletsa bohloeki ba phutheho, ha le fana ka keletso e hahang ea Mangolo, ha le etsa liqeto tse sa eeng ka tšobotsi le ha le khothatsa ba nyahameng. E tlameha ebe ho thabisa pelo ea Jehova hakaakang ha a talima a le maholimong ’me a bona batho ba hae ba etsa sohle se matleng a bona ho ‘sebelisa toka’ ha ba tsamaea le Molimo oa bona!

^ ser. 13 Liphetolelo tse ling li re “le se ke la ahlola” hape “le se ke la nyatsa.” Liphetolelo tseo li fana ka maikutlo a hore “le se ke la qala ho ahlola” le a hore “le se ke la qala ho nyatsa.” Leha ho le joalo, bangoli ba Bibele mona ba sebelisa litaelo tse khalemelang tse bonakong ba bojoale (bo tsoelang pele). Kahoo liketso tse hlalosoang mona li ne li ntse li etsahala ka nako eo empa li ne li lokela ho khaotsa.

^ ser. 18 Ho 2 Timothea 4:2, Bibele e re ka linako tse ling baholo ba lokela ‘ho khalemela, ho nyatsa ka matla, ho eletsa.’ Lentsoe la Segerike le fetoletsoeng e le ‘eletsa’ (pa·ra·ka·leʹo) le ka bolela “ho khothatsa.” Lentsoe le leng la Segerike le amanang le leo, e leng pa·raʹkle·tos, le ka bolela ’muelli litabeng tsa molao. Kahoo, esita le ha baholo ba fana ka khalemelo e tiileng, ba lokela ho thusa ba hlokang thuso ea moea.