Fetela boitsebisong

Fetela lethathamong la tse ka hare

 KHAOLO EA 28

“Ke Uena Feela ea Tšepahalang”

“Ke Uena Feela ea Tšepahalang”

1, 2. Ke hobane’ng ha ho ka boleloa hore Morena Davida o ne a tseba hore na ho hloka botšepehi ke ntho e joang?

MORENA DAVIDA o ne a tseba hore na ho hloka botšepehi ke ntho e joang. Ka nako e ’ngoe puso ea hae e tletseng merusu e ile ea hlaseloa ke merero ea bolotsana, litho tsa sechaba sa habo tsa mo etsetsa ’momori. Ho feta moo, Davida o ile a tsuoa tlaase ke ba bang ba batho bao re neng re ka nka hore ke metsoalle ea hae e haufi-ufi. Nahana ka Mikale, mosali oa Davida oa matsoa-thaka. Qalong, “o ne a rata Davida,” ntle ho pelaelo a mo tšehetsa mesebetsing ea hae ea borena. Empa ha nako e ntse e ea, “a qala ho mo nyelisa ka pelong ea hae,” esita le ho nka Davida a le ‘feela joaloka e mong oa banna ba lithoto.’—1 Samuele 18:20; 2 Samuele 6:16, 20.

2 E mong hape e ne e le Akitofele, moeletsi oa Davida. Boeletsi ba hae bo ne bo nkeloa holimo joalokaha eka ke lentsoe la Jehova ka ho toba. (2 Samuele 16:23) Empa ka mor’a nako, motsoalle enoa ea tšeptjoang o ile a fetoha lehlaba-phio eaba o kenella ’momoring oa ho hlanohela Davida. Ke mang ea neng a hlohlelletsa ’momori oo? Ke Absalome, mor’a Davida! Ramenyetla enoa ea mano o ile “a ’na a hapa lipelo tsa batho ba Iseraele,” a iketsa ea qothisanang lehlokoa le morena. Bofetoheli ba Absalome bo ile ba ipha matla hoo Morena Davida a ileng a tlameha ho baleha ho pholosa bophelo ba hae.—2 Samuele 15:1-6, 12-17.

3. Davida o ne a kholisehile ka eng?

3 Na ho ne ho se ho se na ea tšepahalang ho Davida? Mahlomoleng ’ohle a hae, Davida o ne a tseba hore ka sebele o teng. E ne e le mang? E ne e le Jehova Molimo. Davida o ile a re ka Jehova: “Ho ea tšepahalang u tla etsa ka botšepehi.” (2 Samuele 22:26) Botšepehi ke eng, hona Jehova o beha mohlala o phahameng ka ho fetisisa joang tšobotsing ee?

 Botšepehi ke Eng?

4, 5. (a) “Botšepehi” ke eng? (b) Ho tšepahala ha lintho tse sa pheleng ho fapana joang le botšepehi bo bonahatsoang ke motho?

4 “Botšepehi” kamoo bo sebelisitsoeng kateng ka Mangolong a Seheberu ke mosa oo ka lerato o khomarelang ntho o sa e tlohele ho fihlela morero oa oona ka eona o finyeletsoe. Motho ea tšepahalang ke ea lerato. * Ka ho thahasellisang, mopesaleme o bitsa khoeli “paki e tšepahalang maholimong” kaha e hlaha bosiu bo bong le bo bong. (Pesaleme ea 89:37) Ka kutloisiso ena, khoeli ea tšepahala, e ka tšeptjoa. Empa khoeli e ke ke ea tšepahala ka kutloisiso eo motho a tšepahalang ka eona. Hobane’ng? Hobane botšepehi ba motho ke ponahatso ea lerato—ntho eo lintho tse sa pheleng li sitoang ho e bonahatsa.

Khoeli e bitsoa paki e tšepahalang, empa ke libōpuoa tse bohlale tse phelang feela tseo ka sebele li ka bonahatsang botšepehi bo kang ba Jehova

5 Ho ea ka kutloisiso ea Mangolo, botšepehi bo na le boikutlo bo mofuthu. Ho bo bonahatsa ka bohona ho bontša hore ho na le kamano e itseng pakeng tsa motho ea bontšang tšobotsi ena le eo e bontšoang ho eena. Botšepehi bo joalo ha bo feto-fetohe. Ha bo tšoane le maqhubu a leoatle a akhotsoang ke meea ea lifefo. Ho e-na le hoo, botšepehi, kapa lerato le  tšepahalang, bo na le botsitso le matla a ho hlōla litšitiso tse thata ka ho fetisisa.

6. (a) Botšepehi bo haella hakae har’a batho, hona Bibele e bontšitse hoo joang? (b) Tsela e molemo ka ho fetisisa ea ho ithuta seo botšepehi bo se akarelletsang ke efe, hona hobane’ng?

6 ’Nete ke hore botšepehi bo joalo boa haella mehleng ena. Metsoalle e haufi e atisa ho ‘rata ho tsekollana.’ Re tsoela pele ho utloa ka balekane ba lahlang balekane ba bona kherehloa. (Liproverbia 18:24; Malakia 2:14-16) Liketso tse mano li atile hoo le rōna re ka ’nang ra iphumana re pheta mantsoe a moprofeta Mikea: “Ea tšepahalang o timetse lefatšeng.” (Mikea 7:2) Le hoja hangata batho ba hlōleha ho bontša mosa o lerato, botšepehi bo khetholla Jehova ka tsela e ikhethang. Ha e le hantle, tsela e molemo ka ho fetisisa ea ho ithuta seo botšepehi bo hlileng bo se akarelletsang ke ho hlahloba kamoo Jehova a bonahatsang tšobotsi ena e hlollang ea lerato la hae kateng.

Botšepehi ba Jehova Boo ho Seng bo ka Bapisoang le Bona

7, 8. Ho ka thoe Jehova ke eena feela ea tšepahalang joang?

7 Bibele e re ka Jehova: “Ke uena feela ea tšepahalang.” (Tšenolo 15:4) Ho ka ba joalo joang? Na batho le mangeloi ha baa ka ba bonahatsa botšepehi bo tsotehang ka linako tse ling? (Jobo 1:1; Tšenolo 4:8) Hona ho thoe’ng ka Jesu Kreste? Na hase eena ea ka sehloohong “ea tšepahalang” oa Molimo? (Pesaleme ea 16:10) Joale, ke joang ho ka thoeng ke Jehova feela ea tšepahalang?

8 Ntlha ea pele, hopola hore botšepehi ke tšobotsi ea lerato. Kaha “Molimo ke lerato”—ke eena mothofatso oa tšobotsi ena—ke mang ea ka bonahatsang botšepehi ka ho feletseng ho feta Jehova? (1 Johanne 4:8) Ke ’nete hore mangeloi le batho ba ka ’na ba bonahatsa litšoaneleho tsa Molimo, empa ke Jehova feela ea tšepahalang ka ho fetisisa. Kaha ke “Moholo-holo oa Matsatsi,” o bonahalitse mosa o lerato ka nako e telele ho feta sebōpuoa leha e le sefe, se lefatšeng kapa leholimong. (Daniele 7:9) Kahoo, Jehova ke mohlala oa sebele oa botšepehi.  O bonahatsa tšobotsi ena ka tsela eo ka eona ho seng sebōpuoa leha e le sefe se ka e bonahatsang. Nahana ka mehlala e seng mekae.

9. Jehova o “tšepahala mesebetsing eohle ea hae” joang?

9 Jehova oa “tšepahala mesebetsing eohle ea hae.” (Pesaleme ea 145:17) Ka tsela efe? Pesaleme ea 136 e fana ka karabo. Moo ho thathamisitsoe liketso tse ’maloa tsa Jehova tsa poloko, ho akarelletsa ha a lopolla Baiseraele ka tsela e hlollang ka ho ba tšelisa Leoatle le Lefubelu. Ho hlokomelehang ke hore temana e ’ngoe le e ’ngoe ea pesaleme ena e hatisoa ke poleloana e reng: “Etsoe mosa oa hae o lerato [kapa, botšepehi] o teng ho isa nakong e sa lekanyetsoang.” Pesaleme ena e kenyelelitsoe Lipotsong Tsa ho Thuisa tse leqepheng la 289. Ha u ntse u bala litemana tseo, u tla khahloa ke litsela tse ngata tseo Jehova a bontšitseng mosa o lerato ho batho ba hae ka tsona. Ka sebele, Jehova o bontša botšepehi ho bahlanka ba hae ba tšepahalang ka ho utloa mehoo ea bona ha ba kōpa thuso le ka ho nka khato ka nako e behiloeng. (Pesaleme ea 34:6) Lerato le tšepahalang la Jehova ho bahlanka ba hae ha le sisinyehe hafeela ba lula ba tšepahala ho eena.

10. Jehova o bontša botšepehi joang ka litekanyetso tsa hae?

10 Ho feta moo, Jehova o bontša botšepehi ho bahlanka ba hae ka ho khomarela litekanyetso tsa hae. Ho fapana le batho ba sa tsitsang, ba nkehang maikutlo habonolo feela, Jehova ha a feto-fetohe ponong ea hae ea se nepahetseng le se fosahetseng. Ho theosa le lilemo tse likete, pono ea hae ka lintho tse kang tšebelisano le meea, borapeli ba litšoantšo le ho bolaea e lutse e sa fetohe. O ile a re ka moprofeta oa hae Esaia: “Esita le ho isa botsofaling ba motho ’na ke Ea tšoanang.” (Esaia 46:4) Kahoo, re ka kholiseha hore re tla rua molemo ha re latela tataiso e hlakileng ea boitšoaro e fumanoang Lentsoeng la Molimo.—Esaia 48:17-19.

11. Fana ka mehlala ho bontša hore Jehova oa tšepahala ho bolokeng litšepiso tsa hae.

11 Jehova o boetse o bontša botšepehi ka ho boloka litšepiso tsa hae. Ha a bolela ntho esale pele, ea etsahala. Kahoo Jehova  o itse: “Lentsoe la ka le tsoang molomong oa ka . . . le ke ke la khutlela ho ’na le se na litholoana, empa ka sebele le tla etsa seo ke se thabelang, ’me ka sebele le tla atleha ho seo ke le rometseng sona.” (Esaia 55:11) Ka ho boloka litšepiso tsa hae, Jehova o bontša botšepehi ho batho ba hae. Ha a ba tšoarise lefika ka ntho eo a sa ikemisetsang ho e etsa. Botumo ba Jehova ntlheng ena bo botle hoo mohlanka oa hae Joshua a neng a ka re: “Ha ho tšepiso e ileng ea hlōleha ho phethahala tšepisong eohle e molemo eo Jehova a neng a e entse ho ntlo ea Iseraele; e ile ea phethahala kaofela.” (Joshua 21:45) Ka hona, re ka kholiseha hore le ka mohla re ke ke ra soetseha kahobane Jehova a hlōleha ho phethahatsa litšepiso tsa hae.—Esaia 49:23; Baroma 5:5.

12, 13. Mosa oa Jehova o lerato “o teng ho isa nakong e sa lekanyetsoang” ka litsela life?

12 Joalokaha ho boletsoe pejana, Bibele e re bolella hore mosa oa Jehova o lerato “o teng ho isa nakong e sa lekanyetsoang.” (Pesaleme ea 136:1) Ho joalo joang? Ka kutloisiso ea hore Jehova o tšoarela libe ka ho sa feleng. Joalokaha hoo ho tšohliloe Khaolong ea 26, Jehova ha a ahlolele motho liphoso tsa nako e fetileng tseo a li tšoaretsoeng. Kaha “bohle ba entse sebe ’me ba haelloa ke khanya ea Molimo,” e mong le e mong oa rōna o lokela ho leboha hore ebe mosa oa Jehova o lerato o teng ho isa nakong e sa lekanyetsoang.—Baroma 3:23.

13 Empa mosa oa Jehova o lerato o teng ho isa nakong e sa lekanyetsoang ka kutloisiso e ’ngoe hape. Lentsoe la hae le re ea lokileng “ka sebele o tla ba joaloka sefate se lenngoeng haufi le melapo ea metsi, se fanang ka litholoana tsa sona nakong ea tsona le seo makhasi a sona a sa poneng, ntho e ’ngoe le e ’ngoe eo a e etsang e tla atleha.” (Pesaleme ea 1:3) Ak’u nahane ka sefate se behang haholo seo makhasi a sona a sa poneng! Kahoo, le rōna haeba re hlile re thabela Lentsoe la Molimo, re tla phela nako e telele, ka khotso re bile re le ba behang litholoana. Litlhohonolofatso tseo ka botšepehi Jehova a li fang bahlanka ba hae ba tšepahalang ke tsa ka ho sa feleng. Ha e le hantle, lefatšeng le lecha la ho loka leo Jehova a  tlang ho le tlisa, batho ba mamelang ba tla bona mosa oa hae o lerato ho isa nakong e sa lekanyetsoang.—Tšenolo 21:3, 4.

Jehova “a ke ke a Tlohela ba Tšepahalang ba Hae”

14. Jehova o bontša joang hore o ananela botšepehi ba bahlanka ba hae?

14 Jehova o bontšitse botšepehi ba hae khafetsa. Kaha Jehova o lula a sa feto-fetohe ka ho phethahetseng, le ka mohla botšepehi boo a bo bontšang ho bahlanka ba hae ba tšepahalang ha bo thekesele. Mopesaleme o ile a ngola: “Nkile ka ba mohlankana, ke se ke tsofetse, leha ho le joalo ha ke e-s’o bone mang kapa mang ea lokileng a tloheloa ka ho feletseng, kapa bana ba hae ba batla bohobe. Etsoe Jehova o rata toka, a ke ke a tlohela ba tšepahalang ba hae.” (Pesaleme ea 37:25, 28) Ke ’nete hore kaha ke ’Mōpi, Jehova o tšoaneloa ke borapeli ba rōna. (Tšenolo 4:11) Leha ho le joalo, kaha oa tšepahala, Jehova o ananela liketso tsa rōna tse tšepahalang.—Malakia 3:16, 17.

15. Hlalosa kamoo litšebelisano tsa Jehova le Iseraele li totobatsang botšepehi ba Hae kateng.

15 Ka mosa oa hae o lerato, nako le nako Jehova o thusa batho ba hae ha ba le mahlomoleng. Mopesaleme oa re bolella: “O lebela meea ea ba tšepahalang ba hae; o ba lopolla matsohong a ba khopo.” (Pesaleme ea 97:10) Nahana ka litšebelisano tsa hae le sechaba sa Iseraele. Ka mor’a hore ba tšelisoe Leoatle le Lefubelu ka mohlolo, Baiseraele ba ile ba binela Jehova pina ba re: “Ka mosa oa hao o lerato [kapa, “lerato le tšepahalang,” NW, mongolo o botlaaseng ba leqephe] u tsamaisitse sechaba seo u se lopolotseng.” (Exoda 15:13) Ka sebele ho lopolloa ha bona Leoatleng le Lefubelu e ne e le ketso ea lerato la Jehova le tšepahalang. Ka hona Moshe o ile a bolella Baiseraele: “Hase kahobane le ne le e-na le baahi ba bangata ho feta lichaba tsohle Jehova a ileng a le bontša boikutlo bo mofuthu hoo a le khethileng, etsoe le ne le le ba banyenyane har’a lichaba tsohle. Empa ke kahobane Jehova a le ratile, le kahobane a bolokile polelo ea hae eo a e hlapanyelitseng baholo-holo ba lōna, Jehova a le ntšitseng ka letsoho le matla,  e le hore a le lopolle ntlong ea makhoba, letsohong la Faro morena oa Egepeta.”—Deuteronoma 7:7, 8.

16, 17. (a) Baiseraele ba ile ba bontša ho haelloa ke kananelo ka ho tšosang joang, empa Jehova o ile a ba bontša qenehelo joang? (b) Baiseraele ba bangata ba ile ba bontša joang hore ‘ho ne ho se ho se na pholiso’ bakeng sa bona, hona see se re fa mohlala ofe oa temoso?

16 Ke ’nete hore Baiseraele e le sechaba ba ile ba hlōleha ho bontša kananelo bakeng sa mosa oa Jehova o lerato, kaha ka mor’a ho lopolloa ha bona ba ile “ba ’na ba . . . siteloa [Jehova] ka ho eketsehileng ka ho fetohela Ea Phahameng ka ho Fetisisa.” (Pesaleme ea 78:17) Ka lilemo tse makholo, ba ile ba ’na ba mo fetohela nako le nako, ba furalla Jehova ba retelehela ho melimo ea bohata le mekhoeng ea bohetene e neng e ba silafatsa feela. Leha ho le joalo, Jehova ha aa ka a roba selekane sa hae. Ho e-na le hoo, Jehova o ile a sebelisa moprofeta Jeremia ho ipiletsa ho batho ba hae ka tieo: “Khutlang, Lōna Baiseraele ba koenehileng . . . Nke ke ka le sosobanyetsa sefahleho ka bohale, etsoe kea tšepahala.” (Jeremia 3:12) Leha ho le joalo, joalokaha re bone Khaolong ea 25, Baiseraele ba bangata ha baa ka ba susumetseha ho etsa liphetoho. Ha e le hantle, “ba ne ba fetola manģosa a Molimo oa ’nete litšeho ba sa khaotse ’me ba nyelisa mantsoe a hae le ho soma baprofeta ba hae.” Ka phello efe? Qetellong, “khalefo ea Jehova [ea] tlela batho ba hae, ho fihlela ho se na pholiso.”—2 Likronike 36:15, 16.

17 Re ithuta’ng ho see? Hore botšepehi ba Jehova hase ba bofofu ebile ha bo ee le khongoana holimo. Ke ’nete hore Jehova ke “ea tletseng mosa o lerato,” ’me o thabela ho bontša mohau ha ho e-na le motheo oa hore a etse joalo. Empa o etsa’ng ha mofosi a ipaka e le ea ngangellang bokhopo? Boemong boo, Jehova o khomarela litekanyetso tsa hae tse lokileng ’me o fana ka kahlolo e boima. Joalokaha Moshe a ile a bolelloa, “ho hang [Jehova] a ke ke a lokolla kotlong.”—Exoda 34:6, 7.

18, 19. (a) Ho otla ha Jehova ba khopo ka bohona ke ketso ea botšepehi joang? (b) Jehova o tla bontša botšepehi ba hae joang ho bahlanka ba hae ba hlorisitsoeng ho isa lefung?

18 Ho otla ha Molimo ba khopo ka bohona ke ketso ea botšepehi.  Joang? Buka ea Tšenolo e bontša tsela e ’ngoe litaelong tseo Jehova a li fang mangeloi a supileng: “E-eang ’me le tšollele likotlolo tse supileng tsa bohale ba Molimo lefatšeng.” Ha lengeloi la boraro le tšollela sekotlolo sa lona ‘linōkeng le lilibeng tsa metsi,’ li fetoha mali. Joale lengeloi le re ho Jehova: “Uena, Ea teng le ea neng a le teng, Ea tšepahalang, u lokile, hobane u entse liqeto tsena, hobane ba ile ba tšolla mali a bahalaleli le a baprofeta, ’me u ba file mali hore ba a noe. Ba tšoaneloa ke seo.”—Tšenolo 16:1-6.

Ka botšepehi Jehova o tla hopola le ho tsosa ba ipakileng ba tšepahala ho isa lefung

19 Hlokomela hore ha lengeloi le ntse le fana ka molaetsa oo oa kahlolo, le bitsa Jehova “Ea tšepahalang.” Hobane’ng? Hobane ka ho timetsa ba khopo, Jehova o bontša ho tšepahala ho bahlanka ba hae, bao ba bangata ba bona ba hlorisitsoeng ho isa lefung. Ka botšepehi, Jehova o ba boloka ba phela mohopolong oa hae. O labalabela ho boela a bona bana ba tšepahalang ba shoeleng, ’me Bibele e tiisa hore morero oa hae ke ho ba putsa ka tsoho. (Jobo 14:14, 15) Jehova ha a lebale bahlanka ba hae ba tšepahalang hobane feela ba se ba shoele. Ho e-na le hoo, “kaofela baa phela ho eena.” (Luka 20:37, 38) Morero oa Jehova oa ho tsosa ba mohopolong oa  hae hore ba tl’o phela hape ke bopaki bo matla ba botšepehi ba hae.

Bernard Luimes (ka ho le letšehali) le Wolfgang Kusserow (bohareng) ba ile ba bolaoa ke Manazi

Moses Nyamussua (ka ho le letona) o ile a bolaoa ke mokhopi oa lipolotiki ka ho hlajoa ka lerumo

Lerato la Jehova le Tšepahalang le Bula Tsela ea Poloko

20. ‘Lijana tsa mohau’ ke bo-mang, hona Jehova o bontša ho tšepahala ho tsona joang?

20 Ho theosa le histori, Jehova o bontšitse botšepehi ka tsela e tsotehang ho batho ba tšepahalang. Ha e le hantle, ka lilemo tse likete Jehova o “mameletse ka tiisetso e khōlō lijana tsa khalefo tse entsoeng hore li lokele timetso.” Hobane’ng? “E le hore a ka tsebahatsa maruo a khanya ea hae lijaneng tsa mohau, tseo a ileng a li lokisa esale pele bakeng sa khanya.” (Baroma 9:22, 23) ‘Lijana tsena tsa mohau’ ke batho ba sekametseng ho lokeng ba tlotsitsoeng ka moea o halalelang hore e be majalefa-’moho le Kreste ’Musong oa hae. (Matheu 19:28)  Ka ho bulela lijana tsena tsa mohau tsela ea poloko, Jehova o tšepahetse ho Abrahama, eo a ileng a mo etsetsa tšepiso ena ea selekane: “Ka sebele lichaba tsohle tsa lefatše li tla itlhohonolofatsa ka peō ea hao ka lebaka la hore u mametse lentsoe la ka.”—Genese 22:18.

Ka lebaka la botšepehi ba Jehova, bahlanka ba hae bohle ba tšepahalang ba na le tšepo e tiileng ea bokamoso

21. (a) Jehova o bontša botšepehi joang ho “bongata bo boholo” bo nang le tebello ea ho tsoa “matšoenyehong a maholo”? (b) Botšepehi ba Jehova bo u susumelletsa ho etsa’ng?

21 Jehova o bontša ho tšepahala ho joalo le ho “bongata bo boholo” bo nang le tebello ea ho tsoa “matšoenyehong a maholo” le ea ho phela ka ho sa feleng lefatšeng la paradeise. (Tšenolo 7:9, 10, 14) Le hoja bahlanka ba hae ba sa phethahala, ka botšepehi Jehova o ba fa monyetla oa ho phela ka ho sa feleng lefatšeng la paradeise. O etsa seo joang? Ka ho sebelisa thekollo, e leng pontšo e khōlō ka ho fetisisa ea botšepehi ba Jehova. (Johanne 3:16; Baroma 5:8) Botšepehi ba Jehova bo hohela ba lapetseng ho loka lipelong tsa bona. (Jeremia 31:3) Na ha u ikutloe u atametse ho Jehova haholoanyane ka lebaka la botšepehi bo tebileng boo a bo bontšitseng le boo a sa ntseng a tla bo bontša? Kaha takatso ea rōna ke ho atamela ho Molimo, e se eka re ka arabela leratong la hae ka ho tiisa boikemisetso ba rōna ba ho mo sebeletsa ka botšepehi.

^ ser. 4 Ho thahasellisang ke hore lentsoe le fetoletsoeng e le “botšepehi” ho 2 Samuele 22:26, libakeng tse ling le fetoletsoe e le “mosa o lerato” kapa “lerato le tšepahalang.”