Fetela boitsebisong

Na U ka Thabela ho Tseba ’Nete?

Na U ka Thabela ho Tseba ’Nete?

’NETE mabapi le eng? Mabapi le tse ling tsa lipotso tsa bohlokoa ka ho fetisisa tseo batho ba kileng ba li botsa. Mohlomong u kile ua ipotsa lipotso tse kang tsena:

  • Na ruri Molimo oa re tsotella?

  • Na lintoa le mahlomola li tla ke li fele?

  • Ho etsahala’ng ka rōna ha re e-shoa?

  • Na ho na le tšepo leha e le efe ka bafu?

  • Nka rapela Molimo joang e le hore a ’mamele?

  • Nka fumana thabo joang bophelong?

U ka fumana likarabo tsa lipotso tsee hokae? Haeba u ne u ka ea laebraring kapa mabenkeleng a libuka, mohlomong u ne u tla fumana libuka tse likete tse reng li ka araba lipotso tseo. Leha ho le joalo, hangata libuka tsena lia hanyetsana. Tse ling tsona ekare lia utloahala ka nakoana empa kapele-pele boitsebiso ba tsona bo siuoa ke nako ebe lia nchafatsoa kapa li nkeloa sebaka ke tse ling.

Leha ho le joalo, ho na le buka e ’ngoe e nang le likarabo tse ka tšeptjoang. Ke buka e buang ’nete. Ha Jesu Kreste a rapela Molimo, o ile a re: “Lentsoe la hao ke ’nete.” (Johanne 17:17) Kajeno rea tseba hore Lentsoe leo ke Bibele e Halalelang. Maqepheng a latelang, u tla fumana tlhaloso e khutšoanyane ea likarabo tsa Bibele tse hlakileng le tse nepahetseng tsa lipotso tse ka holimo.

 Na Ruri Molimo oa re Tsotella?

LEBAKA LEO KA LONA HO BOTSOANG POTSO ENA: Re phela lefatšeng le tletseng bokhopo le bileng le hlokang toka. Malumeli a mangata a ruta hore ha re hlaheloa ke mahlomola, seo ke thato ea Molimo.

SEO BIBELE E SE RUTANG: Le ka mohla Molimo a ke ke a baka bokhopo. Jobo 34:10 e re: “Ho ke ho be hōle le Molimo oa ’nete hore a sebetse bokhopo, le hore Ea Matla ’Ohle a sebetse ka mokhoa o hlokang toka!” Molimo o na le morero o bontšang hore o rata batho. Ke ka lebaka leo Jesu a ileng a re ruta hore ha re rapela re re: “Ntat’a rōna ea maholimong . . . ’muso oa hao o ke o tle. Thato ea hao e ke e etsahale lefatšeng, joalokaha e etsahala leholimong.” (Matheu 6:9, 10) Molimo o re tsotella haholo hoo a ileng a ba a tela ntho e khōlō ka ho fetisisa e le hore a phethahatse morero oa hae.—Johanne 3:16.

Sheba le Genese 1:26-28; Jakobo 1:13; le 1 Petrose 5:6, 7.

Na Lintoa le Mahlomola li Tla ke li Fele?

LEBAKA LEO KA LONA HO BOTSOANG POTSO ENA: Lintoa li bolaea batho ba bangata ka tsela e tšabehang. Kaofela ha rōna re kile ra utloisoa bohloko ke mahlomola.

SEO BIBELE E SE RUTANG: Molimo o bolela esale pele hore o tla tlisa khotso lefatšeng lohle. Tlas’a ’Muso oa hae o tla busa o le leholimong, batho “ha ba sa tla hlola ba ithuta ntoa.” Ho e-na le hoo, ba tla “tea lisabole tsa bona hore e be mehoma.” (Esaia 2:4) Molimo o tla felisa ho hloka toka le mahlomola ’ohle. Bibele e re tšepisa hore: “[Molimo] o tla hlakola meokho eohle mahlong a bona, lefu ha le sa tla hlola le e-ba teng, ’me ho siama kapa ho bokolla kapa bohloko ha li sa tla hlola li e-ba teng. Lintho tsa pele [tse akarelletsang ho hloka toka le mahlomola a teng kajeno] li fetile.”—Tšenolo 21:3, 4.

Sheba le Pesaleme ea 37:10, 11; 46:9; le Mikea 4:1-4.

Ho Etsahala’ng ka Rōna ha re E-shoa?

LEBAKA LEO KA LONA HO BOTSOANG POTSO ENA: Malumeli a mangata lefatšeng a ruta hore ho na le ntho e ’ngoe ka hare ho motho e tsoelang pele ho phela ha a se a shoele. A mang a lumela hore bafu ba ka ntša batho ba phelang kotsi kapa hore Molimo o otla batho ba khopo ka hore ba hlokofatsoe ka ho sa feleng mollong oa lihele.

SEO BIBELE E SE RUTANG: Ha motho a shoa, o khaotsa ho ba teng. Moeklesia 9:5 e re: “Ba shoeleng, ho hang ha ba tsebe letho.” Kaha ha ho letho leo bafu ba le tsebang, leo ba le utloang, le leo ba le hlokomelang, ba ke ke ba ntša batho ba phelang kotsi—kapa ba ba thusa.—Pesaleme ea 146:3, 4.

Sheba le Genese 3:19 le Moeklesia 9:6, 10.

 Na ho na le Tšepo Leha e le Efe ka Bafu?

LEBAKA LEO KA LONA HO BOTSOANG POTSO ENA: Re rata ho phela ebile re batla ho thabela bophelo hammoho le baratuoa ba rōna. Ka tlhaho re labalabela hore re boele re bone baratuoa ba rōna ba shoeleng.

SEO BIBELE E SE RUTANG: Boholo ba batho ba shoeleng ba tla tsosoa. Jesu o ile a tšepisa hore “ba mabitleng a khopotso ba tla utloa lentsoe la hae ’me ba tsoe.” (Johanne 5:28, 29) Tumellanong le morero oa Molimo oa tšimolohong, batho ba tla tsosoa ba tla fumana monyetla oa ho phela lefatšeng la paradeise. (Luka 23:43) Bokamoso bona boo re bo tšepisitsoeng bo akarelletsa hore batho ba mamelang ba tla phela bophelo bo phethahetseng ka ho sa feleng. Bibele e re: “Ba lokileng ba tla rua lefatše, ba tla lula ho lona ka ho sa feleng.”—Pesaleme ea 37:29.

Sheba le Jobo 14:14, 15; Luka 7:11-17; le Liketso 24:15.

Nka Rapela Molimo Joang e le Hore a ’Mamele?

LEBAKA LEO KA LONA HO BOTSOANG POTSO ENA: Hoo e ka bang malumeling ’ohle batho baa rapela. Leha ho le joalo, ba bangata ba nahana hore lithapelo tsa bona ha li arajoe.

SEO BIBELE E SE RUTANG: Jesu o ile a re ruta hore re se ke ra pheta-pheta mantsoe a le mang ha re rapela. O itse: “Ha u rapela, u se ke ua pheta-pheta lintho tse tšoanang.” (Matheu 6:7) Haeba re batla hore Molimo a mamele lithapelo tsa rōna, re lokela ho rapela ka tsela eo a e amohelang. E le hore re etse seo, re lokela ho ithuta hore na thato ea Molimo ke efe ebe re rapela ka tsela e lumellanang le eona. Johanne oa Pele 5:14 e re: “Ho sa tsotellehe hore na ke eng eo re e kōpang ho ea ka thato ea hae, [Molimo] oa re utloa.”

Sheba le Pesaleme ea 65:2; Johanne 14:6, 14; le 1 Johanne 3:22.

Nka Fumana Thabo Joang Bophelong?

LEBAKA LEO KA LONA HO BOTSOANG POTSO ENA: Batho ba bangata ba lumela hore ba tla fumana thabo haeba ba e-na le chelete, ba tumme ba bile ba le batle. Empa, le hoja ba lelekisa lintho tse joalo, ba ntse ba sitoa ho fumana thabo.

SEO BIBELE E SE RUTANG: Jesu o ile a bontša hore na ntho ea bohlokoa e tlisang thabo ke efe ha a re: “Ho thaba ba elang hloko tlhoko ea bona ea moea.” (Matheu 5:3) Re ka fumana thabo ea ’nete haeba feela re nka mehato ea ho fumana ntho ea bohlokoa ka ho fetisisa eo re e hlokang—e leng ho tseba ’nete mabapi le Molimo le merero ea hae. ’Nete eo e fumanoa ka Bibeleng. Ho tseba ’nete eo ho ka re thusa hore re lemohe hore na ke lintho life tseo e hlileng e leng tsa bohlokoa—le hore na ke lintho life tseo e seng tsa bohlokoa. Ha re lumella ’nete ea Bibele hore e re tataise linthong tseo re li etsang le liqetong tsa rōna, re tla phela bophelo bo nang le morero.—Luka 11:28.

Sheba le Liproverbia 3:5, 6, 13-18 le 1 Timothea 6:9, 10.

 Re hlahlobile ka bokhutšoanyane feela hore na Bibele e araba lipotso tsena tse tšeletseng joang. Na u batla ho tseba lintho tse ling hape? Haeba u e mong oa ba “elang hloko tlhoko ea bona ea moea,” ha ho pelaelo hore u batla ho tseba lintho tse ling. Mohlomong u ipotsa lipotso tse ling tse kang tsena: ‘Haeba Molimo oa re tsotella, ke hobane’ng ha a lumeletse hore ho be le bokhopo bo bongata hakaale le mahlomola historing eohle ea batho? Nka ntlafatsa bophelo ba lelapa la ka joang?’ Bibele e araba lipotso tsena le tse ling tse ngata ka tsela e qaqileng le e khotsofatsang.

Leha ho le joalo, kajeno batho ba bangata ba leqe ho hlahloba Bibele. Ba e nka e le buka e khōlō eo ka linako tse ling ho leng thata ho e utloisisa. Na u ka thabela ho thusoa hore u fumane likarabo ka Bibeleng? Lipaki Tsa Jehova li ka u fa lintho tse peli tse ka u thusang.

Ea pele ke buka e reng Ha e le Hantle ke Eng Seo Bibele e se Rutang?, e reretsoeng ho thusa batho ba maphathaphathe hore ba hlahlobe tsela e hlakileng eo ka eona Bibele e arabang lipotso tsa bohlokoa. Ea bobeli ke lenaneo la thuto ea lehae ea Bibele e sa lefelloeng. E mong oa Lipaki Tsa Jehova ea lulang haufi le uena, ea tšoanelehang ho ruta Bibele, a ka tla lapeng la hao kapa sebakeng se seng se loketseng a ba a qeta nako e khutšoanyane a tšohla Bibele le uena beke e ’ngoe le e ’ngoe, a sa u lefise. Lenaneo lena le se le tsoetse batho ba limilione molemo lefatšeng ka bophara. Ka thabo, ba bangata ba bona ba entse qeto e reng: “Ke fumane ’nete!”

Ha ho letlotlo le leholo ho feta lena leo motho a ka le fumanang. ’Nete ea Bibele e re tšoasolla litumela-khoeleng, pherekanong le tšabong e tepeletsang. E re fa tšepo, e etsa hore re be le morero re be re lule re thabile. Jesu o ile a re: “Le tla tseba ’nete, ’me ’nete e tla le lokolla.”—Johanne 8:32.