Fetela boitsebisong

Fetela lethathamong la tse ka hare

Tanzania: Batho ba fetang ka tsela ba thahasella lingoliloeng, Dar es Salaam

 LINTLHA TSA SEHLOOHO TSA SELEMO SE FETILENG

Ho Fumana Batho Bao ho Neng ho le Thata ho ba Fumana

Ho Fumana Batho Bao ho Neng ho le Thata ho ba Fumana

LE HOJA ho paka ka ntlo le ntlo e ntse e le mokhoa o ka sehloohong oo Lipaki Tsa Jehova li phatlalatsang ’nete ea Bibele ka oona, tsela e ’ngoe e atlehang haholo mosebetsing oa ho bolela litaba tse molemo tsa ’Muso oa Molimo ke ho sebelisa litafole le litoroli tse hlophisitsoeng ka makhethe. (Mat. 24:14) Baboleli ba ’Muso ba ’nile ba sebelisa litafole le litoroli hore ba fumane batho libakeng tse phetheselang. Ho phaella moo, lefatšeng ka bophara liphutheho li rometsoe litoroli tse ka bang 250 000 tsa ho bontša lingoliloeng. Phello e bile efe?

Dar es Salaam, Tanzania, batho ba ka bang 700 ba kōpile hore ba khanneloe thuto ea Bibele ho tloha ha lenaneo le  khethehileng la ho paka libakeng tsa sechaba metseng e meholo le ne le qala ka 2014. Batho ba bangata ba thahasellang ba ’nile ba tla libokeng ’me ba atamela ho Molimo. Ka selemo se seng, batho ba tsoang linaheng tse ling tsa Afrika le mose ho maoatle ba ile ba nka lingoliloeng tse fetang 250 000 litoroling tsena tsa lingoliloeng.

Ho paka ka tsela e khethehileng libakeng tsa sechaba ho fetohile mokhoa o molemo oa ho jala peō ea ’nete Solomon Islands, moo bahoeletsi ba ka tlaase ho 2 000 ba bolelang litaba tse molemo tšimong e khōlōhali, e nang le lihlekehleke tse fetang 300. Motse-moholo oa teng, e leng Honiara, barab’abo rōna ba ile ba tsamaisa limakasine tse fetang 104 000 le libukana tse fetang 23 600, boholo ba tsona li fuoa batho ba tsoang lihlekehlekeng le metseng e thōko moo ho se nang Lipaki. Thapameng e ’ngoe, ba ile ba tsamaisa libuka tse 400 tsa Ha e le Hantle Ke’ng Seo Bibele e se Rutang? ’me batho ba 60 ba kōpa hore ba khanneloe thuto ea Bibele.

Hoseng ho hong, bo-pula-maliboho ba bang, e leng Michael le Linda ba ne ba ntse ba hlophisa toroli ea lingoliloeng haufi le lebōpo la Sehlekehleke sa Margarita, Venezuela. Monna e mong ea bitsoang Aníbal o ile a tla toroling ’me ba mo fa buka ea Seo Bibele e se Rutang. O ile a ba bolella hore ntate oa hae o ne a hlokahalletse lebōpong leo lilemong tse supileng tse fetileng le hore haesale ’mè oa hae a e-ba le khatello ea maikutlo ho tloha ka nako eo. Beke e latelang, Aníbal o ile a khutla ’me a bolella Michael le Linda hore ba ne ba ikhopotsa lefu la ntate oa hae. O ile a ntša selefouno eaba o letsetsa ’mè oa hae, a kōpa Michael hore a ke a mo tšelise, ’me o ile a fela a etsa joalo. Ho tloha ka nako eo, o ’nile a letsetsa Michael le Linda ka makhetlo a ’maloa, ’me ba mo fa litemana tse khothatsang. Molaetseng o mong oa  SMS, ’mè oa Aníbal o ile a re, “Kajeno ke ikutloa ke le betere hobane le ntšelisitse ebile le nthusitse hore ke matlafatse tumelo ea ka.”

United States ho hlophisitsoe libaka tse 127 tsa ho paka phatlalatsa litoropong tse khōlō tse 14. Likhoeling tse supileng tse qalang selemo sa tšebeletso sa 2015, ho ile ha qaloa lithuto tsa Bibele tse 8 445! Mokhoa ona oa ho paka o boetse o thusitse batho ba bangata ba neng ba se ba khaolitse ho kopanela le phutheho hore ba khutlele borapeling ba ’nete. Ka mohlala, monna e mong ea bitsoang Terry o ne a shebile ka thahasello tafole ea rōna ea lingoliloeng Los Angeles, California, kahoo banyalani ba Lipaki ba neng ba le tafoleng eo ba ile ba mo botsa hore na o kile a bala lingoliloeng tsa rōna. O ile a hlalosa hore ke Paki ea Jehova empa o ne a qetile lilemo tse ka bang ’nè a khaolitse ho kopanela le phutheho. Banyalani bao ba ile ba mo balla Ezekiele 34:11 ’me ba e tšohla le eena, moo Jehova a reng: “Ke tla batla linku tsa ka ’me ke li hlokomele.” Ba ile ba mo bolella ka websaete ea rōna le ka Khaso ea JW. Hoseng ho latelang Terry o ile a ngolla mor’abo rōna molaetsa oa e-mail, a hlalosa hore metsotsoana e seng mekae pele a bona tafole eo ea ho paka, o ne a kōpile Molimo hore a mo tšoarele ka hore ebe o hlokomolohile liboka tsa phutheho. O ne a bile a kōpile hore a thusoe ho atamela haufi le Jehova. Terry o re: “Eaba le ntumelisa ka botsoalle. Le ile la mpalla temana eo e khothatsang eaba le mpha boitsebiso boo ke bo hlokang hore ke khutlele mokhatlong oa Jehova. E ne e le karabo ea thapelo ea ka.”

Ho na le libaka tse ’nè tsa ho paka ka tsela e khethehileng libakeng tsa sechaba tse Addis Ababa, Ethiopia. Nakong ea likhoeli tse tharo, barab’abo rōna ba ile ba tsamaisa lingoliloeng tse 37 275 ’me batho ba 629 ba kōpa hore Lipaki li ba etele. E mong oa batho ba bangata ba ileng ba amohela buka ea Seo Bibele e se Rutang ke monna-moholo e mong ea ileng  a qala ho e bala hang-hang. O ne a kile a ea sekolong sa boruti ’me a e-na le lipotso tse itseng ka Jesu le ka ’Muso oa Molimo. Kahoo letsatsing le latelang o ile a khutlela toroling ea lingoliloeng hore a il’o fumana likarabo lipotsong tseo tsa hae. Letsatsing le latelang, o ile a lumela hore a khanneloe thuto ea Bibele ’me mafelo-bekeng ao o ile a ea  libokeng ka lekhetlo la pele. Hona joale o ba teng kamehla libokeng tsa rōna ’me o hatela pele hantle.

Ethiopia: Lingoliloeng tsa Seamharic li behiloe toroling, Addis Ababa

Monna e mong oa Mojuda o ile a tla toroling ea lingoliloeng Mexico eaba o botsa barab’abo rōna hore na ba na le sengoliloeng se buang ka lefu. Ba ile ba mo bolella hore ba feletsoe ke limakasine tse buang ka lefu empa ba mo fa e ’ngoe e buang ka bokamoso. Monna eo o ile a tšoara mor’abo rōna sephakeng, a re: “Ha ke batle letho ka bokamoso. Ntho eo ke e batlang feela ke ho ipolaea.” Eaba o qala ho lla. Barab’abo rōna ba ile ba mo botsa hore na ke hobane’ng ha a ikutloa joalo. O ile a bua a sisa pelo, a re: “Mor’a ka o qeta ho hlokahala.” Joale, ba ile ba mo bontša khaolo ea 7 bukeng ea Seo Bibele e se Rutang. Ba mo balla lirapa tse peli tse qalang tlas’a sehloohoana se reng, “Ha eo U mo Ratang a E-shoa” le qetellong ea khaolo eo, moo ho tšohloang tšepo ea tsoho. A amehile maikutlo, o ile a boela a tšoara mor’abo rōna sephakeng ’me a mo botsa, a re: “Na ehlile see ke ’nete?” Barab’abo rōna ba ile ba mo tiisetsa hore ka sebele Jehova o tla phethahatsa tšepiso ea hae. O ile ba botsa, a re: “Ke lokela ho etsa’ng hore ke tle ke bone mora oa ka hape?” Ba ile ba lokisetsa hore ba mo etele ha hae. Ha ba fihla ha hae, ba ile ba fumana a ba emetse ka tjantjello hore a qale ho ithuta Bibele.

Molebeli e mong ea tsamaeang ea ileng a kenya letsoho ha ho thehoa lenaneo lena la ho paka ka tsela e khethileng libakeng tsa sechaba, New York o ile a re: “Ruri Jehova o hlohonolofalitse lenaneo lena haholo! Ha lea re thusa feela hore re atlehe ho fumana batho ba likete, empa le boetse le re thusitse ho fumana batho ba bangata ba neng ba se ba sa kopanele tšebeletsong kapa ba khaotsoeng, e leng ‘linku tse lahlehileng,’ tseo hona joale li thusoang hore li khutlele lesakeng.”—Ezekiele 34:15, 16.