Fetela boitsebisong

Fetela lethathamong la tse ka hare

Ba paka ’marakeng Jakarta

 INDONESIA

Keketseho e Khōlō Indonesia

Keketseho e Khōlō Indonesia

Baruti ba likereke ba ile ba halefa ha ba utloa hore Lipaki Tsa Jehova li ngolisitsoe ka molao. Baruti ba fetang 700 ba likereke tse supileng tsa Maprostanta ba ile ba tšoara seboka Jakarta, e le hore ba phehelle ’muso hore o thibele mosebetsi oa Lipaki hape. Empa ’muso ha oa ka oa amohela kōpo eo.

Ha batho ba ntse ba utloa taba ea hore Lipaki li ngolisitsoe ka molao, ba bangata ba thahasellang ba ile ba ngolla ofisi ea lekala ba kōpa lingoliloeng le ho khanneloa thuto ea Bibele. Ka 2003, batho ba fetang 42 000 ba ile ba ba teng Sehopotsong, e leng palo e fetang ea bahoeletsi ba Indonesia ka makhetlo a mabeli. Batho ba ka bang 10 000 ba ile ba ba teng kopanong e neng e tšoaretsoe Jakarta, ho akarelletsa le mosebeletsi ea phahameng oa Lefapha la Litaba Tsa Bolumeli. Mosebeletsi eo o ile a hlolloa ha a bona batho ba baholo le bana ba sheba mangolo Libibeleng tsa bona. O ile a tiisetsa barab’abo rōna hore o ikemiselitse ho bolella batho seo e leng ’nete ka Lipaki Tsa Jehova.

Ho ngolisoa ha Lipaki ka molao ho ile ha bula monyetla oa hore baromuoa ba khutlele Indonesia. Baromuoa ba pele ba ileng ba khutla ke Josef le Herawati Neuhardt * (ba tsoang Solomon Islands), Esa le Wilhelmina Tarhonen (ba tsoang Taiwan), Rainer le Felomena Teichmann (ba tsoang Taiwan) le Bill le Nena Perrie (ba tsoang Japane). Ba ile ba lateloa ke baromuoa ba sa tsoa koetlisoa Gileade ba ileng ba abeloa ho ea sebeletsa North Sumatra, Kalimantan, North Sulawesi le libakeng tse mabapi.

“Ke ne ke thabela ho thusa liithuti hore li ntlafatse tsela eo li rutang le ho bua ka eona.”—Julianus Benig

Ka 2005, ofisi ea lekala e ile ea tšoara likolo tse peli tse  ncha tsa tšebeletso. Morupeli e mong oa Sekolo sa ho Koetlisetsoa Bosebeletsi (seo hona joale se bitsoang Sekolo sa Baevangeli ba ’Muso) e leng Julianus Benig, o ile a re: “Ke ne ke thabela ho thusa liithuti hore li ntlafatse tsela eo li rutang le ho bua ka eona, e le hore li ka sebelisoa haholoanyane ke mokhatlo.” Ba bangata ba ileng ba koetlisoa sekolong sena, hona joale ba sebeletsa e le bo-pula-maliboho ba khethehileng le balebeli ba potoloho. Boholo ba barab’abo rōna ba ileng ba koetlisoa tlelaseng ea pele ea Sekolo sa Balebeli ba Tsamaeang, * ba ne ba ile ba koetlisoa nakong ea ha mosebetsi o ntse o thibetsoe. Sekolo seo se secha se ile sa ba thusa hore ba tsoele pele ka mosebetsi oa bona ha thibelo e se e felile. Ponco Pracoyo, ea ileng a ba tlelaseng eo ea pele o re: “Sekolo seo se ile sa nthusa hore ke be le kutloelo-bohloko haholoanyane le hore ke nke likabelo tsa ka ka ho teba ke le molebeli oa potoloho. Se ne se khatholla se bile se khothatsa!”

 Ho Hlokahala Liholo Tsa ’Muso

Lilemong tse 25 tseo mosebetsi o neng o thibetsoe ka tsona, liphutheho tse ngata tsa Indonesia li ne li kopanela malapeng a barab’abo rōna. Boholo ba tsona li ne li se na chelete ea ho haha Liholo Tsa ’Muso, ebile ho ne ho se bonolo ho fumana tumello ea ho haha libaka tse ncha tsa borapeli. Empa kaha liphutheho li ne li eketseha ka potlako, ofisi ea lekala e ile ea theha Lefapha la Kaho ea Liholo Tsa ’Muso (leo hona joale le bitsoang Lefapha la Meralo le Kaho) hore le thuse moo ho nang le tlhoko ea Liholo Tsa ’Muso.

Sebaka sa pele seo ho ileng ha hahoa Holo ea ’Muso ho sona ke Nias Island e North Sumatra. Haogo’aro Gea, eo e leng khale a kopanela Phuthehong ea Gunungsitoli o re: “Ha re utloa hore re tl’o haheloa Holo ea ’Muso, re ile ra thaba haholo. Ofisi ea lekala e ile ea romela lihahi tsa baithaopi tse supileng hore li tl’o etella mosebetsi pele. Holo ea rōna e ile ea fela ka 2001.” Faonasökhi Laoli, eo e leng setho sa komiti ea kaho ea sebakeng seo o re: “Ha re ntse re kopanela malapeng a barab’abo rōna, batho ba ne ba khella Lipaki Tsa Jehova fatše. Empa ka mor’a hore re be le Holo ea ’Muso, palo ea batho ba tlang libokeng e ile ea tloha ho 20 ea nyolohela ho 40. Ka mor’a likhoeli tse 12, re ne re se re le bangata bo thibang letsatsi. Holo ea rōna ea ’Muso ke ’ona mohaho o motle ka ho fetisisa sebakeng sena, ’me batho ba se ba hlompha Lipaki Tsa Jehova.”

Holo ea ’Muso ea Bandung

Ka 2006, barab’abo rōna ba ile ba qala ho batla setša seo ba ka hahang Holo ea ’Muso ho sona, Bandung, West Java. Moholo e mong ea neng a le komiting ea kaho, e leng Singap Panjaitan o re: “Re ile ra fumana setša se loketseng ka mor’a selemo. Empa joale ho ne ho hlokahala hore re fumane tumello ea baahisani ba 60 bao e seng Lipaki, pele ba boholong ba re lumella hore re hahe sebakeng seo. Baahisani ba 76 ba ile ba re lumella, ho akarelletsa le ’mè e mong eo qalong a neng a hanyetsa Lipaki. Ha holo e fela, re ile ra mema  baahisani le majoro oa Bandung hore ba tl’o e bona. Majoro o ile a re: ‘Sebaka sena se setle se hloekileng sa borapeli, se behela likereke tse ling mohlala o motle.’” Holo eo ea ’Muso e mekato e ’meli, e ile ea neheloa ka 2010.

Ho tloha ka 2001, ho se ho hahiloe Liholo Tsa ’Muso tse fetang 100 Indonesia, empa ho ntse ho hlokahala tse eketsehileng.

^ par. 5 Pale ea bophelo ea Herawati Neuhardt e hlaha Tsoheng! ea February 2011.

^ par. 6 Hona joale se bitsoa Sekolo sa Balebeli ba Potoloho le Basali ba Bona.