Fetela boitsebisong

Litaelo Tsa Seboka sa Bophelo ba Bokreste le Tšebeletso ea Rona

Litaelo Tsa Seboka sa Bophelo ba Bokreste le Tšebeletso ea Rona

Tse ka Hare

 

Lirapa

Selelekela

 2

Matlotlo a Tsoang Bibeleng

 3

E-ba Mafolofolo Mosebetsing oa Boboleli

 4

Phela Joaloka Mokreste

 5

Lintlha Tse Phethelang

 6

Ikitlaelletse ho Bala le ho Ruta 7

 7

Keletso

 8

Nako

 9

Ketelo ea Molebeli oa Potoloho

 10

Beke ea Kopano

 11

Beke ea Sehopotso

 12

Molebeli oa Seboka sa Bophelo ba Bokreste le Tšebeletso ea Rona

 13

Molula-setulo oa Seboka sa Bophelo ba Bokreste le Tšebeletso ea Rona

 14

Mohokahanyi oa Sehlopha sa Baholo

 15

Moeletsi ea Thusang

 16

Likolo Tse Eketsehileng

 17

Livideo

 18

1. Seboka sa Bophelo ba Bokreste le Tšebeletso ea Rona se tla tšoaroa ka tsela e boletsoeng ho Bukana ea Seboka sa Bophelo ba Bokreste le Tšebeletso ea Rona ebile e le tumellanong le litaelo tse latelang. Bahoeletsi bohle ba lokela ho khothalletsoa ho ingolisetsa ho fana ka lipuo. Le liithuti tse seng li tla libokeng kamehla li bile li phela ka melao-motheo ea Bibele li ka ingolisa.​—⁠be leq. 282.

 2. Selelekela: Metsotso e 3 kapa ka tlaase ho moo. Beke e ’ngoe le e ’ngoe, ka mor’a pina e bulang le thapelo, molula-setulo oa Seboka sa Bophelo ba Bokreste le Tšebeletso ea Rona o tla thusa phutheho hore e be le tjantjello ea ho batla ho mamela ha liboka li ntse li tsoela pele, a be a bolele e ’ngoe ea lipotso tse tla tšohloa karolong ea Matlotlo a Tsoang Bibeleng.

 3. Matlotlo a Tsoang Bibeleng:

  • Puo: Metsotso e 10. Bukana ea Seboka sa Bophelo ba Bokreste le Tšebeletso ea Rona e bontša sehlooho le kemiso e nang le lintlha tse peli kapa tse tharo tsa mantlha. Puo ena e lokela ho fuoa moholo kapa mohlanka ea sebeletsang ea tšoanelehang. Haeba ho tlʼo baloa lengolo le lecha la Bibele ’malong oa Bibele oa beke le beke, ho tla bapaloa video e re behang leseling ka lona. Sebui se ka bolela lintlha tse hlahileng videong tse lumellanang le sehlooho. Leha ho le joalo, se lokela ho tiisa hore se bua ka litaba tsohle tse boletsoeng bukaneng ea liboka. Ho feta moo, se lokela ho kenyelletsa litšoantšo tse bukaneng ea liboka, kaha li etselitsoe ho hlakisa lintlha tse tšohloang.

  •   Batlisisa Matlotlo a Patiloeng: Metsotso e 8. Ke puo ea lipotso le likarabo e se nang selelekela le sephetho. E lokela ho fuoa moholo kapa mohlanka ea sebeletsang ea tšoanelehang. O tla bona hore na o arola nako joang ha a botsa lipotso tsena tse ’nè ho latela hore na li ama phutheho joang. Leha ho le joalo, o lokela ho botsa lipotso kaofela. Hape o tla khetha hore na ho baloe mangolo a mabeli a qalang kapa che. Motho ea arabang o lokela ho nka metsotsoana e 30 kapa ka tlaase ho moo.

  • ’Malo oa Bibele: Metsotso e 4 kapa ka tlaase ho moo. Puo ena e tla fuoa mor’abo rona. Seithuti se lokela ho bala litemana tseo se li abetsoeng se sa etse kenyelletso kapa sephetho. Ka ho khetheha, molula-setulo oa seboka o tla thusa liithuti hore li bale ka nepo, li utloisise seo li se balang, li bale li sa khitlele, li hatise moo ho loketseng, li feto-fetole molumo oa lentsoe, li khefutse moo ho hlokahalang ’me li bale ka tsela ea tlhaho.

  4. E-⁠ba Mafolofolo Mosebetsing oa Boboleli: Metsotso e 15 kapa ka tlaase ho moo. Karolo ena e reretsoe ho fa bohle monyetla oa ho itloaetsa seo ba tla se bua tšimong le ho ntlafatsa bokhoni ba bona ba ho bolela le ho ruta. Ha liithuti li fana ka lipuo li lokela ho bua ka lintlha tse hlahang leqepheng la pele la Bukana ea Seboka sa Bophelo ba Bokreste le Tšebeletso ea Rona. Liithuti li ka khetha hore na li sebelisa sengoliloeng kapa video e hlahang ho JW Library app tlas’a Teaching Toolbox. Bukana ea Seboka sa Bophelo ba Bokreste le Tšebeletso ea Rona ea bolela hore na motho a fane ka puo nako e kae. Ka linako tse ling e ka ba ea bolela lintho tseo a hlokang ho li etsa puong. Liithuti ha lia lokela ho ikenyetsa lintho tse ling ho sa hlokahale hore feela li koale nako. Ho ka etsahala hore lipuo tse lokiselitsoeng hantle li fele pele ho nako ka motsotso o le mong kapa ho feta. Baholo le bona ba ka fuoa lipuo tsena haeba ho hlokahala.

  • Livideo tse bontšang mehlala ea seo re ka se buang: Libekeng tse ling ho tla bapaloa livideo tse bontšang mehlala ea hore na re ka bua le batho joang. E tla ba video ea leeto la pele, leeto la pele la ho boela le leeto la bobeli la ho boela. Karolo ena e tla etsoa ke molula-setulo.

  • Leeto la Pele: Puo ena e ka fuoa mora kapa morali oabo rona. Mothusi ha ea lokela ho ba motho oa bong bo fapaneng ntle leha e le setho sa lelapa. Mong’a puo a ka khetha hore na ba tla lula kapa ba tla ema. O lokela ho lumelisa ka tsela e loketseng sebaka. A be a sebelise mehlala e fanoeng bukaneng ea seboka.

  • Leeto la pele la ho Boela: Puo ena e ka fuoa mora kapa morali oabo rona. Mothusi ha ea lokela ho ba motho oa bong bo fapaneng. (km 5/97 leq. 3) Mong’a puo a ka khetha hore na ba tla lula kapa ba tla ema. O lokela ho bontša seo re ka se buang ha re khutlela ho motho ka lekhetlo la pele. A be a sebelise mehlala e fanoeng bukaneng ea seboka.

  • Leeto la bobeli la ho Boela: Puo ena e ka fuoa mora kapa morali oabo rona. Mothusi ha ea lokela ho ba motho oa bong bo fapaneng. (km 5/97 leq. 3) Mong’a puo a ka khetha hore na ba tla lula kapa ba tla ema. O lokela ho bontša seo re ka se buang ha re khutlela ho motho ka lekhetlo la bobeli. A be a sebelise mehlala e fanoeng bukaneng ea seboka.

  • Thuto ea Bibele: Puo ena e ka fuoa mora kapa morali oabo rona. Mothusi ha ea lokela ho ba motho oa bong bo fapaneng. (km 5/97 leq. 3) Mong’a puo a ka khetha hore na ba tla lula kapa ba tla ema. Puo ena ha ea lokela ho fanoa joalokaha eka ke hona thuto e qalang. Ha ho hlokahale kenyelletso kapa sephetho ntle le haeba ka ho toba seithuti se sebeletsa lintlheng tseo. Seithuti se ka khetha hore na se bala lirapa kaofela kapa che. Puo ena e lokela ho bontša tsela e nepahetseng ea ho khanna lithuto.

  •   Puo: Ke puo e lokelang ho fanoa ke mor’abo rona a sa botse phutheho lipotso.

  5. Phela Joaloka Mokreste: Ka mor’a pina e bulang, metsotsong e 15 e qalang, ho tla ba le puo e le ’ngoe kapa tse peli tse thusang bamameli ho phela ka tsela eo Jehova a e batlang. Lipuo tsena li ka fuoa baholo kapa bahlanka ba sebeletsang ba tšoanelehang, ntle le ha ho e-⁠na le litaelo tse ling kapa e le litlhoko tsa phutheho kaha li fuoa baholo feela.

  • Thuto ea Bibele ea Phutheho: Metsotso e 30. E lokela ho fuoa moholo ea tšoanelehang. (Liphutheho tse nang le palo e fokolang ea baholo li ka sebelisa bahlanka ba sebeletsang ba tšoanelehang ha ho hlokahala.) Sehlopha sa baholo se lokela ho khetha hore na ke bo-mang ba tšoanelehang ho khanna Thuto ea Bibele ea Phutheho. Ba khethiloeng ba lokela ho khona ho etella pele ka tsela e molemo e le hore thuto e se ke ea ja nako, ba hatise mangolo a sehlooho ba be ba thuse bohle ho utloisisa hore na ke joang ba ka sebelisang lintlha tse ithutiloeng. Tataiso e fanoeng bakeng sa ho khanna Thuto ea Molula-Qhooa e ka ba thusa haholo. Ha ho khoneha, bakhanni le babali ba lokela ho fetoloa beke le beke. Haeba molula-setulo oa Seboka sa Bophelo ba Bokreste le Tšebeletso ea Rona a re Thuto ea Bibele ea Phutheho e lokela ho khutsufatsoa, mokhanni ke eena ea tla etsa qeto ea hore na o e khutsufatsa joang. A ka ’na a etsa qeto ea hore ho se ke ha baloa lirapa tse ling.

  6. Lintlha Tse Phethelang: Metsotso e 3 kapa ka tlaase ho moo. Molula-setulo oa Seboka sa Bophelo ba Bokreste le Tšebeletso ea Rona o tla bolela lintlha tseo ka ho khetheha e leng tsa bohlokoa sebokeng seo. O lokela ho hlaba bamameli malotsana ka ntlha e hlahang ho Leqephe la Likarabo Tsa Seboka sa Bophelo ba Bokreste le Tšebeletso ea Rona. A be a botse potso e tla botsoa sebokeng sa beke e tlang. Haeba nako e mo lumella, a ka ’na a bolela mabitso a liithuti tse abetsoeng lipuo bekeng e tlang. O lokela ho etsa litsebiso leha e le life tse hlokahalang nakong ea lintlha tsa hae tse phethelang, hape a bale mangolo leha e le afe ao ho hlokahalang hore a balloe phutheho ntle leha ho ka fanoa ka litaelo tse ling. Lintlha tse tloaelehileng, tse kang litokisetso tsa tšebeletso ea tšimo le ho hloekisa, ha lia lokela ho boleloa sethaleng empa li lokela ho behoa lematjaneng la litsebiso. Haeba ho bonahala hore ho ke ke ha e-⁠ba le nako e lekaneng ea ho etsa litsebiso kapa ea ho bala mangolo nakong ea lintlha tse phethelang tsa molula-setulo, o lokela ho kopa barab’abo rona ba fanang ka lipuo karolong ea Phela Joaloka Mokreste hore ba khutsufatse lipuo tsa bona haeba ho hlokahala. (Shebang  serapa sa 5 le  sa 9.) Seboka se tla koaloa ka pina le thapelo.

 7. Ikitlaelletse ho Bala le ho Ruta: Ho qala bekeng ea la 7 January, 2019, molula-setulo oa seboka sa Bophelo ba Bokreste le Tšebeletso ea rona o lokela sebelisa bukana ea Ho Bala le ho Ruta ha a eletsa liithuti. Ha seithuti se lokisetsa, se lokela ho bala khaolo e ngotsoeng ka masakaneng pel’a puo ea sona bukaneng ea seboka. Bekeng ea pele ea khoeli, molula-setulo o tla buisana le bamameli ka khaolo e le ’ngoe ea bukana ea Ho Bala le ho Ruta. Seithuti ke sona se tla itlatsetsa karolo ea “Tlaleho ea Hore U Sebelitse Joang.”

  8. Keletso: Ka mor’a puo ka ’ngoe, molula-setulo o na le hoo e ka bang motsotso o le mong ho babatsa seithuti le ho se fa keletso e thehiloeng bukaneng ea Ho Bala le ho Ruta. Ha molula-setulo a etsa kenyelletso e suthelang puo ea seithuti, ha aa lokela ho bolela hore na seithuti se sebeletsa khaolong efe. Leha ho le joalo, ha puo e fela, ka mor’a hore molula-setulo a babatse seithuti ka ho loketseng, joale a ka bolela hore na se ne se ithuta khaolo efe a be a bolele hore na se ipabotse hokae ho eona kapa a hlalose ka mosa hore na ke hobane’ng ha se lokela ho ntlafatsa. Ha ho hlokahala, a ka fana ka keletso e ’ngoe e ka thusang seithuti kapa phutheho. Haeba ho na le lintlha tse ling tseo molula-setulo a hlokang ho li bua le seithuti, a ka se tšoarela  k’honeng ka mor’a liboka kapa ka nako e ’ngoe a bue le eena a ipapisitse le litaba tse hlahang bukaneng ea Ho Bala le ho Ruta kapa bukeng ea Sekolo sa Tšebeletso.​—⁠Litaelo tse filoeng molebeli oa Seboka sa Bophelo ba Bokreste le Tšebeletso ea Rona le mothusi oa hae li hlaha  serapeng sa 13 le  sa 16.

    9. Nako: Ha ho sebui se lokelang ho ja nako, le molula-setulo oa Seboka sa Bophelo ba Bokreste le Tšebeletso ea Rona ha aa lokela ho e ja. Liithuti li lokela ho emisoa ka bohlale ha li ja nako. Haeba libui likarolong tse ling tsa seboka sena li ja nako, moeletsi ea thusang o lokela ho li eletsa ka thoko. Seboka sohle, hammoho le lipina le thapelo, se lokela ho nka hora le metsotso e 45.

 10. Ketelo ea Molebeli oa Potoloho: Ha phutheho e e-⁠na le ketelo ea molebeli oa potoloho, liboka li lokela ho tsoela pele joalokaha ho boletsoe ho Bukana ea Seboka sa Bophelo ba Bokreste le Tšebeletso ea Rona ntle le linthong tse latelang: Thuto ea Bibele ea Phutheho e tla nkeloa sebaka ke puo ea tšebeletso ea molebeli oa potoloho ea metsotso e 30. Pele ho puo ea tšebeletso, molula-setulo o tla hlahloba lintlha tse ithutiloeng sebokeng sena a be a bolele lintlha tse tla ithutoa bekeng e tlang, ’me o tla etsa litsebiso tse hlokahalang ebe ka mor’a moo o bitsa molebeli oa potoloho. Ka mor’a puo ea tšebeletso, molebeli oa potoloho o tla phetha seboka ka pina e khethiloeng ke eena. Nakong ea ketelo ea molebeli oa potoloho, ha hoa lokela ho tšoaroa litlelase tsa puo e sebelisoang phuthehong. Sehlopha se buang puo e ’ngoe se ka tšoara seboka sa sona esita le ha molebeli oa potoloho a etetse phutheho e hlokometseng sehlopha seo. Leha ho le joalo, sehlopha sena se lokela ho mamela puo ea tšebeletso ea molebeli oa potoloho.

 11. Beke ea Kopano: Ho ke ke ha e-⁠ba le liboka bekeng ea kopano ea potoloho kapa ea setereke. Batho ka bomong kapa e le malapa ba ka ipalla lintlha tse lokelang ho tšohloa sebokeng sa beke eo.

 12. Beke ea Sehopotso: Haeba Sehopotso se le har’a beke ho ke ke ha e-⁠ba le Seboka sa Bophelo ba Bokreste le Tšebeletso ea Rona. Empa seboka sa tšimo sona se ka tšoaroa letsatsing la Sehopotso.

  13. Molebeli oa Seboka sa Bophelo ba Bokreste le Tšebeletso ea Rona: Sehlopha sa baholo ke sona se tla khetha moholo eo e tla ba molebeli oa Seboka sa Bophelo ba Bokreste le Tšebeletso ea Rona. Boikarabelo ba hae ke ho tiisa hore seboka sena se hlophisitsoe hantle se bile se tsamaisoa ho latela litaelo tse fanoeng mona. Ho lokela ho be le puisano e ntle pakeng tsa hae le moeletsi ea thusang. Hang ha Bukana ea Seboka sa Bophelo ba Bokreste le Tšebeletso ea Rona e se e fumaneha bakeng sa khoeli e itseng, molebeli o tla aba lipuo tsa liithuti bakeng sa khoeli eo. (Sheba  serapa sa 4.) Seithuti se lokela ho fuoa puo se be se tsebisoe ntlha eo se sebeletsang ho eona, bonyane libeke tse tharo pele ho letsatsi leo se tla fana ka puo ka lona ho sebelisoa foromo ea Puo Sebokeng sa Bophelo le Tšebeletso ea Rona (S-89).

 14. Molula-setulo oa Seboka sa Bophelo ba Bokreste le Tšebeletso ea Rona: Beke e ’ngoe le e ’ngoe ho tla ba le moholo eo e tla ba molula-setulo oa Seboka sa Bophelo ba Bokreste le Tšebeletso ea Rona. (Liphutheho tse nang le palo e fokolang ea baholo li ka sebelisa bahlanka ba sebeletsang ba tšoanelehang ha ho hlokahala.) Mosebetsi oa hae e tla ba ho etsa selelekela le lintlha tse phethelang. O tla boela a buisane le bamameli ka livideo tsa mehlala ea seo re ka se buang ha re le tšimong le livideo tse buang ka bukana ea Ho Bala le ho Ruta. O tla boela a etse kenyelletso e suthelang lipuo tse ling tsohle, ’me ha sehlopha sa baholo se le se nyane, mohlomong  a ka abeloa ho fana ka puo likarolong tse ling sebokeng sena. Ha aa lokela ho ea lolololo lipakeng tsa lipuo. Sehlopha sa baholo se tla etsa qeto ea hore na ke baholo bafe ba tšoanelehang ho phetha mosebetsi ona. Baholo ba tšoanelehang ba ka chenchana mosebetsing oa ho ba molula-setulo. Ho itšetlehile ka maemo a sebaka ka seng, molebeli oa Seboka sa Bophelo ba Bokreste le Tšebeletso ea Rona e ka ba molula-setulo ka makhetlo a mangata ho feta baholo ba bang ba tšoanelehang. Haeba moholo a tšoaneleha ho khanna Thuto ea Bibele ea Phutheho, ho ntse ho ka etsahala hore ebe oa tšoaneleha ho ba molula-setulo sebokeng sena. Leha ho le joalo, le hopole hore ho tla hlokahala hore moholo eo e leng molula-setulo a babatse a be a eletse liithuti. Molula-setulo o boetse o ikarabella bakeng sa ho tiisa hore seboka sena se fela ka nako. (Sheba  serapa sa 6 le  sa 9.) Haeba molula-setulo a rata ’me ho e-⁠na le sebaka se lekaneng sethaleng, a ka sebelisa sebuela-hole se hlonngoeng ho stand ha a etsa kenyelletso e suthelang puo ka ’ngoe ha mor’abo rona ea fanang ka puo a e-⁠ba malala-a-laotsoe sethaleng sa sebui. Kapa, molula-setulo a ka khetha ho lula tafoleng sethaleng ha a etsa kenyelletso e suthelang lipuo tsa seithuti le ha a fana ka keletso. Sena se ka boloka nako.

 15. Mohokahanyi oa Sehlopha sa Baholo: Mohokahanyi oa sehlopha sa baholo o tla aba lipuo tsohle sebokeng sena, ntle le lipuo tsa liithuti. O tla khetha hore na ke mang eo e tla ba molula-setulo oa seboka beke ka ’ngoe. Empa o lokela ho khetha ho bao sehlopha sa baholo sa lumellaneng ka bona. Mohokahanyi oa sehlopha sa baholo o lokela ho sebetsa ’moho le molebeli oa Seboka sa Bophelo ba Bokreste le Tšebeletso ea Rona ho tiisa hore leqephe la lipuo bakeng sa seboka sohle le behiloe lematjaneng la litsebiso.

  16. Moeletsi ea Thusang: Haeba ho khoneha, ho ka ba molemo hore mosebetsi ona o abeloe moholo eo e leng sebui se nang le boiphihlelo. Boikarabelo ba moeletsi ea thusang ke ho eletsa baholo le bahlanka ba sebeletsang ka thoko haeba ho hlokahala bakeng sa lipuo leha e le life tseo ba fanang ka tsona, tse kang lipuo Sebokeng sa Bophelo ba Bokreste le Tšebeletso ea Rona, lipuo tsa phatlalatsa, le ho khanna kapa ho bala lirapa thutong ea Molula-Qhooa kapa Thutong ea Bibele ea Phutheho. (Sheba  serapa sa 9.) Haeba ho e-⁠na le baholo ba bangata phuthehong bao e leng libui le mesuoe e hloahloa, joale baholo ba tšoanelehang ba ka chenchana selemo le selemo. Moeletsi ea thusang a ka fana ka keletso hafeela ho hlokahala, e seng ka mor’a puo e ’ngoe le e ’ngoe.

 17. Likolo Tse Eketsehileng: Haeba phutheho e e-⁠na le liithuti tse ngata, e ka ba le sekolo sa pele le sa bobeli bakeng sa lipuo tsa liithuti. Sekolo ka seng se lokela ho ba le moeletsi ea tšoanelehang, ’me ho ka ba molemo ha e ka ba moholo. Mohlanka ea sebeletsang ea tšoanelehang a ka koala sekheo. Sehlopha sa baholo se lokela ho etsa qeto hore na ke bo-mang ba ka etsang mosebetsi ona le hore na ba lokela ho chenchana kapa che. Moeletsi o lokela ho latela litaelo tse boletsoeng  serapeng sa 8. Haeba ho e-⁠na le likolo tse ling, liithuti li lokela ho koptjoa hore li ee moo ho tšoareloang likolo tsena ka mor’a karolo ea Batlisisa Matlotlo a Patiloeng. Bohle ba tla khutlela ka holong e kholo ka mor’a karolo ea E-⁠ba Mafolofolo Mosebetsing oa Boboleli. Haeba ho khoneha, bohle ba likolong tse ling ba lokela ho shebella kapa ho mamela livideo ba ntse ba le hona moo. Ho seng joalo moeletsi ea thusang o lokela ho ba bapalla eona ba be ba buisane ka eona ba ntse ba le kamoo.

 18. Livideo: Ho tla shebelloa livideo tse khethiloeng sebokeng sena. Livideo tsa seboka sena sa har’a beke li tla fumaneha ho JW Library app ’me li ka bapaloa ho lisebelisoa tse fapa-fapaneng. Ka linako tse ling, livideo tse kang tsa mehlala ea seo re ka se buang le batho li ka bapaloa sebokeng sa tšimo ka mor’a hore li bapaloe Sebokeng sa Bophelo ba Bokreste le Tšebeletso ea Rona.