Lillo Tsa Jeremia 5:1-22

5  Jehova, hopola se etsahetseng ho rōna.+ U talime ’me u bone nyeliso ea rōna.+   Lefa la rōna le nehiloe basele, matlo a rōna a nehiloe basele.+   Re fetohile likhutsana feela tse se nang ntate.+ Bo-’m ’a rōna ba joaloka bahlolohali.+   Re ile ra lokela ho noa metsi a rōna ka chelete.+ Patsi ea rōna e kena ka tefello.   Re behiloe merebele.+ Re tepeletse. Ha ho phomolo e setseng bakeng sa rōna.+   Re otlolletse letsoho+ Egepeta;+ le Assyria,+ e le hore re fumane khotsofalo ka bohobe.   Baholo-holo ba rōna ke bona ba entseng sebe.+ Ha ba eo. Ha e le rōna, re ile ra lokela ho jara liphoso tsa bona.+   Re busitsoe ke bahlanka.+ Ha ho ea re tlosang matsohong a bona.+   Re tlisa bohobe ba rōna ka ho beha moea oa rōna kotsing,+ ka lebaka la sabole ea lefeelleng. 10  Letlalo la rōna le chesa joaloka sebōpi, ka lebaka la bohloko ba tlala.+ 11  Ba kokobelitse basali ba Sione,+ baroetsana metseng ea Juda. 12  Likhosana li fanyehiloe ka matsoho a tsona.+ Esita le lifahleho tsa banna-baholo ha lia hlomphuoa.+ 13  Esita le bahlankana ba phahamisitse leloala la letsoho,+ ’me bashanyana ba ile ba khoptjoa ka tlas’a patsi.+ 14  Banna-baholo ba felile esita le ka ntle ho heke,+ bahlankana ba felile ’minong oa bona oa liletsa.+ 15  Thabo e khaphatsehang ea lipelo tsa rōna e felile. Motjeko oa rōna o fetotsoe ho siama feela.+ 16  Moqhaka oa lihlooho tsa rōna o oele.+ Joale, ho malimabe rōna, hobane re entse sebe!+ 17  Ka lebaka lena lipelo tsa rōna lia kula.+ Ka lebaka la lintho tsena mahlo a rōna a fifetse,+ 18  Ka lebaka la thaba ea Sione e entsoeng lesupi;+ liphokojoe li tsamaile ho eona.+ 19  Ha e le uena, Jehova, u tla lula ho isa nakong e sa lekanyetsoang.+ Terone ea hao e teng ho tloha molokong o mong ka mor’a o mong.+ 20  Ke hobane’ng ha u re lebala ka ho sa feleng,+ ha u re tlohela ka matsatsi a malelele?+ 21  Re khutlisetse+ ho uena, Jehova, ’me re tla khutla hang-hang. Re tlisetse matsatsi a macha joaloka khale.+ 22  Leha ho le joalo, ka sebele u re lahlile.+ U ’nile ua re halefela haholo.+

Mengolo e Botlaaseng ba Leqephe