Johanne 19:1-42

19  Ka hona, ka nako eo, Pilato a nka Jesu ’me a mo shapa.+  Eaba masole a loha moqhaka oa meutloa a mo roesa oona ’me a mo apesa seaparo+ sa ka ntle se pherese;  ’me a qala ho nyolohela ho eena a re: “Lumela, uena Morena oa Bajuda!” Hape, a ne a mo jabela sefahlehong.+  Pilato a boela a tsoela ka ntle eaba o re ho bona: “Bonang! Ke mo tlisa ho lōna ka ntle e le hore le tsebe hore ha ke fumane molato ho eena.”+  Ka lebaka leo Jesu a tsoela ka ntle, a roetse moqhaka o meutloa ’me a apere seaparo sa ka ntle se pherese. A re ho bona: “Bonang! Monna!”  Leha ho le joalo, ha baprista ba ka sehloohong le balaoli ba mo bona, ba hooa, ba re: “Mo khokhothele thupeng! Mo khokhothele+ thupeng!” Pilato a re ho bona: “Mo nkeng le mo khokhothele thupeng, kaha ’na ha ke fumane molato leha e le ofe ho eena.”+  Bajuda ba mo araba: “Re na le molao,+ ’me ho ea ka molao oo o tšoanela ho shoa, hobane o ikentse mor’a+ Molimo.”  Ka hona, ha Pilato a utloa polelo ena, a tšoha haholo;  eaba o kena ka tlung ea ’muso ea ’musisi hape ’me o re ho Jesu: “U tsoa hokae?” Empa Jesu a se ke a mo fa karabo.+ 10  Kahoo Pilato a re ho eena: “Na ha u mpuise?+ Na ha u tsebe hore ke na le matla a ho u lokolla ’me ke na le matla a ho u khokhothela thupeng?” 11  Jesu a mo araba: “U ka be u se na matla ho hang khahlanong le ’na hoja u ne u sa a nehoa ho tsoa holimo.+ Ke ka lebaka lena motho ea nehelaneng ka ’na ho uena a nang le sebe se seholo.” 12  Ka lebaka lena Pilato a ’na a tsoela pele a batla kamoo a ka mo lokollang kateng. Empa Bajuda ba hooa, ba re: “Haeba u lokolla monna enoa, ha u motsoalle oa Cesare. Motho e mong le e mong ea iketsang morena o bua Cesare hampe.”+ 13  Ka hona Pilato, ka mor’a ho utloa mantsoe ana, a tlisa Jesu ka ntle, ’me a lula setulong sa kahlolo sebakeng se bitsoang Mokato oa Majoe, empa, ka Seheberu, Gabbatha. 14  Joale e ne e le tokisetso+ ea paseka; e ne e ka ba hora ea botšelela. Eaba o re ho Bajuda: “Bonang! Morena oa lōna!” 15  Leha ho le joalo, ba hooa: “Mo tlose! Mo tlose! Mo khokhothele thupeng!” Pilato a re ho bona: “Ke khokhothele morena oa lōna thupeng?” Baprista ba ka sehloohong ba araba: “Ha re na morena haese Cesare.”+ 16  Ka hona, ka nako eo, a nehelana ka eena ho bona hore a khokhotheloe+ thupeng. Joale ba nka boikarabelo ka Jesu. 17  A itjaretse+ thupa ea tlhokofatso, a tsoa+ ho ea moo ho thoeng ke Sebaka sa Lehata, se bitsoang Golgotha ka Seheberu;+ 18  ’me moo ba mo khokhothela+ thupeng, le banna ba bang ba babeli hammoho le eena, e mong ka lehlakoreng lena ’me e mong ka ho lane, empa Jesu a le hare.+ 19  Hape Pilato a ngola mongolo ’me a o beha thupeng ea tlhokofatso. O ne o ngotsoe: “Jesu Monazaretha Morena oa Bajuda.”+ 20  Ka hona Bajuda ba bangata ba bala mongolo ona, hobane sebaka seo Jesu a neng a khokhothetsoe thupeng ho sona se ne se le haufi le motse;+ ’me o ne o ngotsoe ka Seheberu, ka Selatine, ka Segerike. 21  Leha ho le joalo, baprista ba ka sehloohong ba Bajuda ba qala ho re ho Pilato: “U se ke ua ngola ‘Morena oa Bajuda,’ empa hore o itse, ‘Ke ’na Morena oa Bajuda.’” 22  Pilato a araba: “Seo ke se ngotseng ke se ngotse.” 23  Joale ha masole a khokhothetse Jesu thupeng, a nka liaparo tsa hae tsa ka ntle ’me a li etsa likarolo tse ’nè, karolo bakeng sa lesole ka leng, le seaparo sa ka hare. Empa seaparo sa ka hare se ne se se na mōrōko, se lohiloe ho tloha holimo ho theosa le bolelele+ ba sona. 24  Ka hona a buisana a re: “A re se keng ra se tabola, empa re se etsetseng qeto ka lotho hore na e tla ba sa mang.” Sena e ne e le hore lengolo le ka phethahala: “Ba arolelane liaparo tsa ka tsa ka ntle, ’me ba lahla lotho+ bakeng sa liaparo tsa ka.” Kahoo ka sebele masole a ile a etsa lintho tsena. 25  Leha ho le joalo, haufi le thupa ea tlhokofatso ea Jesu, ho ne ho eme ’m ’ae+ le morali’abo ’m ’ae; Maria+ mosali oa Clopase, le Maria Magdalena.+ 26  Ka hona Jesu, ha a bona ’m ’ae le morutuoa eo a neng a mo rata+ ba eme haufi, a re ho ’m ’ae: “Mosali, bona! Mora oa hao!” 27  Ka mor’a moo a re ho morutuoa eo: “Bona! ’M’ao!” Ho tloha horeng eo ho ea pele morutuoa eo a mo nkela lapeng la hae. 28  Ka mor’a sena, ha Jesu a tseba hore joale lintho tsohle li ne li phethehile, e le hore lengolo le ka phethahala a re: “Ke nyoriloe.”+ 29  Sejana se ne se lutse moo se tletse veine e bolila. Ka hona ba beha seponche se tletseng veine e bolila lehlakeng la hysopa ’me ba se tlisa molomong+ oa hae. 30  Joale, ha a amohetse veine eo e bolila, Jesu a re: “Ho phethehile!”+ ’me, ha a inamisa hlooho, a nehelana ka moea+ oa hae. 31  Joale Bajuda, kaha e ne e le Tokisetso,+ e le hore litopo li se ke tsa sala+ lithupeng tsa tlhokofatso ka Sabatha, (kaha letsatsi la Sabatha eo e ne e le le leholo,)+ ba kōpa Pilato hore ba rojoe meomo le hore litopo tseo li tlosoe. 32  Ka hona, masole a tla, ’me a roba meomo ea monna oa pele le ea monna e mong ea neng a khokhothetsoe thupeng le eena. 33  Empa ha a tla ho Jesu, kaha a ile a bona hore o se a shoele, a se ke a mo roba meomo. 34  Empa leha ho le joalo le leng la masole la mo hlaba lehlakore ka lerumo,+ ’me kapele-pele ha tsoa mali le metsi. 35  Ea ho boneng o pakile, ’me bopaki ba hae ke ba ’nete, ’me monna eo oa tseba hore o bolela lintho tsa ’nete, e le hore le lōna le ka lumela.+ 36  Ha e le hantle, lintho tsena li ile tsa etsahala e le hore lengolo le phethahale: “Ha ho lesapo la hae le tla silakanngoa.”+ 37  Hape, lengolo le fapaneng le re: “Ba tla talima Eo ba mo hlabileng.”+ 38  Joale ka mor’a lintho tsena Josefa ea tsoang Arimathea, eo e neng e le morutuoa oa Jesu empa oa sephiri ka lebaka la ho tšaba Bajuda,+ a kōpa Pilato hore a tlose setopo sa Jesu; ’me Pilato a mo fa tumello.+ Ka hona a tla ’me a tlosa+ setopo sa hae. 39  Nikodemase le eena, monna ea ileng a tla ho eena bosiu ka lekhetlo la pele, a tlisa moqolo oa myra le makhala, hoo e ka bang liponto tse lekholo tsa oona.+ 40  Kahoo ba nka setopo sa Jesu ’me ba se tlama ka masela a tlamisang a nang le linōko,+ hantle feela ka tsela eo Bajuda ba nang le tloaelo ea ho lokisetsa lepato ka eona. 41  Hape, sebakeng seo a neng a khokhothetsoe thupeng ho sona ho ne ho e-na le serapa, ’me serapeng seo ho e-na le lebitla+ la khopotso le lecha, leo ho neng ho e-s’o be le ea kileng a behoa ka ho lona. 42  Joale, ka lebaka la tokisetso+ ea Bajuda, ba beha Jesu moo, hobane lebitla la khopotso le ne le le haufi.

Mengolo e Botlaaseng ba Leqephe