Ezekiele 27:1-36

27  Lentsoe la Jehova la boela la hlaha ho ’na, la re:  “Ha e le uena, mor’a motho, bina koli-ea-malla malebana le Tyre,+  ’me u tla re ho Tyre,“‘Uena ea lulang moo ho kenoang teng leoatleng,+ mohoebi oa mosali oa lichaba bakeng sa lihlekehleke tse ngata,+ sena ke seo ’Musi Morena Jehova a se boletseng: “Uena Tyre, u itse, ‘Ke phethahetse ka botle.’+  Libaka tsa hao li har’a maoatle.+ Lihahi tsa hao li entse hore botle ba hao e be bo phethahetseng.+  Li u etselitse mapolanka ka likoqo tsa junipere tse tsoang Senire.+ Li nkile kedare e tsoang Lebanone+ hore li u etsetse palo e tšehetsang seile ea sekepe.  Li entse masokoana a hao a sekepe ka lifate tsa litonanahali tse tsoang Bashane. Sefuba sa sekepe sa hao li se entse ka lenaka la tlou ka lehong la kyprese, le tsoang lihlekehlekeng tsa Kitime.+  Lesela la hao le aliloeng ke line e mebala e sa tšoaneng e tsoang Egepeta,+ e le hore e be seile ea hao. Seaparo sa hao se khabileng ke tšoele e putsoa+ le boea bo fetotsoeng ’mala hore bo be bopherese bo bofubelu+ ho tsoa lihlekehlekeng tsa Elisha.+  “‘“Baahi ba Sidone+ le ba Arvade+ ba fetohile basoki ba hao. Litsebi tsa hao,+ Uena Tyre, li ho uena; e ne e le basesisi ba likepe tsa hao.+  Esita le banna-baholo ba Gebale+ le litsebi tsa eona ho uena e bile ba thibang matlere a leng mateanong a likarolo tsa likepe tsa hao.+ Likepe tsohle tsa leoatle le bakhanni ba tsona ba bile ho uena, e le hore le ka fapanyetsana lintho tse rekisoang. 10  Bapersia+ le Balude+ le banna ba Pute+—ba ne ba le lebothong la hao la sesole, banna ba hao ba ntoa. Ba ne ba fanyehile thebe le helmete ho uena.+ Ke bona ba bakileng botle ba hao. 11  Bara ba Arvade,+ esita le lebotho la hao la sesole, ba ne ba pota-potile marako a hao ka hohle, ’me banna ba sebete ke bona ba neng ba le litoreng tsa hao. Ba ne ba fanyehile lithebe tsa bona tse chitja ho pota-pota marako a hao ka hohle.+ Ba entse hore botle ba hao e be bo phethahetseng. 12  “‘“Tarshishe+ e ne e hoeba le uena ka lebaka la bongata ba mefuta eohle ea lintho tsa bohlokoa.+ Ho ile ha nehelanoa ka lipolokelo tsa hao ka lebaka la silevera ea eona, tšepe, thini le loto.+ 13  Javane,+ Tubale+ le Mesheke+ li ne li hoeba le uena. Ho nehelanoe ka lintho tsa hao tsa koporo le lintho tsa hao tse fapanyetsanoang bakeng sa meea ea moloko oa batho.+ 14  Ntlong ea Togarma+ ho ne ho e-na le lipere le lipere tsa ntoa le limmoulo, tseo ho ileng ha nehelanoa ka lipolokelo tsa hao bakeng sa tsona. 15  Bara ba Dedane+ ba ne ba hoeba le uena; lihlekehleke tse ngata e ne e le bahoebi ba u sebeletsang; li ile tsa u lefa ka manaka a tlou+ le motsoeri e le mpho ho uena. 16  Edomo e ne e hoeba le uena ka lebaka la mesebetsi ea hao e mengata. Ho ile ha nehelanoa ka lipolokelo tsa hao e le phapanyetsano bakeng sa thekoise,+ boea bo fetotsoeng ’mala hore bo be bopherese bo bofubelu le lesela le mebala e sa tšoaneng le lesela la boleng bo botle le likorale le lirubi. 17  “‘“Juda le naha ea Iseraele li ne li hoeba le uena. Ho ile ha nehelanoa ka lintho tsa hao tse fapanyetsanoang+ bakeng sa koro+ ea Minithe+ le lijo tse khethehileng le mahe a linotši+ le oli le balsame.+ 18  “‘“Damaseka+ e ne e hoeba le uena ka mesebetsi ea hao e mengata, ka lebaka la bongata ba lintho tsohle tsa hao tsa bohlokoa, ka veine+ ea Helbone le boea bo bothokoa bo bofubelu. 19  Vedane le Javane tsa Uzale—li ile tsa nehelana bakeng sa lipolokelo tsa hao. Tšepe e teiloeng, kasia le lehlaka+—e ile ea e-ba lintho tsa hao tse fapanyetsanoang. 20  U ne u hoeba le Dedane+ ka liaparo tsa masela a lohiloeng a ho palama. 21  Maarabia+ le marenana ’ohle a Kedare+ e ne e le bahoebi ba u sebeletsang. Ba ne ba hoeba le uena—ka likonyana tse tona le lipheleu le liphooko.+ 22  Bahoebi ba Sheba+ le Rama+ ba ne ba hoeba le uena; ho ile ha nehelanoa ka lipolokelo tsa hao bakeng sa mefuta eohle ea litlolo tse nkhang hamonate tsa boleng bo botle ka ho fetisisa le bakeng sa mefuta eohle ea majoe a bohlokoa le khauta.+ 23  Harane+ le Kane le Edene,+ bahoebi ba Sheba,+ Asshure+ le Kilmade ba ne ba hoeba le uena. 24  Ba ne ba hoeba le uena setsing sa hao sa khoebo ka liaparo tse ntle haholo, ka liaparo tsa ho ithatela tsa masela a maputsoa le masela a mebala e sa tšoaneng le ka limmete tsa masela a mebala e ’meli, ka liropo tse lohiloeng tse entsoeng ka mokhoa o tiileng. 25  “‘“Likepe tsa Tarshishe+ e ne e le lisebelisoa tsa hao bakeng sa lintho tsa hao tse fapanyetsanoang, hoo u ileng ua tlala ’me ua ba ea khanyang haholo har’a leoatle le bulehileng.+ 26  “‘“Ba u sokang ba u tlisitse metsing a mangata.+ Moea oa bochabela o u robile har’a leoatle le bulehileng.+ 27  Lintho tsa hao tsa bohlokoa le lipolokelo tsa hao,+ lintho tsa hao tse fapanyetsanoang,+ bakhanni ba hao ba likepe le basesisi ba hao+ ba likepe, ba thibang matlere mateanong a likarolo tsa sekepe sa hao+ le ba fapanyetsanang lintho tsa hao tse rekisoang le banna bohle ba hao ba ntoa,+ ba leng ho uena le ba leng phuthehong eohle ea hao, ba leng ka hare ho uena,—ba tla oela har’a leoatle le bulehileng letsatsing la ho oa ha hao.+ 28  “‘“Ha ho utloahala molumo oa mohoo oa basesisi ba hao ba likepe naha e sabaletseng e tla reketla.+ 29  Bohle ba tšoarang lesokoana la sekepe, bakhanni ba likepe, basesisi bohle ba likepe tsa leoatle, ka sebele ba tla theoha likepeng tsa bona; ba tla ema fatše.+ 30  Ka sebele ba tla etsa hore ba utluoe ka lentsoe la bona ’me ba tla hoeletsa habohloko ka lebaka la hao.+ Ba tla itšela ka lerōle lihloohong.+ Ba tla ipitika moloreng.+ 31  Ba tla lokela ho ipeola bakeng sa hao,+ ba itlame ka lesela la mokotla+ ’me ba u llele ka moea o utloileng bohloko,+ ka ho bokolla habohloko. 32  Ka sebele sellong sa bona ba tla u binela koli-ea-malla ’me ba u binele,+“‘“‘Ke mang ea tšoanang le Tyre,+ ea tšoanang le ea khutsisitsoeng har’a leoatle?+ 33  Ha lipolokelo tsa hao+ li tsoa leoatleng le bulehileng,+ u khotsofalitse lichaba tse ngata.+ Ka lintho tsa hao tse ngata tsa bohlokoa le lintho tsa hao tse fapanyetsanoang u ruisitse marena a lefatše.+ 34  Joale u robiloe ke leoatle le bulehileng, bolibeng ba metsi.+ Ha e le lintho tsa hao tse fapanyetsanoang le phutheho eohle ea hao,+ li oetse ka hare ho uena. 35  Baahi bohle ba lihlekehleke+—ka sebele ba tla u sheba ka ho makala, ’me marena a bona a tla tlakasela ke ho nyaroha.+ Lifahleho li tla khathatseha.+ 36  Ha e le bahoebi ba har’a lichaba, ka sebele ba tla u letsetsa mololi.+ U tla fetoha matšabeho a tšohanyetso, ’me ha u sa tla hlola u e-ba teng ho isa nakong e sa lekanyetsoang.’”’”+

Mengolo e Botlaaseng ba Leqephe