Esaia 23:1-18

23  Phatlalatso ea Tyre:+ Bokollang, lōna likepe tsa Tarshishe!+ etsoe e tlatlapuoe hore e se ke ea e-ba kou, hore e se ke ea e-ba sebaka seo ho kenoang ho sona.+ Ba e senoletsoe naheng ea Kitime.+  Khutsang, lōna baahi ba sebaka se lebōpong la leoatle. Bahoebi ba Sidone,+ ba tšelang leoatle—ba le tlatsitse.  Peō ea Shihore+ e metsing a mangata, kotulo ea Nile, letlotlo la eona; e bile phaello ea lichaba.+  Hlajoa ke lihlong, Uena Sidone;+ hobane leoatle, Uena qhobosheane ea leoatle, le itse: “Ha kea ba le bohloko ba pelehi, ’me ha kea beleha, leha e le ho hlokomela bahlankana, ho hōlisa baroetsana.”+  Feela joaloka tlaleho e mabapi le Egepeta,+ ka ho tšoanang batho ba tla ba le bohloko bo boholo ka lebaka la tlaleho ea Tyre.+  Tšelelang Tarshishe; bokollang, lōna baahi ba sebaka se lebōpong la leoatle.  Na ona ke motse oa lōna o neng o thabile ho tloha linakong tsa khale, ho tloha linakong tsa oona tsa pele? Maoto a oona a ne a o isa hōle hore o lule teng e le mojaki.  Ke mang ea entseng qeto+ ee khahlanong le Tyre, e fanang ka meqhaka, eo bahoebi ba eona e neng e le likhosana, eo bo-rakhoebo ba eona e neng e le ba hlomphehang ba lefatše?+  Jehova oa mabotho o entse qeto ena,+ bakeng sa ho silafatsa khanya ea botle bohle,+ ho eisa bohle ba hlomphehang ba lefatše.+ 10  Tšela naheng ea heno joaloka Nōkeng ea Nile, Uena morali oa Tarshishe.+ Ha ho sa na sebaka seo likepe li etsoang ho sona.+ 11  O otlolletse letsoho holim ’a leoatle; o entse hore mebuso e tsukutlehe.+ Jehova o fane ka taelo khahlanong le Foenisia, ho felisa liqhobosheane tsa eona.+ 12  O re: “U se ke ua hlola u thaba le ka mohla,+ Uena ea hateletsoeng, morali oa Sidone oa moroetsana.+ Ema, u tšelele Kitime.+ Le hona teng u ke ke ua phomola.” 13  Bonang! Naha ea Bakalde.+ Sena ke sechaba—Assyria+ e ne e se sona—ba e thehetse baahi ba lehoatata.+ Ba emisitse litora tsa bona tsa ho thibella;+ ba nketse litora tsa eona tsa bolulo maruo hoo ho setseng ho se na letho;+ e mong o e behile e le lithako tse helehang.+ 14  Bokollang, lōna likepe tsa Tarshishe, kaha qhobosheane ea lōna e tlatlapuoe.+ 15  Letsatsing leo Tyre e tla lebaloa ka lilemo tse mashome a supileng,+ ho tšoana le matsatsi a morena a le mong. Bofelong ba lilemo tse mashome a supileng Tyre e tla hlaheloa ke se pineng ea letekatse: 16  “Nka harepa, u potolohe motse, Uena letekatse le lebetsoeng.+ Etsa se molemo ka ho fetisisa ka ho letsa liletsa tse likhoele; atisa lipina tsa hao, e le hore u ka hopoloa.” 17  Bofelong ba lilemo tse mashome a supileng Jehova o tla lebisa tlhokomelo ea hae Tyre, ’me e tla khutlela moputsong+ oa eona ’me e etse botekatse le mebuso eohle ea lefatše e holim ’a lefatše.+ 18  Phaello ea eona le moputso oa eona+ o tla fetoha ntho e halalelang ho Jehova. O ke ke oa bolokoa, kapa oa behoa, kahobane moputso oa eona e tla ba oa ba lulang ka pel’a Jehova,+ e le hore ba je ba khore ’me ba apare seaparo se setle.+

Mengolo e Botlaaseng ba Leqephe