Baahloli 8:1-35

8  Joale banna ba Efraime ba re ho eena: “Ke ntho ea mofuta ofe eo u re entseng eona ka ho se re bitse ha u il’o loantša Bamidiane?”+ Eaba ba leka ka matla ho qalisa qabang le eena.+  Qetellong a re ho bona: “Joale ke entse’ng ha ho bapisoa le lōna?+ Na tse khoahlapisitsoeng tsa Efraime+ ha li molemo ho feta ho bokelloa ha morara ha Abi-ezere?+  Molimo o nehelane ka Orebe le Zebe+ likhosana tsa Midiane matsohong a lōna, ’me ke eng seo ke khonneng ho se etsa ha ho bapisoa le lōna?” Ha a buile lentsoe lena ea e-ba hona moea oa bona o kokobelang mabapi le eena.+  Qetellong Gideone a tla Jordane, a e tšela, eena le banna ba makholo a mararo ba neng ba e-na le eena, ba khathetse empa ba ntse ba tsoela pele ho ba lelekisa.  Hamorao a re ho banna ba Sukothe:+ “Ka kōpo fang banna bana ba latelang mehatong ea ka+ lipolokoe tsa bohobe, kaha ba khathetse ’me ke lelekisa Zeba+ le Zalmuna,+ marena a Midiane.”  Empa likhosana tsa Sukothe tsa re: “Na liatla tsa Zeba le Zalmuna li se li ntse li le letsohong la hao hoo lebotho la hao le lokelang ho fuoa bohobe?”+  Eaba Gideone o re: “Ke ka lebaka leo ha Jehova a nehelana ka Zeba le Zalmuna letsohong la ka, ka sebele ke tlang ho otla nama ea lōna ka meutloa ea lefeelleng le lihlahla tse hlabang.”+  A tsoela pele ho nyoloha ho tloha moo a ea Penuele+ ’me a qala ho bua le bona ka mokhoa oona ona, empa banna ba Penuele ba mo araba feela joalokaha banna ba Sukothe ba ne ba arabetse.  Kahoo a boela a re ho banna ba Penuele: “Ha ke khutla ka khotso, ke tla heletsa tora ena.”+ 10  Joale Zeba le Zalmuna+ ba ne ba le Karkore, hammoho le batho ba bona ba lulang liahelong, ba ka bang likete tse leshome le metso e mehlano e le bohle ba neng ba setse liahelong tsohle tsa ba Bochabela;+ ’me ba neng ba se ba ntse ba oele e ne e le banna ba likete tse lekholo le mashome a mabeli ba neng ba tsomula sabole.+ 11  Gideone a tsoela pele ho nyoloha ka tsela ea ba lulang litenteng ho ea ka bochabela ho Noba le Jogbeha+ ’me a qala ho hlasela liahelo ha batho ba lulang liahelong ba sa itebela.+ 12  Ha Zeba le Zalmuna ba baleha, hang-hang a ba lelekisa ’me a hapa marena a mabeli a Midiane, Zeba le Zalmuna;+ ’me a etsa hore batho bohle ba lulang liahelong ba thothomele. 13  Gideone mora oa Joashe a qala ho khutla ntoeng ka lekhalo le nyolohelang Herese. 14  Ha a le tseleng a hapa mohlankana oa banna ba Sukothe+ ’me a mo botsa.+ Kahoo a mo ngolla mabitso a likhosana+ tsa Sukothe le banna ba eona ba baholo, banna ba mashome a supileng a metso e supileng. 15  Eaba o ea ho banna ba Sukothe ’me o re: “Bana ke Zeba le Zalmuna bao le ileng la ’nyelisa ka bona, le re, ‘Na liatla tsa Zeba le Zalmuna li se li ntse li le letsohong la hao hoo banna ba hao ba khathetseng ba lokelang ho fuoa bohobe?’”+ 16  Joale a nka banna ba baholo ba motse le meutloa ea lefeelleng le lihlahla tse hlabang, ’me a ruta banna ba Sukothe thuto.+ 17  A heletsa+ tora ea Penuele,+ ’me a bolaea banna ba motse. 18  Joale a re ho Zeba le Zalmuna:+ “E ne e le banna ba mofuta ofe bao le ba bolaileng Tabore?”+ Eaba ba re: “Kamoo u leng kateng, ba ne ba le joalo, e mong le e mong, a tšoana le bara ba morena ka sebōpeho.” 19  Eaba o re: “Ke barab’eso, bara ba ’Mè. Ka Jehova ea phelang, haeba le ne le ba bolokile ba phela, ke ne nke ke ka le bolaea.”+ 20  Joale a re ho Jethere letsibolo la hae: “Ema, u ba bolaee.” ’Me mohlankana ha aa ka a tsomula sabole ea hae, hobane o ne a tšohile, etsoe e ne e sa ntse e le mohlankana.+ 21  Kahoo Zeba le Zalmuna ba re: “Ema ’me u re hlasele, etsoe kamoo monna a leng kateng, ka ho tšoanang matla a hae a joalo.”+ Tumellanong le hoo Gideone a ema ’me a bolaea+ Zeba le Zalmuna eaba o nka mekhabiso e bōpehileng joaloka khoeli e neng e le melaleng ea likamele tsa bona. 22  Hamorao banna ba Iseraele ba re ho Gideone: “Re buse,+ uena le mora oa hao hammoho le setloholo sa hao, kaha u re pholositse letsohong la Bamidiane.”+ 23  Empa Gideone a re ho bona: “Nke ke ka le busa, leha e le hore mora oa ka o tla le busa.+ Jehova ke eena ea tla le busa.”+ 24  Gideone a tsoela pele ho re ho bona: “E-reng ke etse kōpo ho lōna: Mpheng, e mong le e mong oa lōna, lesale la nko+ la khapo ea hae.” (Etsoe ba ne ba e-na le masale a nko a khauta, kahobane e ne e le Baishmaele.)+ 25  Joale ba re: “Ka sebele re tla fana ka ’ona.” Eaba ba ala seaparo sa ka holimo ’me e mong le e mong a qala ho lahlela lesale la nko la khapo ea hae ka har’a sona. 26  Boima ba masale a nko a khauta ao a neng a a kōpile ea e-ba lishekele tsa khauta tse sekete le makholo a supileng, ntle ho mekhabiso e bōpehileng joaloka khoeli+ le masale le liaparo tsa boea bo fetotsoeng ’mala hore bo be bopherese bo bofubelu+ tse neng li le ho marena a Midiane ka ntle ho lifaha tse neng li le melaleng ea likamele.+ 27  Gideone a etsa efoda+ ka eona le ho e bonahatsa motseng oa hae Ofra;+ ’me Baiseraele bohle ba qala ho ba le likamano tse litšila le eona moo,+ hoo e ileng ea e-ba leraba ho Gideone le ho ba ntlo ea hae.+ 28  Kahoo Bamidiane+ ba hlōloa ka pel’a bara ba Iseraele, ’me ha baa ka ba hlola ba phahamisa hlooho; ’me naha ha ea ka ea boela ea khathatsoa ka lilemo tse mashome a mane matsatsing a Gideone.+ 29  Jerubaale+ mora oa Joashe a tsamaea ’me a tsoela pele ho lula ka tlung ea hae. 30  Gideone a ba le bara ba mashome a supileng+ ba tsoileng nokeng ea hae, etsoe o ile a ba le basali ba bangata. 31  Ha e le serethe sa hae se neng se le Shikeme, le sona sa mo tsoalla mora. Kahoo a mo reha Abimeleke.+ 32  Qetellong Gideone mora oa Joashe a shoa a tsofetse haholo ’me a patoa sebakeng sa lepato sa ntat’ae Joashe se Ofra ea Baabi-ezere.+ 33  Eitse hang ha Gideone a shoele bara ba Iseraele ba boela ba e-ba le likamano tse litšila le bo-Baale,+ hoo ba ileng ba beha Baale-berithe e le molimo oa bona.+ 34  Bara ba Iseraele ha baa ka ba hopola Jehova Molimo oa bona,+ ea neng a ba lopolotse matsohong a lira tsohle tsa bona tse ba potolohileng;+ 35  ha baa ka ba bontša mosa o lerato+ ho ba ntlo ea Jerubaale, Gideone, e le puseletso bakeng sa molemo oohle oo a neng a o bontšitse ho Baiseraele.+

Mengolo e Botlaaseng ba Leqephe