Baahloli 6:1-40

6  Joale bara ba Iseraele ba qala ho etsa se sebe mahlong a Jehova.+ Kahoo Jehova a nehelana ka bona matsohong a Bamidiane+ ka lilemo tse supileng.  Matsoho a Bamidiane a hlōla Baiseraele.+ Ka lebaka la Bamidiane bara ba Iseraele ba iketsetsa libaka tse ka tlaase tsa polokelo tse lithabeng, le mahaheng le libakeng tseo ho leng thata ho li atamela.+  E ne e re haeba Baiseraele ba jetse peō,+ Bamidiane le Baamaleke+ le ba Bochabela+ ba ne ba futuha, e, ba ne ba ba futuhela.  Ba ne ba hloma liahelo khahlanong le bona ’me ba senya lihlahisoa tsa mobu ho ea fihla Gaza, ’me ba ne ba sa siee lintho leha e le life tsa ho iphelisa kapa nku kapa poho kapa esele Iseraele.+  Etsoe bona le liphoofolo tsa bona tse ruiloeng ba ne ba nyoloha ka litente tsa bona. Ba ne ba tla ba le bangata joaloka litsie,+ bona le likamele tsa bona ba ne ba se na palo;+ ba ne ba kena naheng ho tla e felisa.+  Baiseraele ba futsaneha haholo ka lebaka la Bamidiane; ’me bara ba Iseraele ba qala ho hoeletsa ho Jehova ho kōpa thuso.+  Kahobane bara ba Iseraele ba hoelelitse ho Jehova ho kōpa thuso ka lebaka la Bamidiane,+  Jehova a romela monna e mong, moprofeta,+ ho bara ba Iseraele ’me a re ho bona: “Sena ke seo Jehova Molimo oa Iseraele a se boletseng, ‘Ke ’na ea le ntšitseng Egepeta+ ’me kahoo ka le ntša ntlong ea makhoba.+  Kahoo ka le lopolla letsohong la Egepeta le matsohong a bahatelli bohle ba lōna eaba ke ba leleka ka pel’a lōna ’me ka le fa naha ea bona.+ 10  Ho feta moo, ka re ho lōna: “Ke ’na Jehova Molimo oa lōna.+ Le se ke la tšaba melimo ea Baamore+ bao le lulang naheng ea bona.”+ ’Me ha lea ka la mamela lentsoe la ka.’”+ 11  Hamorao lengeloi la Jehova la tla+ ’me la lula tlas’a sefate se seholo se neng se le Ofra, seo e neng e le sa Joashe Moabi-ezere,+ ha mora oa hae Gideone+ a ntse a pola koro sehatelong sa veine e le hore a ka e tlosa kapele mahlong a Bamidiane. 12  Joale lengeloi la Jehova la hlaha ho eena ’me la re ho eena: “Jehova o na le uena,+ uena ea matla, ea sebete.” 13  Eaba Gideone o re ho lona: “Ntšoarele, moren ’a ka, empa haeba Jehova o na le rōna, joale ke hobane’ng ha sena sohle se re etsahaletse,+ ’me liketso tsohle tsa hae tse hlollang+ li hokae tseo bo-ntat’a rōna ba re phetetseng tsona,+ ba re, ‘Na Jehova ha aa re ntša Egepeta?’+ Joale Jehova o re tlohetse,+ ’me o nehelane ka rōna seatleng sa Bamidiane.” 14  Eaba Jehova oa mo talima ’me o re: “E-ea ka matla ana a hao,+ ’me ka sebele u tla pholosa Baiseraele seatleng sa Bamidiane.+ Na ha ke u rome?”+ 15  Eaba o re ho eena: “Ntšoarele, Jehova. Ke tla pholosa Baiseraele ka eng?+ Bona! Sekete sa ka ke se senyenyane ho Manase, ebile ’na ke monyenyane ntlong ea Ntate.”+ 16  Empa Jehova a re ho eena: “Hobane ke tla ba le uena,+ ’me ka sebele u tla timetsa Bamidiane+ joalokaha eka ke motho a le mong.” 17  Eaba o re ho eena: “Joale, haeba ke fumane kamohelo mahlong a hao,+ u nketsetse pontšo ea hore ke uena ea buang le ’na.+ 18  Ka kōpo, u se ke ua tloha mona ho fihlela ke tla ho uena+ ’me ke ntšitse mpho ea ka le ho e beha ka pel’a hao.”+ Tumellanong le hoo a re: “Ke tla ’ne ke lule mona ho fihlela u khutla.” 19  Gideone a kena ’me a lokisa potsanyane+ le efa ea phofo ea mahobe a sa lomosoang.+ A tšela nama ka basketeng, eaba o tšela moro ka pitseng, ’me ka mor’a moo a mo tlisetsa eona ka ntle tlas’a sefate se seholo eaba oa mo ngoathela. 20  Joale lengeloi la Molimo oa ’nete la re ho eena: “Nka nama le mahobe a sa lomosoang ’me u li behe holim ’a lefika le leholo moo,+ ’me u tšolle moro.” Eaba o etsa joalo. 21  Joale lengeloi la Jehova la otlolla ntlha ea lere le neng le le letsohong la lona ’me la ama nama le mahobe a sa lomosoang, eaba mollo o qala ho nyoloha lefikeng le ho chesa nama le mahobe a sa lomosoang.+ Ha e le lengeloi la Jehova, la nyamela ka pel’a hae. 22  Ka lebaka leo Gideone a hlokomela hore e ne e le lengeloi la Jehova.+ Hang-hang Gideone a re: “Oho, ’Musi Morena Jehova, ka lebaka la hore ebe ke bone lengeloi la Jehova lifahleho li talimane!”+ 23  Empa Jehova a re ho eena: “E-ba le khotso.+ U se ke ua tšoha.+ U ke ke ua shoa.”+ 24  Kahoo Gideone a hahela Jehova aletare+ moo, ’me e ntse e bitsoa+ Jehova-shalome ho fihlela letsatsing lena. E sa ntse e le Ofra+ ea Baabi-ezere. 25  Bosiung boo Jehova a tsoela pele ho re ho eena: “Nka pohoana, poho ea ntat’ao, ke hore, pohoana ea bobeli e lilemo li supileng, ’me u qhaqhe aletare ea Baale+ ea ntat’ao, ’me u reme palo e halalelang e pel’a eona.+ 26  U hahele Jehova Molimo oa hao aletare ka holim ’a qhobosheane ena, e nang le majoe a kolohantsoeng, ’me u nke pohoana ea bobeli u e nyehele e le nyehelo ea secheso likotoaneng tsa patsi ea palo e halalelang eo u tlang ho e rema.” 27  Tumellanong le hoo Gideone a nka banna ba leshome ho bahlanka ba hae ’me a etsa feela joalokaha Jehova a ne a buile le eena;+ empa kaha o ne a tšaba ba ntlo ea ntat’ae le banna ba motse haholo hore a ka etsa joalo motšehare, a etsa joalo bosiu.+ 28  Ha banna ba motse ba tsoha hoseng haholo joalokaha e le tloaelo, bonang! aletare ea Baale e ne e helelitsoe ’me palo e halalelang+ e neng e le ka thōko ho eona e ne e remiloe, ’me pohoana ea bobeli e ne e nyehetsoe aletareng e neng e hahiloe. 29  Ba qala ho buisana ba re: “Ke mang ea entseng ntho ee?” Ba qala ho botsa le ho batla. Qetellong ba re: “Gideone mora oa Joashe ke eena ea entseng ntho ena.” 30  Kahoo banna ba motse ba re ho Joashe: “Ntša mora oa hao e le hore a ka shoa,+ hobane o helelitse aletare ea Baale, le hobane o remile palo e halalelang e neng e le pel’a eona.” 31  Eaba Joashe+ o re ho bohle ba neng ba eme khahlanong le eena:+ “Na e tla ba lōna ba etsang tšireletso ea molao bakeng sa Baale ho bona hore na le ka mo pholosa? Mang kapa mang ea etsang tšireletso ea molao bakeng sa hae o tšoanela ho bolaoa hoseng hona.+ Haeba ke Molimo,+ a ke a iketsetse tšireletso ea molao,+ hobane motho e mong o helelitse aletare ea hae.” 32  A qala ho mo bitsa Jerubaale+ letsatsing leo, a re: “Baale a ke a iketsetse tšireletso ea molao, hobane motho e mong o helelitse aletare ea hae.”+ 33  Bamidiane+ bohle le Baamaleke+ le ba Bochabela+ ba bokana hammoho joaloka motho a le mong+ ’me ba tšela eaba ba hloma liahelo khohlong ea Jezriele.+ 34  Moea oa Jehova+ oa aparela Gideone hoo a ileng a qala ho letsa lenaka,+ ’me Baabi-ezere+ ba bokelloa ka mor’a hae. 35  A romela manģosa+ ho pholletsa le Manase eohle, eaba le bona ba bokelloa ka mor’a hae. A boela a romela manģosa ho pholletsa le Ashere le Zabulone le Nefthali, ’me ba nyoloha ho ea kopana le eena. 36  Joale Gideone a re ho Molimo oa ’nete: “Haeba u tla pholosa Baiseraele ka ’na, feela joalokaha u tšepisitse,+ 37  bona! ke tlohela boea bona bo kutiloeng bo pepesehile seotlong mona. Haeba phoka e lala holim ’a boea bo kutiloeng feela empa holim ’a lefatše lohle ho omile, joale ke tla tseba hore u tla pholosa Baiseraele ka ’na, feela joalokaha u tšepisitse.” 38  Ha e-ba ka tsela eo. Ha a tsoha hoseng ka letsatsi le hlahlamang ’me a tlhotla boea boo bo kutiloeng, a tlhotla boeeng bo kutiloeng phoka e lekaneng ho tlatsa sekotlolo se seholo sa mokete ka metsi. 39  Leha ho le joalo, Gideone a re ho Molimo oa ’nete: “Bohale ba hao bo se ke ba ntukela, empa e-re ke bue hanngoe feela lekhetlong lena. Ka kōpo, e-re ke etse teko hanngoe feela lekhetlong lena ka boea bo kutiloeng. Ka kōpo, boea bo kutiloeng bo ke bo ome bo le bong, ’me phoka e lale holim ’a lefatše lohle.” 40  Kahoo Molimo a etsa ka tsela eo bosiung boo; boea bo kutiloeng ba oma bo le bong, ’me phoka ea lala holim ’a lefatše lohle.

Mengolo e Botlaaseng ba Leqephe