Bibele e Reng ka Bolokolohi ba ho Ikgethela? Na Modimo o Laola Dintho?
Karabo ya Bibele
Modimo o re file tokelo ya ho ikgethela, e leng matla a ho iketsetsa diqeto ho ena le hore a rere esale pele hore na re tla etsang. Hlokomela seo Bibele e se rutang.
Modimo o bopile batho ka setshwantsho sa hae. (Genese 1:26) Ho fapana le diphoofolo, tse etsang dintho ho ya ka tshekamelo ya tsona ya tlhaho, rona re bontsha seo Mmopi wa rona a leng sona ka bokgoni ba rona ba ho bontsha ditshobotsi tse kang lerato le toka. Jwalo ka Mmopi wa rona, re na le bolokolohi ba ho ikgethela.
Ka dinako tse ding, tsela eo re etsang dintho ka yona e ka bontsha hore na re tla ba le bokamoso ba mofuta ofe. Bibele e re kgothalletsa hore re ‘kgethe bophelo ka hore re mamele lentswe la Modimo,’ e leng se bolelang ho kgetha ho mamela ditaelo tsa hae. (Deuteronoma 30:19, 20) Kgothalletso eo e ne e ke ke ya thusa ka letho ebile e ne e tla bontsha sehloho haeba re ne re se na bolokolohi ba ho ikgethela. Ho ena le hore Modimo a re qobelle ho etsa seo a reng re se etse, o ipiletsa ho rona ka mofuthu o re: “Hoja o ka ela ditaelo tsa ka hloko! Jwale kgotso ya hao e ne e tla tshwana le noka.”—Esaia 48:18.
Ha ho na motho ya laolang hore na re tla atleha kapa re tla hloleha bophelong. Haeba re batla ho atleha mosebetsing oo re o etsang, re lokela ho sebetsa ka thata. Bibele e re: “Sohle seo letsoho la hao le fumanang hore le ka se etsa, o se etse ka matla a hao.”(Moeklesia 9:10) E boetse e re: “Ka sebele merero ya ya kgothetseng e tlisa molemo.”—Diproverbia 21:5.
Ho ba le bolokolohi ba ho ikgethela ke mpho ya bohlokwa e tswang ho Modimo, ka ha bo re fa monyetla wa ho mo rata ka ‘dipelo tsa rona tsohle’—hobane re batla.—Matheu 22:37.
Na Modimo ha a laole dintho tsohle?
Bibele e ruta hore Modimo o Matla Ohle mme matla a hae ha a lekanyetswe ke mang kapa mang ntle le yena. (Jobo 37:23; Esaia 40:26) Le ha ho le jwalo, ha a sebedise matla a hae ho laola ntho e nngwe le e nngwe. Ka mohlala, Bibele e re Modimo o ile a “sebedisa boitshwaro” ho Babylona ya boholoholo, eo e neng e le sera sa batho ba hae. (Esaia 42:14) Ka ho tshwanang, hona jwale o kgethile ho mamella batho ba sebedisang bolokolohi ba bona hampe ho utlwisa batho ba bang bohloko. Empa Modimo a ke ke a etsa seo ka ho sa feleng.—Pesaleme ya 37:10, 11.
O ka Nna wa Rata le Tsena
TORA YA HO LEBELA
O ka Tseba Bokamoso ba Hao Jwang?
Batho ba bangata ba dumela hore ba ka tseba bokamoso ba bona ka hore ba sebedise dintho tse kang bonohe ba dinaledi, ho bala dikarete, ho rapela badimo le ho tswalwa hangata.
DITHUTO TSA BOHLOKWA TSE HLAHANG KA BIBELENG
Na O ka Kgona ho ba Motswalle wa Modimo?
Haesale batho ba utlwa ba hloka ho tseba Moetsi wa bona. Bibele e ka re thusa ho ba metswalle ya Modimo. Ntho ya pele e tla o thusa ke ho tseba lebitso la Modimo.
TORA YA HO LEBELA
Bokamoso ba Hao bo Matsohong a Hao!
Batho ba bang ba re Modimo o ile a rera e sa le pele hore na bophelo ba motho e mong le e mong bo tla ba jwang, ka hoo ha ba dumele hore diqeto tseo re di etsang di ka laola bophelo ba rona. Empa na seo ke nnete?
