Sehlopha se Busang ke Bakreste ba seng bakae ba hodileng tsebong ba tataisang Dipaki Tsa Jehova lefatsheng lohle. Mosebetsi wa bona o dikarolo di pedi:

•   Sehlopha sena se re lokisetsa dithuto tse thehilweng Bibeleng se sebedisa dingolwa, diboka le dikolo tsa Dipaki Tsa Jehova.​—⁠Luka 12:​42.

•   Se hlokomela mosebetsi wa lefatshe lohle o etswang ke Dipaki Tsa Jehova ka ho tsamaisa mosebetsi wa boboledi le ho hlokomela tsela eo menehelo e sebediswang ka yona.

 Sehlopha se Busang se latela mohlala wa ‘baapostola le baholo ba Jerusalema’ ba lekgolong la pele la dilemo, ba ileng ba etsa diqeto tse nepahetseng bakeng sa phutheho yohle ya Bakreste. (Diketso 15:⁠2) Jwalo ka banna bao ba tshepahalang, ditho tsa Sehlopha se Busang ha se baetapele ba mokgatlo wa rona. Ba tataiswa ke Bibele mme ba dumela hore Jehova Modimo o kgethile Jesu Kreste hore e be yena Hlooho ya phutheho.​—⁠1 Bakorinthe 11:⁠3; Baefese 5:⁠23.

Ditho tsa Sehlopha se Busang ke bomang?

 Ditho tsa Sehlopha se Busang ke Kenneth Cook, Jr., Gage Flyegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane le Jeffrey Winder. Ba sebeletsa ntlo-kgolo ya rona e Warwick, New York, U.S.A.

Sehlopha se Busang se hlophisitswe jwang?

 Sehlopha se Busang se thehile dikomiti tse tsheletseng hore di tsamaise dikarolo tse fapaneng tsa mosebetsi wa rona mme setho ka seng se sebetsa komiting e le nngwe kapa tse mmalwa.

•   Komiti ya Bohokahanyi: Komiti ena e sebetsana le dinyewe, dikoduwa, maemo ao badumedimmoho le rona ba qoswang ka lebaka la seo ba se dumelang le ditaba tse ding tse potlakileng tse amang Dipaki Tsa Jehova lefatsheng lohle.

•   Komiti ya Basebetsi: E hlokomela ditho tsa lelapa la Bethele.

•   Komiti ya Kgatiso: E hatisa le ho romela dingolwa tsa Bibele lefatsheng lohle, e haha Diholo Tsa Mmuso le tsa dikopano, diofisi tsa phetolelo le mehaho ya makala.

•   Komiti ya Tshebeletso: E hlokomela mosebetsi wa ho bolela “ditaba tse monate tsa Mmuso.”​—⁠Matheu 24:​14.

•   Komiti ya Thuto: E hlophisa dikolo, diboka, dintho tse mamelwang le divideo tse matlafatsang tumelo ya rona.

•   Komiti ya Bongodi: E hlophisa boitsebiso bo dikgatisong tsa rona, websaeteng hammoho le ho hlokomela mosebetsi wa phetolelo.

 Ho ekelletsa moo, Sehlopha se Busang se kopana beke le beke e le ho hlahloba seo mokgatlo o se hlokang. Dibokeng tseo, se buisana ka Bibele ebe se dumella moya wa Modimo hore o se tataise e le hore se be ntswe leng ha se etsa diqeto.​—⁠Diketso 15:⁠25.

Bathusi ba Sehlopha se Busang ke bomang?

 Ke Bakreste ba tshepahalang ba thusang dikomiti tsa Sehlopha se Busang. (1 Bakorinthe 4:⁠2) Ba na le tsebo le boiphihlelo ba mosebetsi o etswang komiting eo ba abetsweng ho yona mme ba ba teng dibokeng tsa beke le beke tsa dikomiti tseo. Le hoja ba sa nke karolo ha ho etswa diqeto, bathusi bana ba fana ka keletso ya bohlokwa le boitsebiso bo eketsehileng. Ba boetse ba sebedisa diqeto tse entsweng komiting le ho sheba tswelopele e entsweng kgafetsa. Sehlopha se Busang se boetse se abela bathusi bana ho fana ka dipuo diketsahalong tse kang diboka tsa selemo le selemo kapa tsa kabo ya mangolo a Gileade.