Lokushiwo liBhayibheli

 Cha, umhlaba angeke ubhujiswe, ushiswe ngemlilo nobe kudalwe lomunye. LiBhayibheli lifundzisa kutsi Nkulunkulu wadala umhlaba ngendlela yekutsi kuhlalwe kuwo kuze kube phakadze.

•   “Labalungile bayawudla lifa lemhlaba, bahlale kulo kuze kube phakadze.”—Tihlabelelo 37:29.

•   “[Nkulunkulu] wasimisa umhlaba etikwetisekelo tawo, kuze ungatanyatanyiswa, phakadze naphakadze.”—Tihlabelelo 104:5.

•   “Umhlaba uyakusala unjalo phakadze naphakadze.”—Umshumayeli 1:4.

•   “Lowo lowadala wabumba umhlaba, wawusekela; akazange awudalele kutsi ubete lutfo, kodvwa wawubumbela kutsi uhlale bantfu.”—Isaya 45:18.

Bantfu batawubhubhisa yini umhlaba?

 Nkulunkulu angeke avumele bantfu bawonakalise ngalokuphelele umhlaba ngekutsi bawungcolise, ngetimphi nobe ngaletinye tindlela. Kunaloko, ‘utawubhubhisa labo lababhubhisa umhlaba.’ (Sembulo 11:18) Utakwenta kanjani loko?

 Nkulunkulu utawubeka uMbuso wakhe esikhundleni salabohulumende labakhona manje, labehlulekile kuvikela umhlaba. (Danyela 2:44; Matewu 6:9, 10) Inkhosi yalowo Mbuso kutawuba nguJesu Khristu, iNdvodzana yaNkulunkulu. (Isaya 9:6, 7) Ngesikhatsi alapha emhlabeni, Jesu wakhombisa kutsi unemandla ngetulu kwemvelo. (Makho 4:35-41) NjengeNkhosi yeMbuso waNkulunkulu, Jesu utawusebentisa lawomandla ekulawuleni umhlaba kanye netintfo letikuwo. Utawulungisa lomhlaba ubuyele esimeni lobowukuso ensimini yase-Edeni.—Matewu 19:28; Lukha 23:43.

LiBhayibheli liyafundzisa yini kutsi umhlaba utobhujiswa ngemlilo?

 Cha, alikufundzisi loko. Lombono loliphutsa uvame kususelwa embhalweni wa-2 Phetro 3:7, lotsi: “Emazulu nemhlaba lokukhona nyalo kugcinelwe umlilo.” Ake sihlole emaphuzu lamabili latasisita sicondze kutsi asho kutsini lamagama:

1.   LiBhayibheli lisebentisa emagama latsi “lizulu,” “umhlaba,” kanye nalelitsi “umlilo” kuze lichaze tintfo letinyenti. Ngekwesibonelo, umBhalo waGenesisi 11:1 utsi: “Umhlaba wonkhe wawukhuluma lulwimi lunye.” KulomBhalo, “umhlaba” umelela bantfu.

2.   Ingcikitsi yalomBhalo wa-2 Phetro 3:7 isiniketa inchazelo yemazulu, umhlaba, kanye nemlilo lokukhulunywa ngawo kulomBhalo. Emavesi 5 na-6 akhuluma ngalokwenteka ngaZamcolo wangesikhatsi saNowa. Ngaleso sikhatsi, bantfu lababi nobe “umhlaba.” babhujiswa kodvwa iplanethi lengumhlaba ayizange ibhujiswe. (Genesisi 6:11) Waphindze wabhubhisa ‘nemazulu’—lokubantfu lebebabusa ngaleso sikhatsi. Ngako bantfu lababi lababhujiswa, hhayi iplanethi lengumhlaba. Nowa nemndeni wakhe basindza kuleyombubhiso futsi ngemuva kwamZacolo baphindze bahlala kulomhlaba.—Genesisi 8:15-18.

 NjengaZamcolo, imbubhiso nome “umlilo,” lokukhulunywa ngawo ku-2 Phetro 3:7 kuyobhubhisa ngalokuphelele bantfu lababi hhayi iplanethi lengumhlaba. Nkulunkulu utsembisa “emazulu lamasha nemhlaba lomusha” lapho “kutawuba nekulunga” khona. (2 Phetro 3:13) “Umhlaba lomusha,” nome bantfu, batawubuswa ‘ngemazulu lamasha,’ nome umbuso lomusha—lokunguMbuso waNkulunkulu. Nasekubusa lowo Mbuso, umhlaba utawuba lipharadisi lelinekuthula.—Sembulo 21:1-4.