Loyo loshade naye uke waveta yini kukhatsateka kwakhe mayelana nendlela lonatsa ngayo tjwala? Nangabe kunjalo, kunetintfo lokufanele uticabangele.

Kulesihloko

•  Kusebentisa kabi tjwala kanye nemshado, tintfo letimbili letingahlangani

•  Sewusigcili setjwala yini?

•  Naka kutsi awutiyengi ngekutsi unenkinga yekunatsa kakhulu tjwala

•  Longakwenta

 Kusebentisa kabi tjwala kanye nemshado, tintfo letimbili letingahlangani

 Kusebentisa kabi tjwala kungabanga tinkinga letinyenti temphilo letifaka ekhatsi sifo senhlitiyo, kungasebenti kahle kwesibindzi kanye nemdlavuza. Kodvwa kusebentisa kabi tjwala, akugcini ngekubanga tinkinga temphilo kuphela, kuphindze kubange netinkinga emshadweni letingafaka ekhatsi budlova basekhaya, tinkinga tetimali, kungetsembeki kanye nedivosi.

 LiBhayibheli litsi nangabe tjwala busetjentiswe kabi, ‘buluma njengenyoka, futsi bunesihlungu njengelibululu.’ (Taga 23:32) Ungabona njani kutsi sewusigcili setjwala?

 Sewusigcili setjwala yini?

 Lemibuto lelandzelako ingakusita ubone timphawu tekutsi sewusigcili setjwala yini nobe cha:

•   Awusakhoni yini kulawula indlela lonatsa ngayo tjwala?

•   Uhlale ucabanga ngekutsi utawuphindze unatse nini yini?

•   Uchubeka unatsa yini ngisho nobe kukubangela tinkinga ekuphileni nasemshadweni wakho?

•   Utiva ugula yini nawetama kuyekela kunatsa?

•   Kunatsa kwakho kukwenta ucabane naloshade naye yini?

•   Sewunatsa kakhulu yini kunangesikhatsi lesendlulile?

•   Uyabufihla yini tjwala ekhaya nobe emsebentini?

 Nangabe uphendvula ngayebo munye umbuto nobe ngetulu kusho kutsi awusakhoni kuphila ngephandle kwetjwala. Loku kusho kutsi kungenteka sewusidzakwa.

 Naka kutsi awutiyengi ngekutsi unenkinga yekunatsa kakhulu tjwala

 Loshade naye uke waveta yini kukhatseka kwakhe mayelana nendlela lonatsa ngayo tjwala? Nangabe kunjalo, kungenteka uke wetama kutitsetselela wenta shengatsi awusimubi lomkhuba. Kungenteka usola labanye lokufaka ekhatsi loshade naye ngekutsi utsi:

•   “Kube bewungiphatsa kahle ngabe anginatsi.”

•   “Kube bewunemsebenti locindzetela njengalowami nawe ngabe uyanatsa.”

•   “Banyenti bantfu lengibatiko labanatsa kwendlula mine.”

 Nawukhuluma kanjena, kungenteka yini kube wenta kunatsa tjwala kute kucala kunekuba nemshado lojabulako? Yini lokufanele ite kucala?

 Simiso seliBhayibheli: ‘Indvodza leshadile ikhatsateka . . . ngekutsi ingemukeleka njani kumkayo.’​—1 KubaseKhorinte 7:33.

 Longakwenta

•   Tinake tintfo letikhatsata loyo loshade naye. Kungaba kuhle kwenta lushintjo nangabe lona loshade naye kumphatsa kabi loko lokwentako. Nangabe uchubeka unatsa kakhulu ngisho nobe ubona kutsi lona loshade naye kumphatsa kabi loko, kusho kutsi sewunenkinga yekunatsa kakhulu tjwala.

   Simiso seliBhayibheli: “Nguloyo naloyo akangatifuneli lokusita yena, kodvwa akachubeke afuna lokusita lomunye umuntfu.”​—1 KubaseKhorinte 10:24.

•   Tfola lwati. Kuze lisotja lincobe emphini kufanele lati emachinga esitsa salo. Nawe usesimeni lesifanako. Ngako kuze uncobe lesitsa sakho kufanele wati emaciniso ngekunatsa kakhulu tjwala kanye nendlela lokubabamba ngayo bantfu. Utawuphindze udzinge kufundza tindlela tekutsi ukhone kuphila ngaphandle kwetjwala naletitakusita ungaphindzi ubunatse nangabe bese ubuyekele.

   Simiso seliBhayibheli: “Nichubeke nibalekela tifiso tenyama letilwa nani.”​—1 Phetro 2:11.

•   Tfola lusito. Tinyenti tindzawo letisita bantfu labanenkinga yekunatsa kakhulu, letifaka ekhatsi tinhlelo letingakusita uyekele kunatsa kanye netibhedlela. Ungaphindze ukhulume nemngani lometsembako longakusita ubone kutsi yini lelekubangela kutsi unatse kakhulu. Nawuva ngatsi iyabuya lenkinga yekunatsa kakhulu, khuluma nalomngani lometsembako.

   Simiso seliBhayibheli: “Umngani sibili ukutsandza ngaso sonkhe sikhatsi futsi ungumnakenu longetsembela kuye ngesikhatsi sekuhlupheka.”​—Taga 17:17.

 Kunatsa kakhulu yindzaba leyinkimbinkimbi futsi lengeke ilungiseke ngekufundza sihloko sinye nje kuphela, nobe ngekutitjela kutsi utonciphisa sikali lonatsa ngaso. Nobe kunjalo, khumbula kutsi indlela lokhetsa kulungisa ngayo lesimo ayitsintsi imphilo yakho nje kuphela kodvwa itsintsa nemshado wakho.

 Kuze utfole lokunyenti: Fundza nati tihloko letilandzelako kuze ubone kutsi labanye bayincobe njani lenkinga yekunatsa kakhulu.

 “Angiseyona Indoda Enesihluku,” lesitfolakala ngesiZulu

 “Angisazenyezi,” lesitfolakala ngesiZulu

 “Ngangihlala Emgwaqweni,” lesitfolakala ngesiZulu

 Phindze ubukele i-video letsi ‘Bengingasayijabuleli Indlela Lebengiphila Ngayo’