Bantfu labanyenti labatsandzanako bahlala ndzawonye ngaphambi kwekutsi bashade. Labanye bahlala ndzawonye bangakashadi ngenca yekutsi bafuna kubona kutsi bangakhona yini kuhlala ndzawonye nasebashadile. Kukahle yini kuhlala ndzawonye nisengakashadi?

Kulesihloko

•  Litsini liBhayibheli?

•  Kuhlala ndzawonye nisengakashadi kunganenta yini niwulungele umshado?

•  Kuhlala ndzawonye nisengakashadi kunganisita yini nonge imali?

•  Kuhlala ndzawonye nisengakashadi kungakusita yini kutsi ungashadi nemuntfu longalungelani naye?

•  Ikhona yini indlela lencono?

 Litsini liBhayibheli?

•   LiBhayibheli liyakulahla kuya ecansini usengakashadi. Sibonelo nje, litsi: “Nibubalekele bugwadla.” (1 KubaseThesalonika 4:3; 1 KubaseKhorinte 6:18) Loku kufaka ekhatsi nebantfu labahlala ndzawonye basengakashadi ngisho nobe batawugcine bashadile. a Timiso teliBhayibheli tivikela bantfu labatsandzanako kutsi bangakhulelwa basengakashadi tiphindze tibavikele nakuletinye tinkinga letingabangwa kuhlala ndzawonye ningakashadi.

•   Umshado ulilungiselelo lelivela kuNkulunkulu. Nakawusungula, watsi: “Indvodza itawushiya babe wayo namake wayo inamatsele kumkayo, futsi batawuba nyamanye.” (Genesisi 2:24) Nangabe indvodza nemfati bashadile, manyenti ematfuba ekutsi babe nemndeni locinile nalonelutsandvo.

 Kuhlala ndzawonye nisengakashadi kunganenta yini niwulungele umshado?

 Labanye batsi yebo. Bacabanga kutsi lokuhlala ndzawonye basengakashadi, bente imisebenti yasekhaya ndzawonye kanye naletinye tintfo kungabenta betayelane. Nobe kunjalo, lokubaluleke kakhulu kuze ube nemshado lophumelelako, kutibophetela.

 Bantfu labatsandzanako bangakufundza njani kuhlala ndzawonye bangashiyani ngetikhatsi letimnandzi nobe letimatima? Kuhlala ndzawonye nisengakashadi ninembono wekutsi ningehlukana nobe kunini akusiyo indlela lekahle yekuba nemshado lophumelelako. Kunaloko, budlelwane lobuhle buyacina nangabe laba labatsandzanako basebenta ngekubambisana kuze bancobe tinkinga.

 Lokubalulekile: Kunekutsi kunisite nibe nemshado lophumelelako kuhlala ndzawonye nisengakashadi kunganenta kutsi nigcine nehlukene.

 Simiso seliBhayibheli: “Nobe yini umuntfu layihlanyelako, utawuvuna yona futsi.”​—KubaseGalathiya 6:7.

 Kuhlala ndzawonye nisengakashadi kunganisita yini nonge imali?

 Labanye batsi yebo. Luhlolo lolwentiwe yi-Pew Research Center lutfole kutsi eMelika bantfu labangu-4 kulabangu-10 bahlala ndzawonye bangakashadi kuze bonge imali. Nobe kunjalo, labanyenti labahleti ndzawonye basengakashadi batsi sizatfu lesikhulu lesibenta bangashadi, tinkinga tetimali.

 Kuhlala ndzawonye ningakashadi kungaba nemiphumela lebuhlungu ikakhulukati kubantfu besifazane. Sibonelo nje, nasebehlukene laba labatsandzanako kuvamisa kuba besifazane labasala nemsebenti wekukhulisa bantfwana.

 Lokubalulekile: Imiphumela lebuhlungu yekuhlala ndzawonye ningakashadi minyenti kakhulu kunaloko lokuhle lenicabanga kutsi niyakutfola.

 Simiso seliBhayibheli: “Mine Jehova, nginguNkulunkulu wakho, loyo lokufundzisako kuze uzuze.”​—Isaya 48:17.

 Kuhlala ndzawonye nisengakashadi kungakusita yini kutsi ungashadi nemuntfu longalungelani naye?

 Labanye batsi yebo. Nobe kunjalo , incwadzi letsi, Fighting for Your Marriage itsi “bantfu labahlala ndzawonye basengakashadi bakutfola kumatima kwehlukana.” Leni? Labanye labahlala ndzawonye basengakashadi kungenteka batfole kutsi abafanelani, kodvwa kube matima kutsi behlukane ngenca yekutsi banesilwane labasinakekela bobabili, nobe babhadala sikweleti sendlu nobe lowesifazane sewukhulelwe futsi sebetayele kuhlala ndzawonye sekumatima kutsi bente lushintjo lolubalungelako. b Lencwadzi letsi Fighting for Your Marriage ichubeka itsi “labanye bantfu lebekungenteka bahlukane, bagcine bashadile ngenca nje yekutsi kube melula kutsi bachubeke bahlala ndzawonye.”

 Lokubalulekile: Kunekutsi kukusite wente sincumo lesikahle, kuhlala nemuntfu ningakashadi kungakwenta kube matima kuhlukana naye ngisho nobe angakulungeli.

 Simiso seliBhayibheli: “Umuntfu lohlakaniphile utsi nakabona ingoti abaleke, kodvwa lote lwati ucondza ngco kuyo, bese ubhekana nemiphumela lebuhlungu.”​—Taga 22:3.

 Ikhona yini indlela lencono?

 Ungatibalekela tingoti letita nekuhlala nemuntfu ningakashadi futsi ukhulise ematfuba ekuba nemshado lophumelelako. Kanjani? Ngekusebentisa timiso teliBhayibheli letimayelana nemshado. Tinike sikhatsi lesenele sekwati lomuntfu lofuna kushada naye ngaphambi kwekutsi nihlale ndzawonye njengendvodza nemfati. Indlela lencono yekukhetsa umuntfu longashada naye, kubuka tintfo lenititsandzako kanye nalenitikholelwako kunekukhangana.

 LiBhayibheli lineteluleko letingakusita ube nemshado lophumelelako, lohlala njalo nalojabulisako. c Sibonelo nje, liBhayibheli linetimiso letingakusita kutsi . . .

•   ubalekele kungetsembeki

•   ube ngumuntfu longaba ngumlingani wemshado lokahle

•   unake tintfo letingakhombisa kutsi lomuntfu akakufaneli

 Kuze ufundze lokunyenti ngaletihloko, buka incenye letsi “Umshado Nemndeni” ku-jw.org.

 Simiso seliBhayibheli: “Yonkhe imiBhalo iphefumulelwe nguNkulunkulu, ilusito ekufundziseni.”​—2 KuThimothi 3:16.