Kwenteka njani kutsi mine lebengiliKhomanisi ngibe lilunga lenkholo letondvwa live lonkhe? Lutsandvo lwaJehova kanye nekungicecesha kwakhe kwangisita njani kutsi ngishintje buntfu bami ngesikhatsi ngisenkambu futsi ngisetjentiswa kamatima?

Bengifuna Kulunga Kanye Nekuthula Kwengcondvo

 Ngatalwa nga-1930, eTabani, endzaweni lephuyile lesenyakatfo yeMoldova. Batali bami bebelusa kuze banakekele bantfwana babo labangu-6. Besihlupheka. Make bekalilunga lelisontfo lebuRussian Orthodox, kantsi babe bekangumKatolika. Bebavame kuphikisana ngendlela yekutiphatsa kwebaphristi leyetfusako.

 Ngacedza sikolwa nangineminyaka lengu-18, futsi ngaba lilunga leKomsomol, lokuyinhlangano yebantfu labasha lefundzisa timfundziso tebuKhomanisi. Umgomo wayo bewukucecesha emalunga lamasha eLicembu lemaKhomanisi. Ngabese ngikhetfwa kutsi ngibe ngumabhalane welicembu lasendzaweni. Bebafundzisa kutsi bonkhe bantfu babobhuti nabosisi, nekutsi kufanele baphatfwe kahle ngendlela lefanako, futsi ngakutsandza loko. Ngajabha nangibona kungalungi kanye nekukhohlakala lebekukhona emangweni.

 Njengobe bengililunga leKomsomol, bekufanele nakanjani ngisekele imitsetfo leshaywe nguhulumende waseSoviet Union a yekuvalwa kwemasontfo kanye nekucedza emacembu enkholo. Bekuna BoFakazi BaJehova labambalwa endzaweni yakitsi. Ngisho nobe bengibabona kutsi batsembekile futsi banekuthula, bengicabanga kutsi babantfu labecisako. Bengingati kutsi madvutane nje bengitawutfola timphendvulo temibuto lebenginayo kolomunye wabo.

 Babe wami lomkhulu Dimitriy, lebekahlala endzaweni yakitsi, bekangulomunye waBoFakazi BaJehova. Ngalelinye lilanga nga-1952 kukusentfwasahlobo, wangibuta, “Georgiy, utawentani ngekuphila kwakho?” Kungibuta kwakhe lombuto kwangikhombisa kutsi nguye kuphela lobekanendzaba nami. Liciniso likutsi, benginemibuto leminyenti engcondvweni yami. Sibonelo nje, bengivame kutibuta kutsi, nangabe Nkulunkulu akhona ukuvumeleleni kuhlupheka? Emalangeni langu-8 lalandzela, Dimitriy wayiphendvula yonkhe imibuto yami asebentisa liBhayibheli. Ngaletinye tikhatsi besikhuluma ngaNkulunkulu kuze kushaye-3 ekuseni!

 Ngemva kwekucoca naye, ngancuma kudadisha liBhayibheli. Ngase ngiyabona kutsi kunaBabe wami losezulwini longitsandzako. (Tihlabelelo 27:10) Ngisho nobe bekukuncane lebengikwati ngeliBhayibheli, bengimtsandza kakhulu Jehova, futsi loko kwangisita kutsi ngente sincumo. Ngalishiya lelicembu lemaKhomasinisi ngisho nobe sihlalo walelicembu lendzawo bekangisongela. Ngemuva kwetinyanga letingu-4 ngicale kudadisha liBhayibheli, kwatsi ngaSeptember 1952, ngatinikela kuJehova futsi ngabhajatiswa.

Lutsandvo Lebenginalo NgaJehova Lwavivinywa

 Ngaleso sikhatsi umsebenti waBoFakazi BaJehova bewuvinjelwe. Nobe kunjalo, bengifuna kukhombisa ngetento kutsi ngiyamtsandza Jehova, ngako ngavolontiya kumikisela labanye boFakazi labahlala kuletinye tindzawo tincwadzi. Loku bekuyingoti ngobe bantfu bendzawo bebasheshe bamsole umuntfu labangamati bese babikela tiphatsimandla. Ecinisweni, ngisho nalabanye boFakazi bebangisola ngobe bebacabanga kutsi ngisebentela emaphoyisa futsi ngitenta Fakazi. Ngekuhamba kwesikhatsi kwacaca kutsi angisiyo inhloli. Ngemuva kwetinyanga letimbili ngibhajatisiwe ngaboshwa futsi ngabekwa emacala ekushushumbisa tincwadzi letingekho emtsetfweni.

 Ngavalelwa cishe umnyaka wonkhe ngaphambi kwekutsi kutekwe licala lami, ngaleso sikhatsi emaphoyisa angiphenyisisa kanengi ngemibuto kuze etame kuphula bucotfo bami. Lokuhle kutsi bese ngimtsandza kakhulu Jehova. Ekugcineni kwahlelwa kutsi kutekwe licala edolobheni lase-Odessa, e-Ukraine. Batali bami kanye nebantfwana bakitsi labangesibo boFakazi batjelwa kutsi bete enkantolo.

 Ngatekiswa licala njengemuntfu lodukiswe kutsi abe lilunga lelicembu leliyingoti. Tiphatsimandla betifuna kutsi batali bami kanye nebantfwana bakitsi bacabange kutsi sengiyahlanya. Batali bami besatjiswa. Bakhala futsi bangicela kutsi ngiyekele kuba nguFakazi. Ngabeka umoya wami phansi, futsi ngatsi kumake: “Ungakhatsateki. Angikaduki. Ngitfole loku bengisolo ngikufuna kuphila kwami konkhe, futsi angeke ngize ngikuyekele.” (Taga 23:23) Bengite lwati lolungakanani ngeliBhayibheli kodvwa loku lebengikwati ngaJehova bekwenele kutsi ngingesuki kuye. Ngemuva kweminyaka lengu-6, batali bami bafundza ngaloko bengikukholelwa futsi nabo base baba BoFakazi BaJehova.

 Ngagwetjwa iminyaka lengu-15 yekusebenta kamatima, futsi ngahanjiswa ngesitimela ngamikiswa esifundzeni saseKolyma, eSiberia, lesinetinkambu letinyenti letinebantfu labasentjentiswa kamatima. Kuze emaphoyisa nabogadzi bakhone kusilawula bebasishaya futsi bangasiniki nekudla. Ekucaleni, bengitibuta kutsi ngitawuphila njani.

Kuceceshwa Kanye Nekunakekelwa NguNkulunkulu

 Nangifika nje, labanye boFakazi labangu-34 lebesebavele baboshiwe kulenkambu bangibuta ngekuhlakanipha batsi: “Bakhona yini boJonadabi kulelicembu lohamba nalo?” Ngavele ngati kutsi laba boFakazi. Ngibo kuphela lebebangasebentisa ligama leliseBhayibhelini! Labazalwane lebesebanesikhatsi lesidze bakhonta Jehova bangisita kutsi ngisebentise timiso teliBhayibheli nangibhekene netikhatsi letimatima, futsi bangisita nekutsi ngibe nebuntfu bebuKhristu lobufaka ekhatsi kuba nekucondza.

 Bengisebenta njengamakhenikhi kulenkambu. Ngalelinye lilanga, Matphey abetigabatisa kutsi yena wati bosanta labangu-50 ngenhloko. Ngamphendvula kabi futsi wetama kungishaya ngesibhakela kodvwa ngabaleka. Ngemuva kwesikhatsi, ngeva buhlungu nangibona bazalwane bangihleka. Ngababuta: “Nihlekani? Ngetama kushumayela!” Ngemusa bangikhumbuta kutsi umgomo wetfu kushumayela tindzaba letimnandzi, hhayi kukhuba bantfu. (1 Phetro 3:15) Matphey bekalivukelambuso, kodvwa beyimjabulisa indlela boFakazi lebebahlonipha ngayo bogadzi netiphatsimandla. Ngekuhamba kwesikhatsi wakhombisa kutsi uyawutsandza umlayeto loseBhayibhelini. Ngiyohlale ngibukhumbula lobusuku labhajatiswa ngabo ngasese emantini labandza hleke!

 Ngemuva kwesikhashana sifikile enkambu, mine nalabanye bazalwane labasebasha lababili, samenywa kutsi singenele emakilasi etepolitiki. Sacale sala kuya kulamakilasi. Besicabanga kutsi kuya kulamakilasi bekutawusho kutsi sesitsatsa luhlangotsi kutepolitiki. (Johane 17:16) Ngenca yaloko, safakwa esitokisini lesimnyama tsu emaviki lamabili. Nasesikhululiwe, bazalwane basichazela kutsi kuya kulamakilasi akusho kutsi sesitsatsa luhlangotsi. Kunaloko, bekutasivulela litfuba lekushumayela. Ngemusa labazalwane labasitsandzako, basisita kutsi sihlakaniphe futsi sivumelane netimo.

 Lokungicecesha kwabo ngesineke kwangikhombisa kutsi Jehova uyangitsandza futsi uyanginakekela. Sibonelo nje, lesinye siboshwa lesingumphristi sabekwa kutsi sibe ngumphatsi walababuke timali. Njalo nje nasihlangana ngesikhatsi sekudla, bekangibingelela atsi, “Sawubona, ndvodzana yaSathane!” Lesinye siboshwa satsi ngibomphendvula ngekwedzelela ngitsi, “Yebo Babe wami!” Lokubuhlungu kutsi ngamlalela futsi loko kwabangela kutsi ngishaywe kamatima. Bazalwane nabeva ngaloko, bangisita ngabona kutsi bengingakenti ngendlela lefanele. (Taga 29:11) Ngabese ngiyocolisa kulomphristi.

 Ngaphambi kwekutsi ngimikiswe enkambu, bengikhona kuya emihlanganweni ngasese ebusuku nobe ekuseni kakhulu. Kepha kulenkambu besingakhoni kuhlangana ngasese. Ngako, onkhe malanga besihlangana nebazalwane, bogadzi basibukile kuze sicoce ngemibhalo lebesiyibhale emaphepheni lamancane. Umgomo wetfu bewukutsi sibambe ngenhloko imibhalo leminyenti kuze sihlale siyikhumbula. Nakufika liphoyisa lapho besihlangene khona besivele sihlafune lamaphepha ngekushesha.

Lutsandvo LwaJehova Lwafinyelela Kimi Ngisho Nobe Bengiboshiwe

 Nangikhululwa kulenkambu nga-1959, ngayiswa esifundzeni saseKaraganda eKazakhstan. Nanobe bengisengakakhululwa ngalokuphelele, ngacela kuletiphatsimandla kutsi ngihambe emalanga langu-20 kuze ngiyoshada. Ngahamba ngaya esifundzeni saseTomsk eRussia, lapho bekunadzadze lebengimati lomuhle nalowetsembekile lokutsiwa nguMaria. Njengobe bengihlale ngenta, ngavele ngacondza endzabeni. Ngatsi: “Maria, ngite sikhatsi sekutsi sibukane kuze sitokwatana. Ngicela kushada nawe!” Wavuma, futsi sashada. Bekumjabulisa Maria kutsi ngibeketelele tinkinga letinyenti futsi bekafuna kungisita ngichubeke ngikhonta Jehova.​—Taga 19:14.

 Ngabo-1960, besingakhoni kushumayela emtini ngemuti, kodvwa besisebentisa lonkhe litfuba lesilitfolako kuze sishumayele singakahleli. Nakukhona losimemile noma sitivakashele nje, besivamise kucoca ngelitsemba lekuphila phakadze emhlabeni. Besakha nematfuba ekucoca nalabanye. Sibonelo nje, besiya kuyobuka tindlu letitsengiswako bese sizama kucoca nebanikati bato ngetihloko letiseBhayibhelini. Ngalendlela, mine naMaria sakhona kucalisa tifundvo teliBhayibheli nebantfu labangu-6 labagcine sebaBoFakazi BaJehova.

 Ngaletinye tikhatsi besishumayela ngesikhatsi selukhetfo. Ngalelinye lilanga, emaphoyisa labaseshi eta kulefemu lapho bengisebenta khona nalabanye bazalwane. Embikwalabanye lebesisebenta nabo labangu-1 000, lamaphoyisa asibuta kutsi yini leyenta BoFakazi BaJehova bangatingeneli tepolitiki. Njinela lomkhulu kanye naletinye tisebenti basikhulumela. Batjela lamaphoyisa kutsi sitisebenti letikhutsele naletetsembekile. Indlela labo lebesisebenta nabo labenta ngayo, yasiniketa sibindzi sekuchaza tinkholelo tetfu sisebentisa imibhalo lebesiyibambe ngenhloko. Ngenca yekutsi saba nesibindzi sekushumayela, labangu-4 lebesisebenta nabo balitsandza liciniso leliseBhayibhelini futsi babhajatiswa ungakapheli umnyaka.

 Ngasekucaleni kwabo-1970, banyenti bantfu lababa BoFakazi BaJehova eKazakhstan, ngako sahlela kutsi kube nemhlangano wesigodzi wekucala ngca! Besitakwenta njani loko kuze tiphatsimandla tingasiboni? Sancuma kuba nalomhlangano wesigodzi ngelilanga linye nemshado lobewutawuba dvutane nelidolobha lase-Almaty. Kulombutsano, bekunemshado mbamba kuphindze kube nemhlangano wesigodzi, futsi bekunetimenywa letingetulu kwa-300! Umkami kanye nalabanye bodzadze basebenta kamatima kuze bahlobise lendzawo futsi balungiselele nekudla lokumnandzi. Letimenywa tatijabulela tinkhulumo letisekelwe eBhayibhelini lebetetfulwa bazalwane labehlukahlukene. Ngalelo langa, kwaba kwekucala ngca kutsi ngetfule inkhulumo yeliBhayibheli embikwebantfu labanyenti.

Lutsandvo LwaNkulunkulu Lwasisita Nasibhekene Nebumatima

 Umkami lengimtsandzako Maria, bekangumsiti wami lowetsembekile kuphila kwakhe konkhe. Bekanemoya lophansi, atfobekile futsi abeka tintfo letiphatselene neMbuso waNkulunkulu kucala. Nanobe abengumuntfu lophilile emtimbeni, kwatsi kungalindzeleki wahlaselwa sifo lokutsiwa yi-osteoporosis lesamlalisa phansi iminyaka lengu-16. Ngikanye nendvodzakati yetfu leneluvelo Lyudmila, samnakekela waze washona nga-2014.

 Bekungicedza emandla kubona umkami Maria akulesimo. Nobe kunjalo, onkhe malanga besifundza liBhayibheli ndzawonye kanye netihloko letikhutsatako, kwaze kwaba ngulapho ashona. Besivame kukhuluma ngemhlaba lomusha. Ngalesinye sikhatsi bengikhala kodvwa angangiboni. Njalo nasifundza ngetetsembiso taJehova letimangalisako, besikhona kwehlisa umoya futsi sitfole nemandla ekucinisela.​—Tihlabelelo 37:18; 41:3.

 Kusukela ngacala kubona kutsi Jehova ungitsandza kangakanani, bengihlale ngiyibona indlela langisekela aphindze anginakekela ngayo. (Tihlabelelo 34:19) Njengobe bengite lwati lolwanele, ngabona kutsi Jehova uyangitsandza ngekutsi asebentise bazalwane labangisita kutsi ngitfutfukise buntfu bami. Ngesikhatsi ngisebenta kamatima lenkambu, ngabona kutsi Jehova uyangisekela asebentisa liVi lakhe. Waphindze wanginika emandla lebengiwadzinga kuze ngikhone kunakekela umkami Maria, kwaze kwaba sekugcineni. Nyalo, sengingalisho ligcwale umlomo kutsi, lutsandvo lwami ngaJehova lungisekele kuphila kwami konkhe.