Ngalesikhatsi umkami Kaye abeleka indvodzakati yetfu Lauren, bengingati kutsi yini lengingayenta kuze ngibe ngubabe lokahle. Nalapho siba nemntfwana wetfu wesibili, indvodzana yetfu Michael, bengisolo ngingati kutsi ngingaba njani ngubabe lokahle. Nangisakhula, batali bami bebahlale balwa baze bagcina sebadivosile. Bengifuna kuba yindvodza lekahle kodvwa bengingati kutsi ngingenta njani.

 Lokwenta lesimo saba sibi nakakhulu kutsi nangiseminyakeni yekutfomba ngacala kunatsa kakhulu tjwala nekusebentisa kabi tidzakamiva. Noma sengikhulile, bengingakhoni kulawula kuphila kwami. Kuba ngumlutsa wetidzakamiva kanye nekugembula kwangenta kutsi ngente tincumo letinyenti letimbi. Lesimo saba sibi kakhulu kangangekutsi Kaye wangishiya futsi wahamba nebantfwana betfu lababili. Loku kwangivisa buhlungu kakhulu.

 Ngabuta Kaye kutsi yini lengingayenta kuze abuye. Besekacale kufundza liBhayibheli naGloria, longulomunye waBoFakazi BaJehova. Ngako wangitjela kutsi kunye lebekufanele ngikwente, kutsi ngidadishe liBhayibheli. Bengingati kutsi usho kutsini, futsi bengingafuni kudadisha liBhayibheli, kodvwa ngenca yekutsi bengifuna Kaye abuye ekhaya, ngavuma kuhlangana naGloria kanye nemyeni wakhe Bill.

Incociswano Leyashintja Kuphila Kwami

 Ngesikhatsi Bill naGloria bangivakashela ekhaya lami, yangimangalisa indlela lebebasondzelene ngayo. Bangitjela kutsi bantfwana babo lebebaphose balingane nami bebenta tintfo letikahle ekuphileni. Ngacala lapho kucabanga kutsi mhlawumbe liBhayibheli lingangisita nami kutsi ngibe nemndeni lojabulako.

 Kulencociswano yetfu, Bill naGloria bakhuluma nami ngetinkinga lebenginato. Bangikhombisa loko lokushiwo liBhayibheli kubaseGalathiya 6:7 lotsi: “Nobe yini umuntfu layihlanyelako, utawuvuna yona futsi.” Ngacabanga ngatsi, ‘kube ngasisebentisa lesimiso ekuphileni kwami, ngabe ngagwema tinkinga letinyenti!’

 Ngekuhamba kwesikhatsi, ngabona kutsi kusebentisa timiso teliBhayibheli kukwente njani kuphila kwami kwaba ncono. Mine naKaye sayekela kubhema futsi ngatfola lusito kuze ngiyekele yonkhe leleminye imikhuba. Nga-1985, nasitfola umntfwana wesitsatfu, indvodzana yetfu David, lebesimbita ngaDavey, ngativa sengikulungele kuba ngubabe lokahle.

Kukhonta Jehova Ndzawonye

 Njengebatali, mine naKaye sabona kutsi kufundzisa bantfwana betfu ngaJehova, natsi kusenta sisondzelane naye. Safundza lokunyenti etincwadzini letifaka ekhatsi lena letsi, Listening to the Great Teacher! Ngetulu kwaloko, imindeni lebeyisebandleni lebesikulo yaba sibonelo lesihle kitsi nakubantfwana betfu.

 Ngekuhamba kwesikhatsi, bonkhe bantfwana betfu bese bangemahlahlandlela. Ekucaleni kwemnyaka wa-2004, Lauren bekasebandleni lelikhuluma Spanish. Michael bekasandza kuphuma eBethel kuze ayoshada, futsi yena nemkakhe Diana bebatawuhamba baye kuyoshumayela eGuam. Davey, lobekaneminyaka lengu-19, bekasandza kucala kushumayela eDominican Republic.

 Mine naKaye sajabula kakhulu ngetincumo lebetentiwe bantfwana betfu. Sativa ngatsi siphila lamavi laku-3 Johane 4: “Kute lenye intfo lengijabulisa kakhulu kwendlula loku: kuva kutsi bantfwana bami bayachubeka bahamba ecinisweni.” Besingati kutsi kuphila kwetfu kutawushintja ngekungena kwelucingo nje.

Sehlakalo Lesibuhlungu

 Nga-April 24, 2004, mine naKaye saya kuyokudla e-restuarant kanye nalabanye labashadene lababili. Njengobe le-restaurant beyikhashane ngemakhilomitha langetulu kwa-100, kwadzingeka sonkhe sihambe ngemoto yami. Nasesicedzile kudla, ngase ngiyokwehlisa labanye kulenye i-restuarant kuze siyodla i-dessert, mine ngave ngiyofuna indzawo yekupaka. Kwakhala lucingo lwami. Bengishayelwa ngumngani wami futsi bengiva kutsi ukhatsatekile.

 Watsi: “sekwenteke inkinga lenkhulu. Davey sewutfole ingoti yemoto.”

 Ngambuta ngatsi, “Ulimele kanganani?” kodvwa bengesaba kuva imphendvulo.

 Wacale wangakhoni kungitjela. Wabese ungitjela kutsi Davey ushonile.

 Nasicedza kukhuluma, ngathantaza kuJehova ngamcela kutsi angiphe emandla. Ngase ngiyangena kule-restuarant, ngatjela lalabanye kutsi besengingasativa kahle futsi ngicela kutsi siye ekhaya. Bengingafuni kutjela Kaye kutsi Davey sewushonile kuze kube ngulapho sesisodvwana.

 Loluhambo lwekubuyela ekhaya belubuhlungu. Ngeva Kaye acocela laba lebesihamba nabo kutsi ujabule kanganani ngoba Davey uyeta kutosivakashela. Kusenjalo, Kaye asengakati kutsi indvodzana yetfu ishonile, besekungena imilayeto yekusililela ecingweni lami.

 Nasesibabeke emakhaya abo labo besihamba nabo, sabese siya ekhaya. Kaye wavele wangibona ebusweni kutsi kukhona bekungahambi kahle. Wangibuta watsi “kwentekeni?” Bengati kutsi loku lengitamtjela kona bekutamvisa buhlungu kakhulu njengobe nami lolucingo lebengilutfolile ema-aweni lamabili lengcile, belungivise buhlungu kakhulu.

Kubhekana Nelusizi Lwekushonelwa

 Mine naKaye besike sabhekana netinkinga letinkhulu ekuphileni kwetfu, futsi besati kutsi Jehova uyabadvudvuta bantfu bakhe. (Isaya 41:10, 13) Kodvwa lena bekuyinkinga leyehlukile. Bengihlale ngitibuta kutsi, ‘Loku kwenteke njani kuDavey​—umuntfu lebekentela Jehova lokunyenti? Jehova akazange amvikele leni?’

 Nebantfwana betfu beva buhlungu kakhulu. Lauren bekamtsandza kakhulu Davey, bekungatsi ngumake wakhe, ngako kwamvisa buhlungu kakhulu kushona kwakhe. NaMichael weva buhlungu kakhulu. Nanobe besekuphele iminyaka lengu-5 Michael ahlala khashane nasekhaya, bekumjabulisa kubona bhuti wakhe lomncane akhula futsi aba yindvodza levutsiwe.

 Kusukela ekucaleni, libandla letfu lasisita. Sibonelo nje, ngisho nobe Kaye bekasengakemukeli kutsi Davey ushonile, bazalwane nabodzadze basebandleni bebeta ekhaya letfu kuze basidvudvute futsi basisite. (Taga 17:17) Angiyoze ngilukhohlwe lutsandvo labasikhombisa lona!

 Kuze sikhone kubhekana nelusizi lwetfu sinaKaye, besichubeka sithantaza njalo, sidadisha liBhayibheli futsi siya nasemihlanganweni yebuKhristu. Kwenta letintfo akuzange kubucedze buhlungu lebesibuva, kodvwa besati kutsi kuchubeka sitenta bekutasisita kutsi sibe nebuhlobo lobuhle naJehova.​—KubaseFiliphi 3:16.

 Ngaleso sikhatsi, boMichael naDiana batfutsa batohlala dvutane natsi, kantsi Lauren wabuya ebandleni lebesikulo. Lokubandzawonye kwenta lobuhlungu bancipha. Ngekuhamba kwesikhatsi Lauren nakashada, umyeni wakhe, Justin, wasisita kakhulu.

Sikhatsi Lesimatima

 Ngekushesha nje ngemuva kwekushona kwaDavey senta intfo lematima kodvwa leyasisita kakhulu. Kaye utasicocela ngayo.

 “Umyeni wami nakangitjela kutsi Davey ushonile, ngeva buhlungu lobukhulu futsi loko kwatsatsa sikhatsi lesidze. Lobuhlungu bebungenta ngingakhoni kwenta lutfo. Bengihlale ngikhala. Ngaletinye tikhatsi, bengimkwatela Jehova kanye nawo wonkhe nje umuntfu lophilako. Bengingakhoni kucabangisisa kahle ngetintfo.

 “Bengifuna kuya eDominican Republic. Bengidzinga kuba kulendzawo Davey bekahlala kuyo futsi asebentela Jehova kuyo ngaphambi kwekutsi ashone. Ngesikhatsi lesifanako, bengite emandla ekuhamba indlela lendze kangaka.

 “Umngani wami wangitjela kutsi bangani baDavey labaseDominican Republic nabo beva buhlungu kakhulu ngekushona kwaDavey futsi bafise kubona umndeni wakhe. Loku lakusho kwanginika emandla ekutsi ngichubeke neluhambo.

 “Loluhambo lwawusita kakhulu umndeni wetfu. Lwasisita sabona kutsi Davey bekanekukholwa lokucinile. Bekunalomdzala welibandla munye kulelibandla Davey bekakulo, futsi watsi bekaciniseka kutsi Davey abetawenta umsebenti labelwe kutsi awente.

 “Bantfu nabasibona sihamba emgwacweni lodvute nalapho Davey bekahlala khona, bebeta kitsi futsi basitjele ngetintfo letinhle Davey lebekabentele tona. Bengimati kutsi abengumuntfu lonemusa, kodvwa letintfo letinhle latenta labasicocela ngato tangenta ngabona indlela indvodzana yami lebeyetama ngayo kulingisa sibonelo saJesu.

 “Saphindze sabona lenye indvodza lebeyifundza liBhayibheli naDavey. Lendvodza beyihlala endlini lencane futsi beyigula, ingakhoni kuvuka embhedzeni. Ngetulu kwaloko, lendvodza beyiphuyile futsi bazalwane nabodzadze basitjela kutsi Davey bekayiphatsa ngenhlonipho. Loko kwangenta ngatigcabha ngaye!

 “Kute luhambo lengake ngalutsatsa lebelumatima njengalolu. Nobe kunjalo, kwawusita kakhulu umndeni wetfu kucoca nalabanye lebebamtsandza Davey. Kwasenta sativa sincono.”

Kukhutsatwa Sibonelo SaDavey

 I-Phaphama! yaJanuary 8, 2005, beyinesihloko lebesikhuluma ngekufa kwaDavey kanye nemsebenti lebekawenta eDominican Republic. Ngaleso sikhatsi, umndeni wetfu bewungati kutsi lesihloko besitabasita njani labanye. Sibonelo nje, ngaMay 2019 umzalwane lokutsiwa nguNick wachumana natsi futsi wasitjela naku lokulandzelako:

 “Ngasekupheleni kwa-2004, bengisekolishi futsi ngite imigomo lephatselene nekukhonta Nkulunkulu. Bengingakajabuli. Ngathantaza kuJehova ngimcela kutsi angisite kuze ngibusebentise kahle busha bami. Ngemuva kwalesosikhatsi, ngafundza ngendzaba yaDavey ku-Phaphama! Yaba yimphendvulo yemthantazo wami!

 “Ngayekela ekolishi futsi ngaba lihlahlandlela. Ngatibekela nemgomo wekufundza Spanish futsi ngiyoshumayela kulelinye live. Ngekuhamba kwesikhatsi, ngaya kuyoshumayela eNicaragua, ngaphindze ngaya eSikolweni Sebavangeli BeMbuso ngikanye nemkami. Bantfu nabangibuta kutsi yini leyangikhutsata kutsi ngibe lihlahlandlela, ngivele ngibacocele ngendzaba yaDavey.”

 Nga-2019 saya Emhlanganweni Wetive lebewuseBuenos Aires, e-Argentina lapho sahlangana khona nadzadze lobitwa ngekutsi ngu-Abi lobekasebenta ehhotela lebesilala kulo. Bekanemusa nelutsandvo futsi loko kwasikhumbuta Davey.

 Nasibuyela endlini yetfu kulelihhotela, satfumelela Abi i-link yekungena kulesihloko lesikuPhaphama! lesikhuluma ngaDavey. Ngemuva kwesikhashana waphendvula. Bekafuna kukhuluma natsi, ngako sahlangana naye e-reception. Akhala, Abi wasitjela kutsi indzaba yaDavey yamsita kutsi acale kuba lihlahlandlela ngaSeptember 2011, futsi waya kuyoshumayela endzaweni lenesidzingo. Watsi, “Nakwenteka ngiba netinkinga esabelweni sami, ngivele ngiphindze ngifundze lendzaba yakhe.” Bekaze ayiphetse le-Phaphama!

 Tindzaba letinjengalena tiyakhombisa kutsi singumndeni losemhlabeni wonkhe. Kute emhlabeni bantfu labanebunye njengebantfu baJehova!

 Mine naKaye kuyasidvudvuta kwati kutsi loko lokwenteka kuDavey kubasite njani labanye. Loku kubonakele kuliciniso kubo bonkhe labasha labatimiselako ekwenteni umsebenti waJehova. Bangakanaki, nabo bakhutsata labanye lababona kutimisela kwabo emsebentini waJehova, futsi ngesibonelo sabo baphindze babakhutsate kutsi banikete Jehova lokuncono kakhulu.

“Ngekwembono Wakhe Bonkhe Bayaphila”

 KuLukha 20:37, Jesu usho emavi lashiwo nguJehova nakatibita ngekutsi ‘unguNkulunkulu wa-Abrahama, wa-Isaka newaJakobe.’ Jehova akazange atsi bekanguNkulunkulu wabo kuphela nje nabasaphila kodvwa watsi usenguNkulunkulu wabo! Leni? Jesu uyasiphendvula kuvesi 38: “Ngobe ngekwembono wakhe bonkhe bayaphila.”

 Yebo, ngekwembono waJehova, tonkhe tikhonti takhe letetsembekile tiyaphila; lokusikhombisa kutsi utimisele kangakanani kutivusa! (Jobe 14:15; Johane 5:28, 29) Ngiyaciniseka kutsi Jehova utiva ngendlela lefanako nangaDavey, kanye nangato tonkhe letinye tikhonti takhe letishonile.

 Ngisho nobe ngibuke phambili ekuboneni Davey, kodvwa ngikulangatelela nakakhulu kubona Davey ahIangana naKaye. Angizange sengimbone umuntfu asebuhlungwini lobukhulu njengalobo Kaye bekakubo. Emavi lakuLukha 7:15 latsi: “Lomuntfu lobekafile wavuka wacala kukhuluma, futsi Jesu wambuyisela kumake wakhe,” asho lukhulu kimi.

 NgaSeptember 2005, nami ngaba lihlahlandlela njengaKaye. Kulilungelo lelikhulu kimi kubalihlahlandlela kanye nemkami, bantfwana betfu kanye nalabo labashade nabo. Njengobe singumndeni, siyasekelana futsi sibuke ngalabovu litsemba lesinalo lemhlaba lomusha, lapho sitawuphindze sihlangane khona naDavey.