ROOG kaa sak’u lanq ke boo ta mos pur wiin we ngen teen. O ñuxur um kaa tee: “Asamaan fee asa­maan no Yaal oxe yoo, ndaa xa ƥiy Aadama a cooxu lanq ke.”​—A Kim a Tedu ke 115:16.

Balaa ta sakaa o kiin o eetaand oxe ne’eena Aadama, Roog a tan’a o mbiñ o neewu no lanq ke, a xemband ma a ƭing a mosu, a ne’tin Edeen. A Pind a Tedu ke a lalta yee o maag o maas ole ne’eena Ofrat fo ole ne’eena Tigere a sutoorooga na ƭing ale Edeen. * A jega waa mboogna yee xeƈa a ƭing ale Edeen a reeɗ’a no batand naa no saate fee na xoyteel xane Turquie. No ndigil a ƭing ale Edeen took lanq ke a reeɗ’u!

Ye Roog a sak na Aadama, a ɓek’aan kam a ƭing ale Edeen pur ta “xooxan, a yetan.” (Mberaand naa 2:​15) So koy ta sakanin o tew o ne’e Awa. Keeke Roog a lay’u den: “Ndimikyo, mayƭand lanq ke, ke ta saqna fop a ref no ɓay nuun.” (Mberaand naa 1:​28) A woora yee Roog “sakee lanq ke ndax da yoq o ƥor, ndaa ndax da ngenel.”​—Esayi 45:18.

Aadama fa Awa kaa ndiw a nqaƴ kebil ke Roog. Kaaga taxu Roog a rax a den na ƭing ale. Naaga ta ñaktuyo arjana fee. Ke bakaad fee Adama a yaqna a maya. A Pind a Tedu ke a laya yee: “Nu anda yee na pexey o kiin o leng kut, ta ref Aadama, bakaad fee a roktii­du na adna fee, soo bakaad fee a ɓisiid fa nqon. Neene itam fa nqon fee a yena took o kiin-oo-kiin, yaam fop a mbakaada.”​—Rom 5:​12.

Ndax Roog a xaƴa ke ta bug’ina fi’ no mberaand naa, manaam lanq ke fop a ndef arjana, naa wiin we ­ngen’kaa fo o ɗaay? Ha’aa! Roog a laya yee: “Fa lay fee na sutooraa no don es. Nomtooxiidkee na mi o ƥor too fadnee ke buguuma, a fadin ke taxna um lulin.” (Esayi 55:11) Lanq ke xan na ndefaat arjana!

Nam o ñoow ole kam arjana fee took lanq ke a nand kaa? Fat i ƭeet ke Pind a Tedu ke a layna teen no paas ƭik ke na ngaraa.

^ xiise 4 A safe le no Mberaand naa 2:​10-​14 a laya yee: “O maag o maas a sutoora Edeen, a sooraa a ƭing ale. Maaga, a xaajooxa a fi a kal a nahak. A kal a eetaand ale ne’e Pison . . . A kal a ƭikandeer ale ne’e Giihon . . . A kal a tadkandeer ale ne’e Tigere, ten sagu no batand naa Asuur. A kal a nahkandeer ale koy refu Ofrat.” Me a kal a eetaand ale fo ƭikandeer ale a ndeeƭ’ina a mo’a wiin we.