Yu e bribi a pramisi fu Bijbel taki den dedewan o kisi wan opobaka? * A howpu di wi abi fu de makandra baka nanga den lobiwan fu wi di dede, na wan moi howpu. Ma wi kan bribi a sani dati? Fu man kisi piki tapu na aksi dati, dan a bun fu luku na eksempre fu den apostel fu Yesus Krestes.

Den apostel ben e bribi tranga taki den dedewan o kisi wan opobaka. Fu san ede? Den ben abi awansi tu reide fu bribi a sani dati. A fosi reide na disi: Yesus srefi ben kisi wan opobaka. Den apostel nanga „moro leki feifi hondro brada”, ben si Yesus di a kisi wan opobaka (1 Korentesma 15:6). Boiti dati, furu sma ben sabi dati èn den ben e bribi en tu, soleki fa den fo Evangelietori e sori.—Mateyus 27:62–28:20; Markus 16:1-8; Lukas 24:1-53; Yohanes 20:1–21:25.

A di fu tu reide, na taki den apostel ben si taki Yesus ben wiki awansi dri dedesma. A fosi leisi dati ben de na ini Nain, baka dati na ini Kaperna-um, èn te fu kaba na ini Betania (Lukas 7:11-17; 8:49-56; Yohanes 11:1-44). Wi ben taki kaba fu a lastiwan fu den opobaka dati na ini a tijdschrift disi. A sma dati ben de wan bun mati fu Yesus. Meki wi go luku moro fara san pasa.

„Yu brada o kon na libi baka.” Na a sani dati Yesus ben taigi Marta. Lasarus, a brada fu en, ben dede fo dei kaba. Na a bigin, Marta no ben e frustan san den wortu fu Yesus ben wani taki. „Mi sabi taki a o kon na libi baka”, na so a piki, ma a ben denki taki dati ben o pasa na ini a ten di ben de na den fesi. Baka di a yere Yesus taki: „Mi na a opobaka nanga a libi”, dan yu kan frustan fa a skreki di a si taki Yesus wiki a dede brada fu en!—Yohanes 11:23-25.

Pe Lasarus ben de den fo dei di a ben dede? Lasarus no taki nowan sani di ben sori taki a ben de na libi na wan tra presi den fo dei dati. Nôno, Lasarus no ben abi wan yeye di ben e libi go doro èn di ben go na hemel. Di Yesus wiki Lasarus, dan a no ben hari en puru na hemel pe a ben abi wan koloku libi na Gado sei. Sobun, pe Lasarus ben de na ini den fo dei di a ben dede? Fu taki en leti, a ben e sribi na ini a grebi.—Preikiman 9:5, 10.

Hori na prakseri taki Yesus agersi dede nanga wan sribi, èn te sma e kisi wan opobaka, dan den  e wiki fu a sribi dati. Bijbel e taki: „’Wi mati Lasarus e sribi, ma mi e go drape fu wiki en.’ Fu dati ede den disipel taigi en: ’Masra, efu a e sribi, a o kon betre.’ Den sani di Yesus taki ben abi fu du nanga a dede fu Lasarus. Ma den ben prakseri taki a ben taki dati Lasarus go sribi fu kan rostu. Dati meki Yesus taigi den krin: ’Lasarus dede’” (Yohanes 11:11-14). Di Yesus wiki Lasarus, dan a gi en libi so taki a ben kan de makandra baka nanga en famiri. Dati na wan moi kado di Yesus ben gi a famiri dati!

Di Yesus gi sma wan opobaka na grontapu, dan dati ben de fu sori san a o du leki Kownu fu Gado Kownukondre na ini a ten di e kon. * Te Yesus o tiri grontapu komoto fu hemel, dan a o gi libi baka na den sma di e sribi na ini a grebi. Dati meki a taki: „Mi na a opobaka.” Prakseri fa yu o prisiri te yu o si den lobiwan fu yu baka! Prakseri tu fa den sma dati o breiti!—Lukas 8:56.

Yesus ben taigi Marta: „A sma di e bribi na ini mi, sa kon na libi baka, awansi a dede. A sma di e libi èn di e bribi na ini mi, no sa dede noiti” (Yohanes 11:25, 26). Den dedewan di Yesus o gi libi baka te a o tiri wán dusun yari, o abi a howpu fu libi fu têgo, solanga den poti bribi na ini en.

Baka di Yesus ben taki den moi sani dati fu na opobaka, dan a aksi Marta a sani disi di meki taki a ondrosuku en ati: „’Yu e bribi disi?’ A taigi en: ’Iya, mi Masra. Mi e bribi taki yu na a Krestes, a Manpikin fu Gado’” (Yohanes 11:26, 27). Fa a de nanga yu? Yu ben o wani kon abi a srefi bribi di Marta ben abi na ini na opobaka howpu? A fosi sani di yu musu du, na taki yu musu kon sabi san Gado abi na prakseri gi libisma (Yohanes 17:3; 1 Timoteyus 2:4). Te wi sabi den sani dati, dan dati kan meki wi kon abi bribi. Fu san ede yu no e aksi Yehovah Kotoigi fu sori yu san Bijbel e leri fu a tori disi? Den o breiti fu taki nanga yu fu a tumusi moi opobaka howpu.