1. San ben muilek gi furu fu wi fu du?

 WI ALAMALA wani anbegi Yehovah nanga wi heri ati èn wi wani taki a feni wi bun. Dati meki wi e poti wan tu marki na ini na anbegi fu wi. Kande wi wani kweki wan Kresten fasi, kande wi wani leisi Bijbel ibri dei, kande wi wani studeri moro bun noso kande wi wani preiki moro bun. Kande yu poti so wan marki, ma a muilek fu doro en. Efu dati de so, dan yu no de yu wawan. Fu eksempre, Philip ben wani begi moro leisi wan dei èn a ben wani begi moro bun tu, ma a no ben man feni ten fu begi. Erika ben wani doro biten na den preikiwroko konmakandra, ma toku a ben e doro lati na bijna ala den preikiwroko konmakandra. Tomáš pruberi omeni tron fu leisi a heri Bijbel. A e taki: „Eigenlijk mi no ben lobi leisi Bijbel. Dri leisi mi pruberi fu leisi en, ma ibri tron baka mi ben man doro teleki Lefitikus.”

2. Fu san ede wi no musu lasi-ati efu wi no doro wan marki ete di wi poti?

² Efu yu poti wan marki di yu no doro ete, dan no lasi-ati. Srefi efu na wan makelek sani yu ben wani du, toku dati kan teki ten nanga furu muiti. Efu yu e du muiti ete fu doro a marki dati, dan dati e sori taki a matifasi di yu abi nanga Yehovah prenspari gi yu èn yu wani du ala san yu man fu plisi en. Yehovah breiti nanga a muiti di yu e meki. A no de fu taki dati a no e fruwakti moro fu yu leki san yu man gi en (Ps. 103:14; Mika 6:8). Dati meki yu musu poti wan marki di yu o man doro. Efu yu poti a marki dati, dan san yu kan du fu doro en? Meki wi go luku fa yu kan du dati.

3. Fu san ede a prenspari fu abi na angri fu doro wan marki?

³ A prenspari srefisrefi taki yu abi na angri fu doro a marki di yu poti. Te yu de fayafaya fu doro wan marki, dan yu o du tranga muiti fu doro en. Wi kan agersi a firi dati nanga a winti di e wai na ini den seiri fu wan boto. Efu a winti e tan wai, dan a sma na ini a boto o doro pe a musu go. Èn efu a winti e wai tranga, dan a kan doro moro esi srefi. Na so a de tu taki o moro wi de fayafaya fu doro wan marki, o moro esi wi o doro en. David, wan brada na ini El Salvador e taki: „Te yu abi na angri fu doro wan marki, dan yu o du moro muiti. Yu no e meki noti tapu yu fu doro a marki dati.” Sobun, san yu kan du fu kon abi na angri fu doro den marki fu yu?

4. Gi san wi kan begi? (Filipisma 2:13) (Luku a fowtow.)

⁴ Begi Gado fu gi yu a firi fu doro wan marki. Nanga yepi fu en santa yeye, Yehovah kan gi yu a firi fu doro a marki fu yu. (Leisi Filipisma 2:13.) Son leisi wi e poti wan marki fu di wi sabi taki wi musu du en èn dati na wan bun sani. Ma kande wi no abi na angri fu doro a marki dati. Na so a ben de nanga Norina, wan sisa na ini Uganda. A ben poti en leki marki fu feni wan Bijbelstudie. Ma fu di a ben feni taki a no ben de wan bun leriman, meki a no ben e firi fu suku wan studie. San yepi en? A e fruteri: „Mi bigin aksi Yehovah ibri dei fu gi mi a firi fu studeri Bijbel nanga wan sma. Mi bigin du muiti tu fu tron wan moro bun leriman. Baka wan tu mun mi kon si taki mi ben e angri fu studeri Bijbel nanga wan sma. A srefi yari dati, mi bigin tu Bijbelstudie.”

5. Fu sortu sani wi kan denki dipi fu kon abi na angri fu doro den marki fu wi?

⁵ Denki dipi fu den sani di Yehovah du gi yu (Ps. 143:5). Na apostel Paulus ben e denki dipi fu den bun sani di Yehovah ben du gi en èn a sani disi gi en deki-ati fu wroko tranga gi Yehovah (1 Kor. 15:9, 10; 1 Tim. 1:12-14). Na so a de tu taki o moro yu e denki dipi fu den sani di Yehovah du gi yu, o moro yu o kisi na angri fu doro a marki di yu poti (Ps. 116:12). Luku san yepi wan sisa na ini Honduras fu doro a marki di a ben poti fu tron wan gewoon pionier. A e taki: „Mi prakseri fa Yehovah lobi mi. A yepi mi fu feni a pipel fu en. A e sorgu gi mi èn a e kibri mi gi ogri. Di mi ben e denki dipi fu den sani dati, dan mi kisi moro lobi gi en èn mi kon abi na angri fu doro den marki fu mi.”

6. Sortu tra sani kan yepi wi fu kon abi na angri fu doro wan marki?

⁶ Tan poti prakseri na den wini di yu o kisi te yu doro a marki fu yu. Luku san yepi Erika di ben wani doro biten na den preikiwroko konmakandra. A e taki: „Mi kon  si taki mi ben e misi bun furu fu di mi ben lati gi a preikiwroko. Ma efu mi ben o doro biten, dan mi ben o man taki den brada nanga sisa odi èn mi ben o man taki nanga den. Mi ben o kisi wini tu fu den bun rai di ben o yepi mi fu lobi a preikiwroko èn fu du en moro bun.” Erika tan poti prakseri na den wini di a ben o kisi te a ben de biten èn a doro a marki fu en. Na sortu wini yu kan poti prakseri? Efu yu poti en leki marki fu leisi Bijbel noso fu begi moro bun, dan prakseri fa a o yepi yu fu tron wan moro bun mati fu Yehovah (Ps. 145:18, 19). Efu yu wani kon abi wan fasi di Kresten musu abi, dan prakseri fa dati o yepi yu fu feni en moro bun nanga trawan (Kol. 3:14). Kande yu kan skrifi den reide fu san ede yu wani doro a marki di yu poti. Luku den sani di yu skrifi ibri tron baka. Tomáš di wi ben kari kaba, e taki: „O moro reide mi abi fu doro wan marki, o moro mi o meki muiti fu doro en.”

7. San yepi Julio nanga en wefi fu doro a marki fu den?

⁷ Suku mati di o gi yu deki-ati fu doro a marki di yu poti (Odo 13:20). Luku san yepi Julio nanga en wefi fu doro a marki di den ben poti fu go dini na wan presi pe moro preikiman de fanowdu. Julio e taki: „Wi meki mati di ben e gi wi deki-ati fu doro a marki fu wi èn wi ben e taki nanga den fu den sani di wi ben wani du. Furu fu den ben doro den srefi sortu marki kaba èn dati meki den ben man gi wi bun rai. Den mati fu wi ben e aksi wi tu fa sani ben e waka èn den gi wi deki-ati te wi ben abi dati fanowdu.”

8. San kan pasa efu wi e du muiti fu doro wan marki soso te wi e firi fu du dati? (Luku a fowtow.)

⁸ Ma wi alamala abi en taki son leisi wi no e firi fu du wan sani. Disi wani taki dati wi no kan meki muiti fu doro a marki fu wi? Nôno. Luku na eksempre disi: A winti na wan fu den prenspari sani di meki wan seiriboto doro a presi pe a musu go. Ma a no ala ten a winti e wai tranga èn son leisi a no e wai srefisrefi. Disi wani taki dati a boto no man go na fesi? Dati no abi fu de so. Son seiriboto abi wan masyin èn trawan abi pari. A botoman kan gebroiki den sani disi fu tyari a boto go pe a musu go. Wi kan agersi a winti di e wai nanga a firi di wi abi fu doro wan marki. A no ala ten wi e firi fu du muiti fu doro a marki di wi poti. Sobun, efu wi e meki muiti fu doro a marki fu wi soso te wi e firi fu du dati, dan kande wi no o doro en noiti. Ma neleki fa a botoman e feni tra fasi fu doro pe a musu go, na so wi kan tan meki muiti fu doro a marki fu wi, srefi te wi no e firi fu du dati. Aladi wi o abi fu dwengi wisrefi, toku wi o breiti te wi doro a marki fu wi. Fosi wi go luku san kan yepi wi na ini a  situwâsi disi, wi o luku wan aksi di kan opo kon.

9. Wi musu tan pruberi fu doro wan marki srefi te wi no e firi fu du dati? Fruklari dati.

⁹ Yehovah wani taki wi e dini en nanga prisiri èn nanga wi heri ati (Ps. 100:2; 2 Kor. 9:7). Ma fa a de te wi no e firi fu doro wan marki? Wi musu tan du muiti ete fu doro en? Luku na eksempre fu Paulus. A ben taki: „Mi e naki mi skin nanga kofu èn mi e basi en neleki a de wan srafu” (1 Kor. 9:25-27). Paulus ben dwengi ensrefi fu du san bun, srefi te a no ben e firi fu du dati. Yehovah ben breiti nanga a wroko di Paulus ben du gi en? Iya, seiker! Èn Yehovah blesi en gi a muiti di a ben meki.​—2 Tim. 4:7, 8.

10. Sortu wini wi o kisi te wi e du muiti fu doro wan marki srefi te wi no e firi fu du dati?

¹⁰ Na so a de tu taki Yehovah breiti te a e si taki wi e du muiti fu doro a marki fu wi, srefi te wi no e firi fu du dati. A breiti nanga wi fu di a sabi taki srefi efu wi no lobi fu du wan sani, toku wi e du dati fu di wi lobi en. Neleki fa Yehovah ben blesi Paulus, na so a o blesi wi gi a muiti di wi meki (Ps. 126:5). Èn te wi e si fa Yehovah e blesi wi, dan dati kan gi wi na angri fu doro a marki fu wi. Lucyna, wan sisa fu Polen, e taki: „Son leisi mi no wani go na ini a preikiwroko, spesrutu te mi weri. Ma te mi go, dan mi e firi bun bakaten èn a sani dati na wan blesi trutru.” Sobun, kow go luku san wi kan du te wi no e firi fu du wan sani.

11. Fa Yehovah kan yepi wi fu dwengi wisrefi?

¹¹ Begi Gado fu yepi yu fu dwengi yusrefi. Nofo tron te wan sma e dwengi ensrefi, dan a e hori ensrefi fu no du ogri. Ma wan sma musu dwengi ensrefi tu fu du bun, spesrutu efu wan sani muilek fu du noso efu a no e firi fu du en. Hori na prakseri taki a dwengi di wi man dwengi wisrefi na wan fu den fasi di a yeye fu Gado e meki sma kisi. Dati meki yu musu aksi Yehovah fu gi yu en santa yeye so taki a kan yepi yu fu dwengi yusrefi moro (Luk. 11:13; Gal. 5:22, 23). David, di ben kari kaba na ini na artikel, e fruteri fa begi yepi en. A ben wani studeri ibri wiki. A e taki: „Mi ben e aksi Yehovah fu yepi mi fu dwengi misrefi. Fu di a yepi mi, meki mi ben man meki wan bun schema èn mi kon abi a gwenti fu studeri ibri wiki.”

12. Fa a gronprakseri na ini Preikiman 11:4 kan yepi wi fu doro den marki fu wi?

¹² No wakti teleki sani e waka bun. Na ini a grontapu disi, ala sani no o waka bun noiti. Efu wi e wakti teleki dati pasa, dan kande noiti wi o doro a marki fu wi. (Leisi Preikiman 11:4.) Wan brada di nen Dayniel e taki: „Noiti ala sani e waka soleki fa wi wani. Dati meki wi no musu wakti, ma wi musu bigin du wan sani.” Paul, wan brada na ini Uganda, e taki fu wan tra reide fu san ede wi no musu draidrai fu du wan sani: „Te wi e bigin du san wi musu du, srefi te a muilek, dan Yehovah o yepi wi.”​—Mal. 3:10.

13. Sortu wini yu o kisi te yu e bigin du pikinpikin sani fu doro a marki fu yu?

¹³ Bigin du pikinpikin sani. Kande wi no e firi fu doro a marki fu wi fu di a muilek fu doro en. Efu na so a de nanga yu, dan yu denki taki yu kan du pikinpikin sani fu doro a marki dati? Efu yu wani kweki wan fu den fasi di Kresten musu abi, dan fu san ede yu no e pruberi fu sori a fasi dati na ini pikinpikin sani? Efu yu wani leisi a heri Bijbel, dan kande yu no abi fu leisi tumusi langa, ma yu kan bigin nanga wan syatu pisi. Tomáš, di wi ben taki fu en  kaba na a bigin, ben feni en muilek fu doro a marki di a ben poti fu leisi a heri Bijbel na ini wán yari. A e taki: „Mi kon si taki mi no ben o man leisi Bijbel na ini wán yari. Dati meki mi bosroiti fu pruberi baka, ma disi leisi, mi ben o leisi wan tu paragraaf ibri dei èn mi ben o denki dipi fu den. A sani disi meki taki mi bigin lobi leisi Bijbel.” O moro Tomáš ben lobi leisi Bijbel, o moro a ben e leisi. Te fu kaba a leisi a heri Bijbel. b

14. Sortu sani kan meki en muilek gi wi fu doro a marki di wi poti?

¹⁴ Ma srefi te wi e firi fu doro wan marki, noso srefi te wi man dwengi wisrefi, toku sani no o waka ala ten soleki fa wi wani. Bijbel e taki dati ’sani di wi no e fruwakti’ kan meki wi lasi ten èn den kan puru wi prakseri na a marki di wi wani doro (Preik. 9:11). Kande wi e firi brokosaka èn kande wi no abi so furu krakti (Odo 24:10). Fu di wi abi swakifasi, meki wi kan du sani di e meki en moro muilek gi wi fu doro den marki di wi poti (Rom. 7:23). A kan tu taki wi skin weri (Mat. 26:43). San kan yepi wi te sani no e waka soleki fa wi wani?

15. Efu sani no waka soleki fa yu ben wani, dan disi wani taki dati yu no musu du muiti moro? Fruklari dati. (Psalm 145:14)

¹⁵ Awinsi sani no waka soleki fa yu wani, toku disi no wani taki dati yu no musu du muiti moro. Bijbel e taki dati problema kan miti wi doronomo. Ma Bijbel e taki tu taki wi kan pruberi baka, spesrutu te Yehovah e yepi wi. (Leisi Psalm 145:14.) Philip, a brada di ben kari kaba, e taki: „Mi no e tan prakseri omeni leisi mi no ben man doro a marki fu mi. Na presi fu dati, mi e prakseri omeni leisi mi bigin du muiti baka fu doro a marki dati.” David di  ben kari kaba na ini na artikel e taki: „Te sani no waka soleki fa mi ben wani, dan mi no e si dati leki wan problema, ma mi e si en leki wan okasi fu sori Yehovah o furu mi lobi en.” Iya, te yu e tan meki muiti fu doro a marki fu yu, srefi te a muilek, dan yu e sori Yehovah taki yu wani prisiri na ati fu en. Yehovah musu fu breiti te a e si fa yu e tan du muiti fu doro a marki fu yu.

16. Te wi no man doro a marki fu wi, dan san dati kan leri wi?

¹⁶ Te yu no man doro a marki fu yu, dan a bun fu leri fu dati. Prakseri san meki taki yu no ben man doro a marki dati èn aksi yusrefi: ’San mi kan du tra fasi so taki a sani disi no pasa moro?’(Odo 27:12) Ma son leisi te yu no man doro wan marki di yu poti, dan dati kan sori taki yu ben wani du wan sani di yu no man du. Efu yu feni taki disi na a situwâsi fu yu, dan luku baka san yu ben poti leki marki fu si efu a bun gi yu. c Yehovah no o denki takru fu yu efu yu no ben man doro wan marki di ben muilek tumusi gi yu fu doro.​—2 Kor. 8:12.

17. Fu san ede wi musu tan prakseri den marki di wi doro kaba?

¹⁷ Prakseri den marki di yu doro kaba. Bijbel e taki dati „Gado no e du sani di no reti. Dati meki a no o frigiti a wroko di unu du” (Hebr. 6:10). Yu no musu frigiti dati tu. Prakseri den marki di yu doro kaba. Kande yu tron wan bun mati fu Yehovah, kande yu e fruteri trawan fu en, noso kande yu teki dopu. Neleki fa yu go na fesi èn doro den marki di yu ben poti fosi, na so yu kan tan go na fesi fu doro den marki di yu poti now.​—Fil. 3:16.

18. San wi no musu frigiti te wi e du muiti fu doro a marki fu wi? (Luku a fowtow.)

¹⁸ Te Yehovah yepi yu, dan yu o man doro a marki fu yu èn yu o prisiri neleki wan botoman di e doro pe a ben musu go. Ma no frigiti taki furu botoman e prisiri tu nanga den sani di den e si te den de na pasi. Yu kan prisiri tu te yu e pruberi fu si fa Yehovah e yepi yu te yu e meki muiti fu doro a marki fu yu (2 Kor. 4:7). Efu yu e tan meki muiti, dan yu o kisi moro bigi blesi.​—Gal. 6:9.