Den apostel ben go preiki na difrenti presi èn now den drai kon baka, leti fosi a Paskafesa fu a yari 32 bigin. Den ben weri èn dati meki Yesus go nanga den na Betsaida nanga boto. Drape den ben kan rostu pkinso. Ma di a boto doro syoro, Yesus si taki dusundusun sma ben kon wakti den drape. Aladi Yesus ben wani de nanga den apostel fu en w’wan, tòg a sori switifasi gi den sma èn a meki den tan. A dresi den wan di ben siki, dan a bigin gi den leri. A heri dei Yesus leri den sani fu Gado Kownukondre. Di a presi bigin dungru, den apostel kon na Yesus, dan den taigi en: ’Angri e kiri den sma. Seni den gwe so taki den kan go suku sani fu nyan.’

Yesus taki: ’Den no abi fu gwe. Gi den wan sani fu nyan.’ Den apostel aksi en: ’Yu wani taki un musu go bai n’nyan gi den?’ Filipus, wan fu den apostel, taki: ’Awinsi wi abi bun furu moni, tòg a no o sari fu bai brede gi so furu sma.’

Yesus aksi den: ’Omeni brede wi abi?’ Andreas piki: ’Wi abi feifi brede nanga tu pkin fisi. A no o sari srefsrefi.’ Yesus taki: ’Tyari den brede nanga den fisi kon gi mi.’ Ne a taigi den sma fu go sdon na tapu a grasi na ini grupu fu 50 nanga 100 sma. Yesus teki den brede nanga den fisi, a luku go na hemel, dan a begi. Ne a gi den apostel a brede meki den prati gi den sma. Den 5000 man, den uma nanga den pkin nyan te den bere furu. Baka dati den apostel piki den brede di tan abra, so taki noti no  fermorsu. Den furu 12 baskita! Yu no feni taki disi na wan bigi wondru?

Di den sma si a wondru disi, den ben wani taki Yesus tron den kownu. Ma Yesus ben sabi taki a yuru no ben doro gi Yehovah fu poti en leki kownu. Dati meki a seni den sma gwe, dan a taigi den apostel fu go na abrasei fu a Se fu Galilea. Den apostel go na ini wan boto èn Yesus go na wan bergi en w’wan. Fu san ede? Fu di a ben wani abi ten fu begi en P’pa. Awinsi Yesus ben abi furu fu du, tòg a ben e meki ten fu begi.