Grankownu augustus fu a Gran Kownukondre Rome ben taki dati ala den Dyu ben musu go na den foto pe den gebore fu skrifi den nen na lantibuku. Dati meki Yosef nanga Maria go na Betlehem, a foto pe Yosef en famiri ben kmoto. Heri esi Maria ben o kisi en beibi.

Di den doro na Betlehem, a wan-enkri presi pe den feni fu tan na wan pen pe den meti ben e tan. Na drape Maria meki en manpkin Yesus. A domru en na ini wan krosi, dan a poti en safri na ini wan n’nyan-baki fu den meti.

Krosbei fu Betlehem, wan tu skapuman ben de na dorosei e luku den skapu fu den. Ne wantronso wan engel ben tnapu na den fesi èn a glori fu Yehovah ben skèin na den lontu. Den skapuman ben frede srefsrefi, ma na engel taigi den: ’No frede. Mi abi bun nyunsu gi unu. Tide a Mesias gebore na Betlehem.’ Ne wantronso furu engel ben de  fu si na loktu èn den ben taki: ’Gi glori na Gado èn meki sani waka bun na grontapu.’ Baka dati den engel gwe. San den skapuman du?

Den skapuman taigi makandra: ’Meki wi go wantewante na Betlehem.’ Den go es’esi èn den feni Yosef, Maria nanga a beibi na ini a pen.

Den skapuman ferteri san na engel taigi den fu a beibi. Ala sma di yere ben ferwondru. Maria ben e denki fu den sani di na engel taki èn noiti a fergiti den. Den skapuman go baka na den skapu fu den. Den gi Yehovah tangi fu ala den sani di den si èn yere.