Yosua 10:1-43

10  Now Kownu Adoni-Seidek fu Yerusalem yere taki Yosua teki a foto Ai+ abra èn taki a pori a foto dati.+ A yere tu taki a srefi sani di Yosua du nanga a foto Yerikow+ èn nanga a kownu+ drape, a du tu nanga a foto Ai èn nanga a kownu+ fu a foto dati. A yere sosrefi taki den Gibeonsma ben meki mofo nanga Israel fu no feti nanga makandra+ èn taki den ben e moksi nanga den Israelsma.  Disi meki taki a kon frede srefisrefi,+ fu di Gibeon ben de wan bigi foto. A ben de neleki wan fu den bigi foto na ini a kownukondre. Gibeon ben bigi moro Ai+ èn ala den man fu Gibeon ben de tranga man.  Fu dati ede Kownu Adoni-Seidek fu Yerusalem+ seni boskopu gi Kownu Hoham fu Hebron,+ Kownu Pireyam fu Yarmut,+ Kownu Yafia fu Lakis,+ nanga Kownu Debir fu Eklon.+ A taki:  „Un kon na mi fu yepi mi. Meki wi go feti nanga den sma fu Gibeon, bika den ben meki mofo nanga Yosua èn nanga den Israelsma fu no feti nanga den.”+  Sobun, a kownu fu Yerusalem, a kownu fu Hebron, a kownu fu Yarmut, a kownu fu Lakis, nanga a kownu fu Eklon tyari ala den legre fu den kon na wán. Den feifi kownu disi fu den Amorietsma+ seti kampu krosibei fu Gibeon èn den hari go feti nanga den sma fu a foto dati.  Ne den man fu Gibeon seni boskopu gi Yosua na ini a srudatikampu na Gilgal.+ Den taki: „No libi den srafu fu yu.+ Kon na wi esi-esi èn yepi wi, so taki wi kan tan na libi, bika ala den kownu fu den Amorietsma di e libi na den bergikontren span anu makandra fu feti nanga wi.”  Dati meki Yosua, den srudati+ fu en nanga ala den tranga, deki-ati man+ hari gowe fu Gilgal.  Dan Yehovah taigi Yosua: „No frede den,+ bika mi o meki yu wini den.+ Nowan fu den o man feti nanga yu.”+  Na so a kon pasa taki Yosua hari go feti nanga den Amorietsma di no ben sabi taki a ben o kon. Heri neti Yosua nanga en legre waka fu Gilgal go na Gibeon. 10  Ne Yehovah bruya den Amorietsma.+ Baka dati den Israelsma bigin kiri bun furu fu den drape na Gibeon.+ Den hari go na baka den Amorietsma tu di ben e kren a bergipasi di e go na a foto Bet-Horon. Den hari go na den baka te na Aseka+ nanga Makeda+ èn den kiri den. 11  Dan den Amorietsma di ben e saka a bergipasi di e go na Bet-Horon, bigin lon gowe gi den Israelsma. Ne Yehovah meki bigi pisi ijs+ fadon komoto fu hemel kon na den tapu, a heri pisi ten di den ben de na pasi, teleki den doro Aseka. Na so den dede. Den Amorietsma di dede fu di den pisipisi ijs kiri den, ben furu moro leki den Amorietsma di den Israelsma kiri nanga feti-owru. 12  A dei di Yehovah meki den Israelsma wini den Amorietsma, Yosua taki nanga Yehovah. Na fesi heri Israel a taki:„Son,+ tan pe yu de. Tan skèin na Gibeon.+Mun, tan skèin na Ayalon-lagipresi.”+ 13  Dati meki a son tan leti drape pe a ben de èn a mun no dribi, teleki a pipel fu Israel wini ala den feanti fu den.+ A no dati skrifi na ini a buku fu Yasyar?+ A dei dati son no dongo. Wan heri dei a tan skèin.+ 14  A dei dati ben de a fosi leisi taki Yehovah arki a sten fu wan libisma na so wan fasi.+ Noiti ete so wan sani pasa èn a no pasa noiti moro tu. Iya, Yehovah srefi ben e feti gi Israel.+ 15  Baka dati Yosua nanga ala den srudati fu Israel drai go baka na a srudatikampu na Gilgal.+ 16  Now den feifi kownu lon+ go kibri na ini a bergi-olo na Makeda.+ 17  Ne sma go taigi Yosua: „Wi feni den feifi kownu e kibri na ini a bergi-olo na Makeda.”+ 18  Dati meki Yosua taigi den: „Un lolo bigi ston poti na a mofo fu a bergi-olo èn meki man hori wakti drape. 19  Ma unsrefi no musu tan drape. Hari go na baka den feanti fu unu èn kiri den wan di de te na bakasei fu a legre fu den.+ No meki den go na ini den foto fu den, bika Yehovah un Gado o meki unu wini den.”+ 20  Na so Yosua nanga den Israelsma kiri den Amorietsma. Bun furu fu den lasi den libi.+ Den wan di no dede, lon go na den foto di ben abi bigi skotu.+ 21  Baka di a legre fu Israel wini a feti, den drai go baka na a kampu fu den na Makeda pe Yosua ben de. Nowan fu den ben kisi mankeri. Nowan sma ben prefuru fu kosi den Israelsma.+ 22  Dan Yosua taki: „Un puru den ston na a mofo fu a bergi-olo. Tyari den feifi kownu kon na dorosei. Tyari den kon na mi.” 23  Ne den du dati. Disi na den feifi kownu di den tyari go na Yosua na dorosei fu a bergi-olo: a kownu fu Yerusalem,+ a kownu fu Hebron,+ a kownu fu Yarmut, a kownu fu Lakis,+ nanga a kownu fu Eklon.+ 24  Fa den tyari den kownu kon na dorosei gi Yosua, a kari ala den man fu Israel kon èn a taigi den legre-edeman di ben hari go feti makandra nanga en: „Un kon dyaso. Poti un futu na tapu a bakaneki fu den kownu disi.”+ Ne den kon èn den poti den futu na tapu a bakaneki fu den kownu.+ 25  Dan Yosua taigi den: „No frede èn no beifi.+ Abi deki-ati èn no meki sma tapu skreki gi unu, bika disi na san Yehovah o du nanga ala den feanti di wani feti nanga unu.”+ 26  Baka dati Yosua kiri den kownu èn a anga den na feifi postu. A libi den drape teleki neti tapu.+ 27  Di son ben o dongo, Yosua gi den man a komando fu puru den dedeskin na den postu+ èn fu trowe den na ini a bergi-olo pe den kownu disi ben go kibri. Baka dati den tapu a mofo fu a bergi-olo nanga bigi ston. Te na a dei fu tide den ston de drape ete. 28  A dei dati Yosua teki Makeda+ abra èn a kiri den sma na ini a foto nanga feti-owru. A kownu nanga ala den sma drape, a figi puru krinkrin.+ A no meki nowan sma tan na libi. A srefi sani di a du nanga a kownu fu Yerikow, na dati a du tu nanga a kownu fu Makeda.+ 29  Baka dati Yosua nanga a heri legre fu Israel hari gowe fu Makeda, dan den go na Libna èn den feti nanga den sma fu a foto dati.+ 30  Na so Yehovah meki Israel wini a foto Libna nanga a kownu fu a foto dati. Den kiri ala den sma fu a foto dati nanga feti-owru. Den no meki nowan sma tan na libi na ini a foto. A srefi sani di den du nanga a kownu fu Yerikow, na dati den du tu nanga a kownu fu Libna.+ 31  Baka dati Yosua nanga a heri legre fu Israel hari gowe fu Libna, dan den go na Lakis.+ Den seti kampu krosibei fu Lakis èn den hari go feti nanga den sma fu a foto dati. 32  Na so Yehovah meki Israel wini a foto Lakis, so taki den ben man teki a foto abra na a di fu tu dei. Den kiri ala den sma na ini a foto drape nanga feti-owru,+ soleki fa den ben du nanga den sma fu Libna. 33  Na a ten dati Kownu Horam fu Geiser+ go yepi den sma fu Lakis. Dati meki Yosua kiri a kownu disi nanga ala den srudati fu en. A no meki nowan fu den tan na libi.+ 34  Baka dati Yosua nanga a heri legre fu Israel hari gowe fu Lakis, dan den go na Eklon.+ Den seti kampu krosibei fu Eklon èn den hari go feti nanga den sma fu a foto dati. 35  A dei dati den teki a foto disi abra. Den kiri den sma na ini a foto nanga feti-owru. Ala den sma na ini a foto, den figi puru krinkrin a dei dati, soleki fa den ben du nanga den sma fu Lakis.+ 36  Baka dati Yosua nanga a heri legre fu Israel hari gowe fu Eklon, dan den go na Hebron+ èn den bigin feti nanga den sma fu a foto dati. 37  Ne den Israelsma teki a foto dati abra, dan den kiri ala sma drape nanga feti-owru. Na so den sma nanga a kownu fu a foto kon dede, makandra nanga ala den sma di ben e libi na ini den dorpu lontu a foto dati. Neleki fa Yosua ben du nanga den sma fu Eklon, na so a du tu nanga den sma fu a foto disi. A no meki nowan fu den tan na libi. Na so a figi a foto puru krinkrin, sosrefi ala den sma di ben de drape.+ 38  Te fu kaba Yosua nanga a heri legre fu Israel drai go baka na a foto Debir+ èn den bigin feti nanga den sma fu a foto dati. 39  Na so a teki a foto abra nanga ala den dorpu na en lontu. A wini a kownu èn a kiri den sma fu a foto nanga feti-owru. Na so a figi ala sma drape puru krinkrin.+ A no meki nowan fu den tan na libi.+ A srefi sani di a du nanga a foto Hebron, nanga a foto Libna èn nanga a kownu fu a foto dati,+ na dati a du tu nanga a foto Debir èn nanga a kownu fu a foto dati. 40  Na so Yosua kiri ala den sma fu a kondre: den sma fu den bergikontren,+ den sma fu Negeb-sabana,+ den sma fu a kontren fu Syefela,+ den sma di ben e libi na tapu den bergi,+ nanga ala den kownu fu den. A no meki nowan fu den tan na libi. Ibri libisani+ di ben de drape, a figi puru krinkrin+ soleki fa Yehovah, a Gado fu Israel, ben taigi en fu du.+ 41  Yosua kiri ala den sma fu Kades-Barneya+ nanga Gasa,+ sosrefi ala den sma di ben e libi na Gosen+ nanga Gibeon.+ 42  Na ini wan syatu pisi ten nomo Yosua hari pasa na ini a kondre. A wini ala den kownu èn a teki a heri kondre fu den abra,+ fu di Yehovah, a Gado fu Israel, ben e feti gi Israel.+ 43  Baka dati Yosua nanga a heri legre fu Israel drai go baka na a srudatikampu na Gilgal.+

Futuwortu