Tori fu den apostel 10:1-48

10  Wan man ben de na Sesareya èn a ben nen Kornelius. A ben de wan legre-ofsiri+ fu a srudatigrupu fu Italiakondre.+  A man disi ben abi wan tranga bribi na ini Gado.+ En nanga en heri osofamiri ben e anbegi Gado, a ben e du bun gi pôtiwan,+ èn a ben e begi Gado doronomo.+  Wan dei, na wan ten fu dri yuru bakadina,+ a si krin na ini wan fisyun+ taki wan engel+ fu Gado kon na ini en oso èn na engel disi taki: „Kornelius!”  Kornelius piri en ai luku na engel fu di a ben frede. A taki: „Masra, san pasa?” Na engel taigi en: „Gado memre+ fa yu begi+ èn fa yu du bun gi den pôtiwan.  Fu dati ede, seni wan tu man go na Yope fu go kari Simon di sma sabi tu leki Petrus.  A man disi e tan na Simon, wan man di e meki leer nanga a buba fu meti, èn na oso fu en de krosibei fu a se.”+  Di na engel di ben taki nanga en gowe, dan wantewante Kornelius kari tu fu en futuboi di ben e wroko na en oso èn wan srudati kon. A srudati disi ben abi wan tranga bribi na ini Gado èn a ben de wan fu den sma di ben wroko doronomo gi Kornelius.+  Ne a fruteri den ala sani èn a seni den go na Yope.+  A dei baka dati, di den ben de krosibei fu a foto, dan Petrus go na tapu a daki fu na oso+ fu begi+ na wan ten fu twarfu yuru bakadina. 10  Angri ben kiri en srefisrefi èn a ben wani nyan. Di den ben e sreka a nyanyan gi en, a kisi wan fisyun.+ 11  A si hemel opo+ èn wan sani di ben gersi wan bigi duku ben e saka kon na grontapu. A duku ben tai na ala fo uku. 12  Ala sortu meti di e waka tapu fo futu, meti di e kroipi, nanga fowru di e frei na loktu ben de na ini a duku.+ 13  Ne wan sten taigi en: „Petrus, opo, srakti wan meti èn nyan!”+ 14  Ma Petrus taki: „Nôno Masra, kwetikweti, bika noiti mi nyan wan sani di no krin èn di doti.”+ 15  Ne a sten taigi en a di fu tu leisi: „Yu no musu taki moro taki den sani di Gado krin, na sani di no krin.”+ 16  Baka di a sani disi pasa a di fu dri leisi, a duku opo go na hemel wantewante.+ 17  Petrus ben e broko en ede ete fu sabi san a fisyun di a ben si ben wani taki, di den man di Kornelius seni kon ben e tanapu na a portu. Den ben aksi sma pe na oso fu Simon de.+ 18  Ne den bari aksi efu Simon di sma ben sabi tu leki Petrus, ben tan drape. 19  Di Petrus ben e prakseri ete fu a fisyun, dan a yeye+ taigi en: „Luku, dri man e suku yu. 20  Opo, saka go na gron èn go nanga den. No tweifri kwetikweti, bika na mi seni den kon.”+ 21  Dati meki Petrus saka go na gron na den man èn a taigi den: „Luku, mi na a sma di unu e suku. Fu san ede unu kon dyaso?” 22  Ne den taigi en: „Wan santa engel ben tyari wan boskopu fu Gado kon gi Kornelius,+ taki a musu seni kari yu fu kon na en oso fu fruteri en den sani di yu abi fu taki. A man disi na wan legre-ofsiri, wan reti-ati man di e bribi na ini Gado, èn a abi wan bun nen na a heri Dyu pipel.”+ 23  Fu dati ede Petrus kari den kon na ini na oso èn a meki den tan drape. A dei baka dati, a opo èn a gowe nanga den, makandra nanga wan tu brada fu Yope. 24  A tamara fu en a doro na ini Sesareya. Kornelius ben wakti den kaba èn a ben kari den famiriman nanga den bun mati fu en kon. 25  Di Petrus kon na ini na oso, Kornelius waka miti en èn a saka kindi fu gi en grani. 26  Ma Petrus meki a opo tanapu èn a taigi en: „Opo, mi na wan libisma tu.”+ 27  Aladi a ben e taki nanga en, a waka go na inisei èn drape a si taki furu sma ben kon makandra. 28  A taigi den: „Un sabi heri bun taki a no fiti srefisrefi gi wan Dyu fu moksi nanga sma di no de Dyu, noso fu go na den sma disi.+ Ma toku Gado sori mi taki mi no musu taki fu nowan sma taki a no krin, noso taki a doti.+ 29  Dati meki mi ben de klariklari fu kon di sma seni kari mi. Fu dati ede, mi e aksi unu fu san ede unu seni kari mi.” 30  Ne Kornelius piki en: „Fo dei pasa na wan ten fu dri yuru bakadina,+ mi ben e begi na ini mi oso, di wantronso wan man na ini brenki krosi+ ben e tanapu na mi fesi. 31  A taigi mi: ’Kornelius, Gado yere a begi fu yu èn a memre a bun di yu du gi den pôtiwan.+ 32  Fu dati ede, seni sma go na Yope fu kari Simon kon di sma sabi tu leki Petrus.+ A man disi e tan na ini na oso fu Simon, wan man di e meki leer nanga a buba fu meti èn di e tan krosibei fu a se.’+ 33  Sobun, mi seni sma kon na yu wantewante èn a bun taki yu kon dyaso. We, now wi alamala de na fesi Gado fu yere ala den sani di Yehovah taigi yu fu taki.”+ 34  Ne Petrus taigi en: „Now mi e frustan trutru taki Gado no lobi a wan sma moro a trawan,+ 35  ma awansi fu sortu kondre wan sma de, efu a e lespeki Gado èn a e du san reti, dan Gado feni en bun.+ 36  A boskopu di a seni+ gi den Israelsma na a bun nyunsu fu freide+ di e kon nanga yepi fu Yesus Krestes. Na en na Masra fu ala sma.+ 37  Unu sabi fu sortu tori sma ben taki na ini heri Yudea. Den bigin nanga a tori dati na ini Galilea, baka di Yohanes preiki gi sma taki den musu teki dopu.+ 38  Den ben fruteri fu Yesus fu Nasaret, taki Gado salfu en nanga santa yeye+ èn nanga krakti. Yesus ben e waka na ini a heri kondre e du bun èn a ben e dresi ala sma di Didibri ben kwinsi,+ bika Gado ben de nanga en.+ 39  Wisrefi si ala den sani di a du na ini a kondre fu den Dyu èn na ini Yerusalem. Ma den kiri en tu di den spikri en na wan postu.+ 40  Gado opo a sma disi na a di fu dri dei èn a meki sma si en.+ 41  Ma a no meki ala sma si en. Na wi nomo di nyan èn di dringi nanga en,+ si en baka di a kisi wan opobaka. Gado ben taki na fesi kaba taki na wi ben o si en èn taki na wi ben o fruteri fu en.+ 42  A taigi wi sosrefi fu preiki+ gi a pipel èn fu fruteri den finifini taki disi na a sma di Gado poti fu krutu den libiwan nanga den dedewan.+ 43  Na fu en ala den profeiti ben taki+ dati ibri sma di e bribi na ini en kan kisi pardon fu sondu na ini en nen.”+ 44  Petrus ben e taki ete fu den sani disi, di santa yeye kon na tapu ala den sma di yere san a ben taki.+ 45  Den disipel di ben kon nanga Petrus ben de sma di besnèi. Den ben fruwondru, fu di a santa yeye di Gado e gi sma fu soso, ben kon sosrefi na tapu sma di no de Dyu.+ 46  Den ben yere fa den ben e taki tra tongo èn fa den ben e gi Gado glori.+ Ne Petrus aksi: 47  „Suma kan tapu den sma disi di kisi a santa yeye leki wi, fu teki dopu na ini watra?”+ 48  Ne a taigi den fu teki dopu na ini a nen fu Yesus Krestes.+ Baka dati den aksi en fu tan wan tu dei nanga den.

Futuwortu