Esekièl 40:1-49

40  A ben de na a bigin fu a di fu tutenti na feifi yari di wi ben de katiboman,+ na a di fu tin dei fu a mun na ini a di fu tinafo yari baka di sma teki Yerusalem abra.+ A dei dati a yeye fu Yehovah kon na mi tapu+ èn a tyari mi go na wan tra presi.+  Na ini den fisyun di Gado sori mi, a tyari mi go na a kondre Israel. Te fu kaba a meki mi sidon na tapu wan bun hei bergi.+ Na tapu a bergi, na zuidsei,+ wan sani ben de di ben gersi wan foto.  Dan Gado tyari mi go drape. Ne mi si wan man. En skin ben de leki kopro.+ A ben e hori wan vlas-titei* nanga wan markitiki+ na ini en anu. A ben e tanapu na a portu.  Ne a man bigin taki nanga mi. A taki: „Manpikin fu libisma,+ nanga yu eigi ai yu musu luku èn nanga yu eigi yesi yu musu yere. Poti prakseri na ala den sani di mi o sori yu, bika na fu sori yu den sani disi meki mi tyari yu kon dya. Fruteri den Israelsma ala san yu e si.”+  Ne mi si wan skotu dorosei fu a tempel. A ben lontu a heri tempel. Na ini en anu a man ben hori wan markitiki di ben langa sowan dri meter nanga erfu centimeter.* A bigin marki o bradi a skotu ben de. A ben bradi dri meter nanga erfu centimeter èn a ben hei dri meter nanga erfu centimeter.  Dan a man go na a portu. A fesisei fu a portu ben e sori go na owstusei.+ Ne a man kren a trapu fu a portu. A bigin marki a doromofo fu a portu.+ A ben bradi dri meter nanga erfu centimeter èn a tra doromofo ben bradi dri meter nanga erfu centimeter.  A waktiman-kamra ben langa dri meter nanga erfu centimeter èn a ben bradi dri meter nanga erfu centimeter. Na mindri den waktiman-kamra+ yu ben abi wan pisi fu tu meter nanga feifitenti na neigi centimeter. Na a bakasei pisi fu a portu di ben e sori go na a bigi tempel-dyari yu ben abi wan kamra. A doromofo fu a portu na sei a kamra disi ben bradi dri meter nanga erfu centimeter.  Baka dati a go marki a kamra di ben de na a bakasei pisi fu a portu di ben e sori go na a bigi tempel-dyari. A kamra ben bradi dri meter nanga erfu centimeter.+  Na so a marki a kamra fu a portu. A kamra ben bradi fo meter nanga tinafo centimeter. Den pilari na sei a kamra ben bradi wán meter nanga fo centimeter. A kamra fu a portu ben e sori go na a bigi tempel-dyari. 10  Na a wan sei fu a portu di ben e sori go na owstusei, yu ben abi dri waktiman-kamra èn na a tra sei yu ben abi dri kamra tu. Den dri waktiman-kamra disi ben bigi a srefi. Den pilari na a wán sei fu a portu ben bigi a srefi leki den pilari na a tra sei. 11  Baka dati a man marki o bradi a mofo fu a portu ben de. A ben bradi feifi meter nanga tina-aiti centimeter. A portu ben langa siksi meter nanga seibitenti na dri centimeter. 12  Na fesisei fu ibriwan fu den waktiman-kamra wan pikin balkon ben de di ben abi wan lagi skotu. A pikin balkon disi ben bradi feifitenti na tu centimeter. Den pikin balkon ben de na abrasei fu makandra. Wán waktiman-kamra ben langa dri meter nanga erfu centimeter èn a ben bradi dri meter nanga erfu centimeter. 13  Baka dati a marki o bradi a portu ben de. A bigin marki a pisi pe a daki fu wan fu den waktiman-kamra ben e bigin te go miti a daki fu a waktiman-kamra di ben de na abrasei. A portu ben bradi twarfu meter nanga neigitenti na feifi centimeter.+ A doro fu a wan waktiman-kamra ben de leti na abrasei fu a doro fu a tra waktiman-kamra. 14  Dan a marki den pilari èn a kon si taki den ben hei dritenti na wán meter nanga aiti centimeter. A marki den pilari tu di ben de na sei den kamra fu ala den portu di ben de lontu a bigi tempel-dyari. 15  Fu a fesisei fu a portu pe sma ben musu waka kon na inisei, te go miti a fesisei fu a kamra fu a portu di ben e sori go na a dyari, ben langa tutenti na feifi meter nanga neigitenti centimeter. 16  Ibri waktiman-kamra ben abi fensre na ini a skotu. Na inisei fu a skotu den fensre ben bradi èn na dorosei den ben smara.+ Den pilari na ini den waktiman-kamra ben abi den sortu fensre disi tu. Te yu ben o tanapu na inisei, dan yu ben kan si taki ala den skotu fu den waktiman-kamra ben abi den fensre disi. Na tapu den pilari yu ben abi prenki fu palmbon.+ 17  Na so a man tyari mi go na a bigi tempel-dyari. Drape mi si nyanyan-kamra.+ A heri gron fu a bigi tempel-dyari ben meki fu ston. Dritenti nyanyan-kamra ben de na tapu a ston-gron disi.+ 18  A ston-gron na sei den portu ben bradi a srefi leki a langa sei fu den portu. Den ben kari a pisi fu a ston-gron disi a moro lagi ston-gron. 19  Baka dati a marki o bradi a pisi ben de na mindri a lagi portu nanga a portu fu a pikin tempel-dyari. A pisi disi ben de feifitenti na wán meter nanga aititenti centimeter. A pisi na a owstusei portu èn a pisi na a noordsei portu ben bigi a srefi. 20  A fesisei fu a portu na a bigi tempel-dyari ben e sori go na noordsei. Ne a man marki o langa èn o bradi a portu ben de. 21  Na a wan sei fu a portu yu ben abi dri waktiman-kamra èn na a tra sei yu ben abi dri kamra tu. Den pilari fu a portu disi èn a kamra fu a portu ben bigi a srefi leki den wan fu a fosi portu. A portu ben langa tutenti na feifi meter nanga neigitenti centimeter èn a ben bradi twarfu meter nanga neigitenti na feifi centimeter. 22  Den fensre nanga a kamra fu a portu èn den prenki fu den palmbon+ ben bigi a srefi leki den wan fu a portu di ben e sori go na owstusei. Sma ben kan kren wan trapu fu seibi trei go na a portu. A kamra fu a portu ben de abrasei fu a trapu disi. 23  Abrasei fu a portu na noordsei èn abrasei fu a portu na owstusei yu ben abi wan tra portu sosrefi pe sma ben kan go na a pikin tempel-dyari. Dan a man marki a pisi di ben de na mindri den tu portu disi. A ben de feifitenti na wán meter nanga aititenti centimeter. 24  Na so a man tyari mi go na zuidsei. Ne mi si wan portu di ben e sori go na zuidsei.+ A marki den pilari fu a portu drape èn a kamra na a portu. Den ben bigi a srefi leki den di fu den tra portu. 25  Ala den skotu fu a portu nanga a kamra fu a portu ben abi fensre di ben de a srefi leki den fensre fu den tra portu. A portu ben langa tutenti na feifi meter nanga neigitenti centimeter èn a ben bradi twarfu meter nanga neigitenti na feifi centimeter. 26  Sma ben kan kren wan trapu fu seibi trei fu go na a portu.+ A kamra fu a portu ben de abrasei fu a trapu disi. Na tapu den tu pilari na a kamra fu a portu, yu ben abi prenki fu palmbon. 27  A pikin tempel-dyari ben abi wan tra portu di ben e sori go na zuidsei. Di a man marki a pisi na mindri a portu fu a pikin tempel-dyari nanga a tra portu na zuidsei, a ben de feifitenti na wán meter nanga aititenti centimeter. 28  Na so a meki mi waka na a portu di ben de na zuidsei fu go na a pikin tempel-dyari. Dan a marki a portu na zuidsei. A ben bigi a srefi leki den tra portu. 29  Den waktiman-kamra, den pilari, nanga a kamra fu a portu ben bigi a srefi leki den wan fu den tra portu. Ala den skotu fu a portu nanga a kamra fu a portu ben abi fensre. A portu ben langa tutenti na feifi meter nanga neigitenti centimeter èn a ben bradi twarfu meter nanga neigitenti na feifi centimeter.+ 30  Ala den portu pe sma ben musu waka fu go na a pikin tempel-dyari ben abi wan kamra. Den ben langa twarfu meter nanga neigitenti na feifi centimeter èn den ben bradi tu meter nanga feifitenti na neigi centimeter. 31  A kamra fu a portu ben e sori go na a bigi tempel-dyari. Na tapu den pilari fu a kamra yu ben abi prenki fu palmbon.+ A trapu fu kren go na a portu ben abi aiti trei.+ 32  Na so a man meki mi waka na owstusei fu go na a pikin tempel-dyari. Dan a marki a portu drape. A portu disi ben bigi a srefi leki den tra portu. 33  Den waktiman-kamra, den pilari, nanga a kamra fu a portu ben bigi a srefi leki den wan fu den tra portu. Ala den skotu fu a portu nanga a kamra fu a portu ben abi fensre. A portu ben langa tutenti na feifi meter nanga neigitenti centimeter èn a ben bradi twarfu meter nanga neigitenti na feifi centimeter. 34  A kamra fu a portu ben e sori go na a bigi tempel-dyari. Na tapu den tu pilari na a kamra fu a portu, yu ben abi prenki fu palmbon. A trapu fu kren go na a portu ben abi aiti trei. 35  Dan a tyari mi go na a portu na noordsei+ èn a marki a portu disi. A portu disi ben bigi a srefi leki den tra portu.+ 36  A marki den waktiman-kamra, den pilari, nanga a kamra fu a portu. Ala den skotu fu a portu ben abi fensre. A portu ben langa tutenti na feifi meter nanga neigitenti centimeter èn a ben bradi twarfu meter nanga neigitenti na feifi centimeter. 37  Na a portu di ben e sori go na a bigi tempel-dyari, tu pilari ben de. Na tapu den pilari yu ben abi prenki fu palmbon.+ A trapu fu kren go na a portu ben abi aiti trei. 38  Na den pilari fu a portu yu ben abi wan nyanyan-kamra di ben abi wan doro. Na drape sma ben e wasi den meti gi a bron-ofrandi.+ 39  Na ini a kamra fu a portu yu ben abi tu tafra na a wan sei èn tu tafra na a tra sei. Na tapu den tafra disi sma ben e srakti den meti gi a bron-ofrandi,+ a sondu-ofrandi+ nanga a pardon-ofrandi.+ 40  Na dorosei, na a presi pe sma ben kan kren a trapu fu go na a portu na noordsei, yu ben abi tu tafra. Na a tra sei fu a kamra fu a portu yu ben abi tu tafra sosrefi. 41  Fo tafra ben de na dorosei fu a portu èn fo tafra ben de na ini a kamra fu a portu. Ala nanga ala yu ben abi aiti tafra pe sma ben e srakti meti. 42  Den fo tafra pe den ben e srakti a meti gi a bron-ofrandi ben meki fu ston di koti puru na ini bergi. Wán tafra ben langa seibitenti na aiti centimeter, a ben bradi seibitenti na aiti centimeter èn a ben hei feifitenti na tu centimeter. Na tapu den tafra den ben gwenti poti den wrokosani tu di den ben gebroiki fu srakti den meti gi den bron-ofrandi nanga den tra ofrandi. 43  Na inisei fu a kamra fu a portu yu ben abi planga di ben fasi na ala den seiskotu. Den planga ben de fu poti sani na tapu. Den ben bradi seibi centimeter. Na tapu den tafra sma ben gwenti poti a meti di den ben gi leki ofrandi.+ 44  Dorosei fu a portu di ben de na noordsei fu a pikin tempel-dyari, yu ben abi den nyanyan-kamra fu den singiman.+ A fesisei fu den kamra disi ben e sori go na zuidsei. Wán nyanyan-kamra ben de na sei a portu na owstusei. A fesisei fu a nyanyan-kamra disi ben e sori go na noordsei. 45  Ne a man taigi mi: „A nyanyan-kamra disi di e sori go na zuidsei, na fu den priester di abi a frantwortu fu sorgu gi den sani di musu du na ini a tempel.+ 46  A nyanyan-kamra di e sori go na noordsei, na fu den priester di abi a frantwortu fu sorgu gi den sani di musu du na a altari.+ Den na den bakapikin fu Sadok.+ Den na den Leifisma di kisi a wroko fu kon na fesi Yehovah fu wroko gi en.”+ 47  Baka dati a man go marki a pikin tempel-dyari. A dyari ben langa feifitenti na wán meter nanga aititenti centimeter èn a ben bradi feifitenti na wán meter nanga aititenti centimeter. Sobun, a dyari ben bradi èn a ben langa a srefi. Na altari ben de na fesi a tempel. 48  Dan a tyari mi go na a gadri fu a tempel+ èn a marki den smara skotu drape. Ibriwan fu den skotu ben deki tu meter nanga feifitenti na neigi centimeter èn den ben bradi wán meter nanga feifitenti na feifi centimeter. Wan fu den skotu ben de na a kruktu-anusei fu a gadri èn a trawan ben de na a reti-anusei. 49  A gadri ben langa tin meter nanga dritenti na siksi centimeter èn a ben bradi feifi meter nanga seibitenti centimeter. Efu sma ben wani go na inisei, den ben musu kren wan trapu. Na sei den smara skotu fu a gadri, yu ben abi tu pilari.+

Futuwortu

Luku „vlas” na „Moro sani”, nr. 24.
Hebrewtongo: „siksi èl, fu na èl nanga a bradi fu wan anu.” Den siksi èl, na langa èl. Wan langa èl na a srefi leki wan syatu èl (44,5 centimeter) makandra nanga a bradi fu wan anu (7,4 centimeter).