Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  december 2015

 LEISIMAN E AKSI . . .

Fu san ede Kresneti-gwenti no bun?

Fu san ede Kresneti-gwenti no bun?

Bun langa kaba sma e si Kresneti leki wan Kresten fesa pe sma e memre a dei di Yesus gebore. Ma furu fu den sani di sma e du na a fesa disi e meki taki son sma e aksi densrefi pe den gwenti disi komoto èn san den abi fu du nanga a dei di Yesus gebore.

Meki wi poti prakseri fosi na a Kerstman. Na ini a ten disi sma sabi en leki wan fatu man di weri wan redi paki, di lobi lafu èn di abi wan weti barba. Na ini 1931 sma bigin gebroiki a Kerstman fu meki reklame gi wan bedrijf na ini Amerkankondre di e meki soft. Na ini den yari baka 1950 son sma na ini Brasyonkondre pruberi fu meki den eigi Kerstman di den ben e kari Granpapa Ingi. San ben de a bakapisi? Sma ben lobi a Kerstman moro Granpapa Ingi. Sabiman Carlos E. Fantinati taki dati „sma ben lobi a Kerstman moro leki a beibi Yesus srefi. Na so a Kerstman tron a moro prenspari sma fu a fesa di sma e hori tapu 25 december.” Ma a de so taki a Kerstman na a wan-enkri sani fu Kresneti di no abi noti fu du nanga a dei di Yesus gebore? Fu piki na aksi disi, meki wi go luku fa den fosi Kresten ben e denki fu a tori disi.

Wan wortubuku e taki: „Na ini den fosi tu hondro yari baka di a Kresten bribi seti, den Kresten ben weigri fu memre a friyaridei fu sma di dede gi a bribi, èn srefi a friyaridei fu Yesus” (Encyclopedia Britannica). Fu san ede? Kresten ben e si friyaridei leki wan gwenti fu sma di e anbegi falsi gado. Den no ben wani abi noti fu du nanga a gwenti disi. Fu taki en leti, nowan presi na ini Bijbel skrifi tapu sortu dei Yesus gebore.

Moro leki 300 yari baka di Yesus dede, Lomsu Kerki seti a fesa di den e kari Kresneti, aladi den fosi Kresten no ben wani hori friyari-oso kwetikweti. Lomsu Kerki ben wani taki moro nanga moro sma ben musu kon na ini a kerki. Ma furu sma no ben e kon na ini a kerki fu di den ben lobi den tra bribi na ini Rome èn den fesa di den ben e hori na a kowru pisi ten fu a yari. A buku Christmas in America di Penne L. Restad skrifi e sori taki ibri yari, fu 17 december teleki 1 yanuari, furu Romesma ben gwenti hori ala sortu fesa fu gi grani na den gado fu den. Den ben e prei ala sortu prei èn den ben e waka na ini grupu na strati e meki prisiri. Tapu 25 december den Romesma ben e hori wan fesa fu memre a dei di a Makti Son gebore. Fu di Lomsu Kerki poti Kresneti tapu a dei dati, meki den ben man kisi furu Romesma fu memre a dei di Yesus gebore, na presi fu memre a dei di a son gebore. Gerry Bowler taki na ini wan buku dati na a fasi disi den Romesma „ben man hori den fesa ete di den ben gwenti hori na a kowru pisi ten fu a yari” (Santa Claus, a Biography). Fu taki en leti, den ben „gi den fesadei wan nyun nen, ma den ben hori den owru gwenti ete”.

A de krin fu san ede Kresneti a no wan fesa di Kresten musu hori. Disi abi fu du nanga pe a komoto. Stephen Nissenbaum ben skrifi na ini a buku fu en taki Kresneti „na wan fesa fu falsi anbegi di den Kresten teki abra” (The Battle for Christmas). Fu dati ede Kresneti no e gi glori na Gado nanga en Manpikin Yesus Krestes. Wi musu si a sani disi leki wan lawlaw sani? Bijbel e taki: „San retidu abi fu du nanga kruktudu? Noso san leti abi fu du nanga dungru?” (2 Korentesma 6:14) Kresneti abi so furu gwenti fu falsi bribi, taki nowan sma kan taki dati a de wan fesa di e kruderi nanga Bijbel.Preikiman 1:15.