Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  november 2015

 TORI FU A KAFTI

Fa Gado e denki fu feti?

Fa Gado e denki fu feti?

Fa yu ben o piki na aksi disi? Furu sma e denki taki Gado feni en bun te sma e feti. Den e denki so fu di Gado ben taigi den anbegiman fu en na ini owruten fu go feti nanga tra pipel. Bijbel e taki krin fu a sani disi. Ma tra sma e taki dati Yesus, a Manpikin fu Gado, leri den bakaman fu en fu lobi den feanti (Mateyus 5:43, 44). Sobun, den feni taki bakaten Gado kisi wan tra denki fu feti èn taki now a no feni feti bun.

San yu e denki? Gado feni feti bun? Efu disi de so, dan sortu sei a e teki te sma e feti? Te yu kisi piki tapu den aksi disi, dan kande dati o kenki a fasi fa yu e denki fu feti. Fa so? Efu yu ben sabi taki Gado feni feti bun èn taki a e horibaka gi a srefi sei pe yu de, dan yu ben o breiti fu di yu sabi taki na a sei dati o wini a feti. Ma fa yu ben o firi efu yu ben sabi taki Gado e horibaka gi den sma di e feti teige yu? A no de fu taki dati yu ben o wani abra go na a sei dati, a no so?

Wan moro prenspari sani de fu san ede a bun fu sabi fa Gado e denki fu feti. Te yu kon sabi fa Gado e denki fu feti, dan kande yu o denki tra fasi fu Gado. Kande yu na wan fu den milyunmilyun sma di e pina fu di feti de na ini a kondre fu yu. A no de fu taki dati yu musu kisi piki tapu den aksi disi: A de so taki na lobi Gado lobi feti, meki a e gi pasi taki feti de? A de so taki a e gi sma deki-ati srefi fu feti, fu di a wani si fa trawan e pina? A kan taki a no e du noti fu di a no e broko en ede srefisrefi nanga den sma di trawan e pina?

Kande yu o fruwondru te yu kon sabi taki a piki di Bijbel e gi no e horibaka srefisrefi gi den denki disi. Boiti dati, a fasi fa Gado e denki fu feti no kenki noiti. Meki wi luku san Bijbel e taki fu a fasi fa Gado ben e denki fu feti na ini a ten fu den Israelsma fu owruten. Wi o luku tu fa a ben e denki fu feti na ini a ten di Yesus ben de na grontapu èn na ini a ten fu den fosi Kresten. Disi o yepi wi fu kon sabi fa Gado e denki fu feti na ini a ten disi. Wi o kon sabi tu efu feti o de fu ala ten.