Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  november 2015

 TORI FU A KAFTI | FA GADO E DENKI FU FETI?

Fa Gado ben e denki fu feti na ini owruten

Fa Gado ben e denki fu feti na ini owruten

A pipel ben e pina. Den ben e begi Gado doronomo fu yepi den, ma wan heri pisi ten noti no pasa. A pipel disi ben de den Israelsma, na owruten pipel fu Gado. Den sma di ben e pina den ben de den Egeptesma di ben abi furu makti (Eksodes 1:13, 14). Furu yari langa den Israelsma ben e wakti Gado fu frulusu den fu den Egeptesma. Ma te fu kaba a ten doro taki Gado ben o tyari wan kenki kon (Eksodes 3:7-10). Bijbel e sori taki Gado srefi bigin feti nanga den Egeptesma. Baka makandra, a tyari rampu kon na den Egeptesma tapu, èn te fu kaba a meki a kownu fu Egepte nanga a legre fu en dede na ini a Redi Se (Psalm 136:15). Yehovah Gado sori taki a de „wan tranga fetiman” di e feti gi en pipel.Eksodes 15:3, 4.

Fu di Gado srefi feti nanga den Egeptesma, meki a de krin taki a no ala ten a de teige feti. Son leisi a ben taigi en pipel Israel tu fu go feti nanga tra pipel. Fu eksempre, a ben taigi den fu feti nanga den Kanansma di ben ogri srefisrefi (Deuteronomium 9:5; 20:17, 18). A ben taigi Kownu David fu Israel tu fu feti nanga den Filisteasma di ben e pina den. Gado ben sori David srefi fa fu feti nanga den Filisteasma, so taki a ben kan wini den.2 Samuel 5:17-25.

Den sortu Bijbel tori disi e sori taki te wan pipel ben kan pori a denki fu den Israelsma, noso te den ben e pina den, dan Gado ben taigi den Israelsma fu feti nanga den. Na so a ben e kibri en pipel èn a tru anbegi. Meki wi go luku dri prenspari sani di wi kan leri fu den feti fu Gado.

  1. NA GADO WAWAN BEN E TAKI SUMA BEN O TEKI PRATI NA A FETI. Wan leisi Gado taigi den Israelsma: „Unu no abi fu feti.” Fu san ede? Gado srefi ben o feti gi den (2 Kroniki 20:17; 32:7, 8). A du disi furu tron soleki fa wi si na a bigin fu na artikel disi. Ma son leisi Gado ben taigi den Israelsma fu owruten taki den ben musu go feti. Fu eksempre, den ben musu feti fu teki a Pramisi Kondre abra èn bakaten den ben musu feti tu nanga den tra pipel di ben wani teki a kondre disi abra.Deuteronomium 7:1, 2; Yosua 10:40.

  2. NA GADO WAWAN BEN E TAKI O TEN WAN FETI BEN O FETI. Den futuboi fu Gado ben musu wakti nanga pasensi teleki Gado ben taigi den o ten den ben musu feti nanga den pipel di ben e pina den èn  di ben e du wan lo ogri na den lontu. Solanga Gado no ben taigi den fu go feti, den no ben musu du dati. Ma efu toku den ben go feti, dan Gado no ben e horibaka gi den. Bijbel e sori taki te den Israelsma ben go feti sondro taki Gado taigi den fu du dati, dan nofo tron sani no ben waka bun nanga den srefisrefi. *

  3. Aladi Gado ben feti teige den Kanansma, toku a meki sonwan fu den, soleki Rakab nanga en famiri, tan na libi

    GADO NO E PRISIRI TE WAN SMA DEDE, AWINSI NA WAN OGRI SMA. Yehovah Gado na a sma di e gi libi èn en na a Mekiman fu libisma (Psalm 36:9). Fu dati ede a no lobi te sma e dede. Ma a de wan sari sani taki son ogri-ati sma e suku ala sortu fasi fu pina trawan noso fu kiri den srefi (Psalm 37:12, 14). Fu tyari wan kaba kon na den sortu ogri sani disi, dan son leisi Gado ben meki en pipel feti nanga den ogri sma disi. Ma na ini ala den yari di a meki den Israelsma feti nanga den sortu pipel disi, a ben sori „sari-ati” èn ’en ati no ben e bron esi’ nanga den sma di ben pina den Israelsma (Psalm 86:15). Fu eksempre, Gado ben taigi den Israelsma: „Te unu o go feti nanga den sma na ini wan foto, dan un musu aksi den fosi efu den wani gi densrefi abra” (Deuteronomium 20:10-13). Na so den sma fu a foto ben kisi na okasi fu kenki den libi èn den no ben o abi fu feti moro. Na a fasi disi Gado sori krin taki ’a no e prisiri te wan ogri sma e dede, ma a e prisiri te wan ogri sma e drai en libi èn e tan na libi’.Esekièl 33:11, 14-16. *

Soleki fa wi si, dan na ini owruten Gado ben si feti leki wan fasi fu tyari wan kaba na ogridu èn na a pina di sma e pina trawan. Ma na Gado ben taki o ten wan feti ben o feti èn suma ben o teki prati na a feti. Na en abi a reti fu du disi, a no libisma. Ma a de so taki a ben feni den feti disi bun fu di a lobi kiri sma? Kwetikweti. Fu taki en leti, Gado no lobi ogridu srefisrefi (Psalm 11:5). Ma a de so taki Gado ben e denki tra fasi fu feti di en Manpikin Yesus Krestes ben de na grontapu?

^ paragraaf 7 Fu eksempre, wan leisi Gado taigi den Israelsma fu no feti nanga den Amalèksma èn den Kanansma. Ma toku den go feti. Dati meki furu Israelsma dede na ini a feti dati (Numeri 14:41-45). Furu yari baka dati, Kownu Yosia go feti nanga wan pipel aladi Gado no ben wani dati. A don bosroiti disi meki taki a lasi en libi.2 Kroniki 35:20-24.

^ paragraaf 8 Di den Israelsma ben go feti nanga den Kanansma, den no aksi den fosi efu den wani gi den srefi abra. Fu san ede den no du dati? Fu di den Kanansma ben kisi 400 yari na okasi fu tapu nanga den ogri di den ben e du. Na a ten di den Israelsma go feti nanga den Kanansma, dan a ben de krin taki den sma disi no ben o kenki moro (Genesis 15:13-16). Dati meki den ben musu kisi pori krinkrin. Ma efu son Kanansma ben kenki den libi, dan den Israelsma no ben kiri den.Yosua 6:25; 9:3-27.

Kon sabi moro

SAN NA A BOSKOPU FU BIJBEL?

Den Israelsma e go na ini Kanan

Di den Israelsma go na ini Kanan, fu san ede Yehovah meki Rakab nanga en famiri di ben e libi na ini Yerikow tan na libi?

A WAKTITOREN

Den sani ’di Rakab du,’ meki a ben de „wan reti-ati sma”

Fa a tori fu Rakab e sori taki wi alamala prenspari gi Yehovah? San wi e leri fu a bribi fu en?