Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  oktober 2015

Yu ben sabi a sani disi?

Yu ben sabi a sani disi?

San Herodes ben musu du fu kan meki a tempel na Yerusalem kon moro bigi?

Salomo ben bow a tempel fu Yerusalem na tapu wan bergi. Fu man bow na tapu a bergi, a ben poti skotu na owstusei èn na west-sei na a skin fu a bergi, dan a hei a presi na mindri den skotu, so taki a ben kan bow drape. A ben poti den skotu na difrenti presi fu ondrosei go na tapusei fu a bergi. Ma Herodes ben wani wan tempel di moi moro leki a di fu Salomo. Dati meki a bigin bow moro sani na a tempel èn a meki en kon moro bigi.

Herodes ben meki a plata pisi gron na a noordsei fu a tempel kon moro bigi fu man bow na tapu. Na a zuidsei, a hari wan vloer fu 32 meter. A ben poti wan hei skotu na a skin fu a bergi. Na son presi a skotu disi ben hei 50 meter. Fu a skotu go na tapusei fu a bergi a ben poti pilari leti-opo fu hori a vloer fu 32 meter. Na so a ben meki a gron fu a tempel kon moro bigi.

Herodes no ben wani du sani fu meki den Dyu ati bron. Boiti dati, a no ben wani tapu a wroko na ini a tempel èn a no ben wani tapu sma fu tyari ofrandi na a tempel. A Dyu historia skrifiman Josephus taki dati Herodes ben meki sma leri den Dyu priester fu du mesrewroko nanga temrewroko. Na so tra sma di no ben abi a reti fu kon na den santa presi fu a tempel, no ben o kon drape fu wroko.

Herodes dede fosi a tempel kaba bow. Na ini a yari 30, den ben e wroko na a tempel 46 yari langa kaba (Yohanes 2:20). A tempel ben kaba bow na wan pisi ten fu a yari 50 di Agrepa II, a pikin fu Herodes granpikin, ben e tiri.

Fu san ede den sma fu Malta ben e denki taki Paulus ben de wan kiriman?

Na umagado fu retidu (kruktu-anusei) e fon na umagado fu kruktudu

A kan taki den sma fu na èilanti Malta ben e bribi son sani di den Grikisma ben e bribi. Luku san ben pasa baka di a sipi pe Paulus ben de na tapu sungu na Malta, soleki fa wi kan leisi na ini a buku Tori fu den apostel. Den sma di ben de na ini a sipi ben meki wan faya fu waran den skin. Di na apostel Paulus piki wan tu tiki fu poti na tapu a faya, wan sneki beti en hori na en anu. Di den sma fu na èilanti si a sani disi, den taki: „A man disi musu de wan kiriman. A no dede na ini a se, ma toku a e kisi en strafu so taki a no sa tan na libi.”Tori fu den apostel 28:4.

Den Grikisma ben abi wan umagado fu retidu di ben nen Dike. Den ben bribi taki na umagado disi ben e luku san libisma e du. Efu wan sma no ben kisi strafu fu wan ogri di a du, dan Dike ben e taigi a moro hei gado Seus di ben o sorgu taki toku a sma kisi strafu. Wan buku taki dati kande den sma fu Malta ben e denki: ’Paulus no dede na se, ma toku a kisi en strafu fu di na umagado Dike seni a sneki fu beti en.’ Ma den sma kenki prakseri di den si taki noti no pasa nanga Paulus.