Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  oktober 2015

 TORI FU A KAFTI | BEGI E YEPI TRUTRU?

Fu san ede Gado wani taki wi musu begi en?

Fu san ede Gado wani taki wi musu begi en?

Gado wani taki wi musu de en mati.

Te mati e taki nanga makandra, dan den e tron moro bun mati fu makandra. Na so a de tu taki Gado e gi wi a kari fu taki nanga en. A wani taki wi musu de en mati. Gado taki: „Un musu kari mi, un musu kon na mi, èn un musu begi mi, dan mi o arki unu” (Yeremia 29:12). Te yu e taki nanga Gado, yu o ’kon krosibei na en èn a o kon krosibei na yu’ (Yakobus 4:8). Bijbel e taigi wi: „Yehovah de krosibei fu ala den wan di e kari en” (Psalm 145:18). O moro wi e begi en, o moro bun mati wi o tron fu en.

„Yehovah de krosibei fu ala den wan di e kari en.” Psalm 145:18

Gado wani yepi yu.

Yesus ben taki: „Suma fu unu o gi en pikin wan ston, te a e aksi en brede? Noso kande te a e aksi en wan fisi, a no o gi en wan sneki, a no so? Fu dati ede, efu unu . . . sabi fa fu gi un pikin bun sani, unu kan de seiker taki un Tata di de na hemel o gi sma bun sani te den e aksi en!” (Mateyus 7:9-11) Iya, Gado wani taki yu e begi en fu di ’a e broko en ede nanga yu’ èn a wani yepi yu (1 Petrus 5:7). A wani taki yu fruteri en san na den problema fu yu. Bijbel e taigi wi: „No broko un ede nanga nowan sani, ma begi Gado ala ten, begi en fayafaya èn taki en tangi tu. Na so a o kon sabi san unu wani aksi en.”Filipisma 4:6.

Libisma abi Gado fanowdu.

Koniman di ondrosuku a fasi fa libisma de, kon si taki milyunmilyun sma abi a firi fu begi. Srefi sma di no e bribi na ini Gado èn sma di e tweifri efu Gado de trutru abi a firi disi. * Disi e buweisi taki libisma meki nanga a firi fu anbegi Gado. Yesus taki: „Koloku fu den sma di sabi taki den abi Gado fanowdu” (Mateyus 5:3). Sobun, wan fu den prenspari sani di wi musu du efu wi sabi taki wi abi Gado fanowdu, na fu taki nanga en doronomo.

Gado wani taki wi musu begi en, ma sortu bun wi o kisi te wi e du dati?

^ paragraaf 8 Wan ondrosuku di Pew Research Center du na ini 2012 e sori taki na ini Amerkankondre sowan 11 procent fu den sma di no e bribi na ini Gado èn den sma di e tweifri efu Gado de trutru, e begi wán leisi noso moro leisi ibri mun.